استانا. 4 ناۋرىز. بۇگىن بۇكىلالەمدىك بوكس سەرياسىندا (WSB) ەل نامىسىن قورعايتىن «استانا ارلاندارى» ازەربايجان استاناسى – باكۋ قالاسىندا جەرگىلىكتى «باكۋ فايرس» كومانداسىمەن كەزدەسىپ, 3:2 ەسەبىمەن باسىم ءتۇستى. بۇل تۋرالى egemen.kz ءتىلشىسى حابارلادى.
العاش بولىپ شارشى الاڭعا 52 كيلو سالماق دارەجەسىندەگى بوكسشىلار كوتەرىلدى. «ارلاندار» ساپىنان ولجاس ساتتىباەۆ سىنعا تۇسسە, قارسىلاس تاراپ ماگومەد يبيەۆكە سەنىم ارتتى. تارتىستى جەكپە-جەك ناتيجەسىندە قازاقستاندىق 3:0 ەسەبىمەن جەڭىسكە جەتتى.
ولجاستىڭ جەڭىستى جولىن 60 كيلودا باق سىناعان وتانداسىمىز زاكىر سافيۋللين جالعاستىردى. ول شارشى الاڭدا ناسراددين مامەدوۆتەن 3:0 ەسەبىمەن باسىم تۇسكەن بولاتىن.
الايدا, كەلەسى جەكپە-جەكتە, ياعني, 69 كيلودا ازەربايجاندار ەسە قايتارا ءبىلدى. اتاپ ايتقاندا, «باكۋ فايرس» بوكسشىسى تامەرلان ابدۋللاەۆ ءبىزدىڭ اسلانبەك شىمبەرگەنوۆتى 2:0 ەسەبىمەن جەڭدى. جالپى, بۇل ايقاستىڭ اسا تارتىستى وتكەنىن اتاپ وتكەن ءجون. ناتيجەسىندە قاپتالداعى تورەشىلەردىڭ ەكەۋى جەڭىستى ازەربايجانعا بەرسە, ءبىر قازى تەڭ ەسەپتى تىركەدى.
كەلەسى 81 كيلو سالماقتاعى جەكپە-جەكتە جانكۇيەرلەر شارشى الاڭ يەسى ميحايل داۋحالياۆەتس پەن قازاقستاندىق نۇرداۋلەت جارمانوۆتىڭ ايقاسىن تاماشالادى. قارسىلاسىنا قاراعاندا باسىم بولعان قازاق بوكسشىسى ۋاقىت وتكەن سايىن شابۋىلىن كۇشەيتتى. بۇل قارقىن ءوز جەمىسىن بەرىپ, تورەشىلەر ءۇشىنشى راۋندتا جارمانوۆتىڭ پايداسىنا تەحنيكالىق نوكاۋتتى تىركەدى. وسىلايشا, نۇرداۋلەت «ارلاندارعا» بۇل كەزدەسۋدەگى جەڭىستى الىپ بەردى.
ال سوڭعى كەزدەسۋدە اسا اۋىر سالماقتاعى (+91 كگ) بوكسشىلار جۇدىرىقتاستى. بۇل جولى «باكۋ فايرستىڭ» الىبى ارسلانبەك ماحمۋدوۆ ءبىزدىڭ نۇرجان بەكزاتوۆتان ايلاسىن اسىرىپ كەتتى. ايتارلىقتاي قارسىلاسىپ باققان نۇرجان سوڭعى – بەسىنشى راۋندتا نوكداۋنعا ءتۇستى. اۋىر سوققىدان كەيىن ول ەسىن جيعانىمەن, تورەشىلەر جەكپە-جەكتى توقتاتىپ, ازەربايجاننىڭ قولىن كوتەردى.
«باكۋ فايرس» (باكۋ, ازەربايجان) – «استانا ارلاندارى» (استانا, قازاقستان) 2:3
52 كگ: ماگومەد يبيەۆ – ولجاس ساتتىباەۆ 0:3 (45:50, 44:50, 45:50)
60 كگ: ناسراددين مامەدوۆ – زاكىر سافيۋللين 0:3 (45:49, 44:49, 45:49)
69 كگ: تامەرلان ابدۋللاەۆ – اسلانبەك شىمبەرگەنوۆ 2:0 (47:47, 48:46, 48:46)
81 كگ: ميحايل داۋحالياۆەتس – نۇرداۋلەت جارمانوۆ TKO R3
+91 كگ: ارسلانبەك ماحمۋدوۆ – نۇرجان بەكزاتوۆ TKO R5
ەلامان قوڭىر.
دەرەك: egemen.kz.
سۋرەت: worldseriesboxing.com.