كەشە قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ «وتار» اسكەري بازاسىنىڭ اۋماعىندا «ارمي-2016» ارميا حالىقارالىق ويىندارىن وتكىزۋدى ۇيىمداستىرۋ جونىندە كوشپەلى كەڭەس وتكىزدى.
بيىلعى جىلدىڭ جازىندا ءارتۇرلى مەملەكەتتەردىڭ قارۋلى كۇشتەرى اسكەري قىزمەتشىلەرىنىڭ دالالىق, اۋە جانە تەڭىز داعدىسى بويىنشا ارميا حالىقارالىق ويىندارىنىڭ 23 بايقاۋىنىڭ وتكىزىلۋى جوسپارلانعان. ويىندار قازاقستان مەن رەسەي فەدەراتسياسىنىڭ اۋماعىندا العاش رەت وتەدى.
ەلىمىزدە «ارتيللەريالىق اتىس شەبەرى» جانە «مەرگەن شەبى» اتتى 2 بايقاۋدى وتكىزۋ جوسپارلانۋدا. اسكەري قىزمەتشىلەرىمىز بارلىق اتالىمداردا, ناقتىراق ايتساق, 21 كونكۋرستا ۇسىنىلادى.
«ارتيللەريالىق اتىس شەبەرى» بايقاۋىنا ءاربىر مەملەكەتتەن 21 ادامنان قۇرالعان كوماندا, ونىڭ ىشىندە 5 ادامعا دەيىن 3 مينااتقىش ەسەپتوبى قاتىسادى. بايقاۋدى وتكىزۋ ءۇشىن ءار كومانداعا كوپ نىسانالى جەڭىل بروندالعان تارتقىش, مينااتقىشتار, اۆتوماتتار جانە گراناتااتقىشتار ۇسىنىلاتىن بولادى.
«مەرگەن شەبى» بايقاۋىنا ءاربىر مەملەكەتتەن 7 ادامنان تۇراتىن كوماندا, ونىڭ ىشىندە 3 مەرگەندىك جۇپ قاتىسادى.
بايقاۋدى وتكىزۋ ءۇشىن ءار كومانداعا وپتيكالىق كوزدەۋىشى جانە «اسەلسان» تۇنگى كوزدەۋىشى بار دراگۋنوۆتىڭ مەرگەندىك ۆينتوۆكالارى ۇسىنىلادى.
وتكەن جىلى العاشقى «ارمي-2015» حالىقارالىق ويىندارى وتكەنىن ەستەرىڭىزگە سالا كەتەيىك. وعان الەمنىڭ 17 ەلى كەلدى. قازاقستاننىڭ قارۋلى كۇشتەرى ءۇش كونكۋرسقا, ياكي, اسكەري تەڭىزشىلەر مەن تەڭىز جاياۋ اسكەرلەرى – «كاسپي تەڭىزىنە», اسكەري ۇشقىشتار – «اۆيادارتسقا», تانكىشىلەر – «تانك بياتلونىنا» قاتىستى. سايىس قورىتىندىسى بويىنشا قازاقستان قارۋلى كۇشتەرىنىڭ اسكەري قىزمەتشىلەرى «اۆيادارتس» پەن «كاسپي تەڭىزىندە» ەكىنشى ورىندى جانە «تانك بياتلونىندا» ءتورتىنشى ورىندى قانجىعالاعان ەدى.
«ەگەمەن-اقپارات».