وسكەمەن. 4 ناۋرىز. شىعىس قازاقستان وبلىسىندا 8-ناۋرىز حالىقارالىق ايەلدەر كۇنىنە ارنالعان سالتاناتتى جيىن ءوتتى. ايەلدەر قاۋىمىن كەلە جاتقان مەرەكەلەرىمەن وبلىس اكىمى دانيال احمەتوۆ قۇتتىقتادى. بۇل تۋرالى شىعىس قازاقستان وبلىسىنىڭ اقپاراتتىق ورتالىعىنا سىلتەمە جاساعان egemen.kz ءتىلشىسى حابارلادى.
ءار سالادا ەڭبەك ەتىپ جۇرگەن ايەلدەردى ءوڭىر باسشىسى ماراپاتتاپ, سىيلىقتار تاپسىردى. ولاردىڭ قاتارىندا اۋىل شارۋاشىلىعى, مادەنيەت, سپورت, ءبىلىم بەرۋ سالالارىنىڭ وكىلدەرى, جۋرناليستەر مەن ءۇي شارۋاسىنداعى ايەلدەر, «كۇمىس القا» يەلەرى بار. ارقايسىسى كاسىبي جانە ازاماتتىق تۇرعىدا قالىپتاسقان, جوعارى شىعارماشىلىق جەتىستىكتەرگە قول جەتكىزگەن, ەڭبەك قىزمەتى مەن ومىردە تابىسقا جەتە بىلگەن جاندار. ايماق باسشىسى دانيال احمەتوۆ بۇگىنگى كەزدەسۋ قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيتويى قارساڭىنداعى القاشقى مەرەكەلىك شارا ەكەندىگىن اتاپ ءوتتى.
«ەل بولاشاعىن ەرتەدەن ويلاعان ەلباسى نۇرسۇلتان ءابىش ۇلى نازارباەۆ تاۋەلسىزدىكتىڭ العاشقى كۇندەرىنەن باستاپ, ايەل-انانىڭ الەۋمەتتىك جاعدايىنا, دەنساۋلىعىنا باسا كوڭىل اۋدارىپ كەلەدى. سەبەبى, ەر – ەلدىڭ يەسى بولسا, ايەل – ءۇيدىڭ كيەسى. قازىرگى قوعامدا ايەل تەك وتباسىن ويلايتىن تۇلعا عانا ەمەس, مەملەكەتتىڭ ساياسي ومىرىنە بەلسەنە اتسالىسىپ, ەلىمىزدىڭ ستراتەگيالىق مىندەتتەرىن شەشۋگە زور ۇلەس قوسىپ وتىرعان قوعام مۇشەسى», – دەدى وبلىس اكىمى دانيال احمەتوۆ.
شىعىس وڭىرىندە ايەلدەر قاۋىمىنىڭ باسىم بولىگى مادەنيەت, ءبىلىم بەرۋ, دەنساۋلىق ساقتاۋ سىندى الەۋمەتتىك سالالاردا ەڭبەك ەتەدى. مەملەكەتتىك باسقارۋ سالاسىنىڭ جارتىسى – ايەلدەر. وبلىستىڭ بارلىق سالالارىندا باسقارۋشى قىزمەتىن اتقارىپ جۇرگەن ايەلدەر سانى 40 پايىزدى قۇرايدى. سونىمەن قاتار, نازىك جاندىلار ايماقتىڭ قوعامدىق ومىرىنە, ازاماتتىق ينستيتۋتتاردى دامىتۋعا زور ۇلەس قوسىپ, 13 ايەلدەر مەن گەندەرلىك, مەملەكەتتىك ەمەس ۇيىمدارعا, 39 ەتنومادەني بىرلەستىككە جەتەكشىلىك ەتىپ وتىر.
دۋمان اناش.
دەرەك, سۋرەت: شىعىس قازاقستان وبلىسىنىڭ اقپاراتتىق ورتالىعى.