قوستاناي. 1 ناۋرىز. كوكتەمنىڭ العاشقى كۇنى قوستاناي قالاسى ورتالىعىنداعى دوستىق ۇيىندە ەلىمىزدە تۇڭعىش رەت مەرەكەلەنىپ وتىرعان العىس ايتۋ كۇنى اتالىپ ءوتتى. بۇل تۋرالى egemen.kz ءتىلشىسى حابارلادى.
نەگىزى قوستانايدا العىس ايتۋ كۇنى كوپتەگەن شارالار وتكىزىلدى. بارلىعى دا مەيىرىمدىلىككە, دوستىق تاقىرىبىنا ارنالدى. مەكتەپتەردە, بالاباقشالاردا, جوعارى, ارنايى كاسىپتىك وقۋ ورىندارىندا, كىتاپحانالاردا قىزىقتى شارالار, كورمەلەر ءوتتى. ال دوستىق ۇيىنە جاستار, زيالى قاۋىم وكىلدەرى, قازاقستان حالقى وبلىستىق اسسامبلەياسىنىڭ مۇشەلەرى جينالدى. الدىمەن مەرەكەگە كەلۋشىلەر دوستىق ءۇيىنىڭ ەكىنشى قاباتىندا قوستاناي وبلىسىندا تۇرىپ جاتقان ءتۇرلى ۇلىستاردىڭ ۇلتتىق كورمەسىن تاماشالادى. سودان كەيىن ەلىمىزدە تۇڭعىش تويلانعان مەرەكەنىڭ سالتاناتتى اشىلۋى بولدى.
وبلىس اكىمى ارحيمەد مۇحامبەتوۆ جينالعاندارعا مەرەكەنىڭ حالقىمىز بىرلىگى ءۇشىن ايىرىقشا ماڭىزى بارلىعىن اتاپ ءوتتى. وبلىس كولەمىندە تۇرىپ جاتقان بارلىق ۇلتتار مەن ۇلىستار ءبىر ماقساتقا عانا ۇمتىلاتىنىن, ەلىمىزدىڭ دامۋى مەن تىنىشتىعىن تىلەيتىنىن ايتتى. مۇنان كەيىن قوستاناي وڭىرىندەگى باسقا ۇلىستار وكىلدەرى ءسوز الدى. ولاردىڭ بارلىعىنىڭ لەبىزىنەن «قازاق ەلى دەگەنشە قايىرىمى مول دەسەيشى» دەگەن وي اتويلاپ تۇردى, قازاق حالقىنا العىسىن ايتىپ جاتتى.
چەشەن-ينگۋش ەتنو-مادەني بىرلەستىگىنىڭ توراعاسى ەلبرۋس تيماەۆ: «اشتىقتا جەگەن قۇيقانىڭ توقشىلىقتا ءدامى اۋزىڭنان كەتپەيدى» دەگەن, بۇكىل تۇتاس حالىق «جاۋ» بولىپ, ولاردى ۆاگوندارمەن قازاقستانعا اكەپ توككەندە, قازاقتار ولاردى ۇيلەرىنە كىرگىزىپ, قولتىعىنا تارتىپ, ءبىر ءۇزىم نانىن ءبولىپ بەردى. ەڭ باستىسى, وسى ازىپ-توزىپ كەلگەن حالىققا قازاقتار قورلاماي, قۇرمەتپەن قارادى, ولاردىڭ قايعىسىن بولىسە ءبىلدى. وسىنداي ادامگەرشىلىكتى ۇمىتۋعا بولا ما؟ ال قازىر ەلباسى جۇرگىزىپ وتىرعان ساياسات چەشەندەر مەن ينگۋشتارعا ءوز ۇلتتىق ءداستۇرىن, ءتىلىن, ءدىنىن ۇمىتپاق تۇگەل, ونى دامىتۋعا مۇمكىندىك بەرىپ وتىر. مۇندايدى باعالاماۋعا, العىس ايتپاۋعا بولا ما؟ اللانىڭ قۇدىرەتىمەن قازاق جەرىنە تاپ بولعان قانداي ۇلىستىڭ دا جولى بولدى, باعى اشىلدى. ەلمەن بىرگە ولار دا دامىدى, باقىتتى كۇندەر كەشىپ وتىر. ال ءبىز ەندى قازاق مەملەكەتىن ماڭگىلىك ەل ەتۋگە بىرىگىپ, كۇش سالۋىمىز كەرەك. وسى ويدى ۇرپاعىمىزدىڭ بويىنا ءسىڭىرۋىمىز قاجەت», – دەدى. جۇرتشىلىق الدىندا ءتۇرلى ۇلىستار وكىلدەرى ونەر كورسەتتى.
ءنازيرا جارىمبەتوۆا.
دەرەك, سۋرەت: egemen.kz.