پرەزيدەنت جانىنداعى ورتالىق كوممۋنيكاتسيالار قىزمەتىنىڭ الماتى بولىمشەسىندە جاس جۋرناليستەردىڭ «قالامگەر ازامات» قوعامدىق قورى ەلىمىزدە سايلاۋ قارساڭىندا «سەنىڭ داۋىسىڭ – سەنىڭ بولاشاعىڭ!» اتتى پوستەرلەر بايقاۋى جاريالانىپ, بۇگىندە باعىن سىناۋشىلار سانى 200 قاتىسۋشىدان اسىپ وتىرعاندىعىن مالىمدەدى.
كونكۋرستى ۇيىمداستىرۋشىلار بايقاۋعا استانا, الماتى, پاۆلودار, جامبىل جانە اتىراۋ ايماعىنىڭ 18 بەن 25 جاس ارالىعىنداعى تۇرعىنداردىڭ كوپتەپ قاتىسىپ وتىرعانىن جەتكىزدى. ولاردىڭ ايتۋىنشا, ەلىمىزدە مەملەكەتتىڭ بولاشاعى ءۇشىن ءۇن قوساتىن جاستار سانى جىل ساناپ ءوسىپ كەلەدى.
EL.KZ الەۋمەتتىك جەلىسىندە اشىلعان Sailau2016.el.kz ينتەرنەت-الاڭشاسى ارقىلى بۇل بايقاۋعا قاتىسامىن دەۋشىلەرگە بارلىق مۇمكىندىكتەر جاسالعان. وسى الەۋمەتتىك جۇيە ارقىلى ينتەرنەت قولدانۋشىلار بايقاۋعا كەلىپ تۇسكەن تۋىندىلارعا داۋىس بەرىپ, جەڭىمپازدى دا وزدەرى ىرىكتەيتىن بولادى. ىرىكتەلگەن ۇمىتكەرلەردىڭ ىشىنەن جەڭىمپازدى قازاقستان ەسترادا جۇلدىزدارى مەن بەلگىلى باق وكىلدەرىنەن جانە شىعارماشىل جاستاردان قۇرالعان ءادىل قازىلار توبى انىقتايدى.
ناۋرىز ايىنىڭ 18-ىندە «سەنىڭ داۋىسىڭ – سەنىڭ بولاشاعىڭ!» پوستەرلەر بايقاۋىنىڭ جەڭىمپازدارى جاريا ەتىلىپ, باعالى سىيلىقتارمەن ماراپاتتالادى.
قانات ەسكەندىر,
«ەگەمەن قازاقستان».
الماتى.