استانا. 29 اقپان. 1 ناۋرىز – العىس ايتۋ كۇنىنە وراي قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ستۋدەنتتەر سارايىندا «ادال سەزىم, شىن نيەتپەن العىس ايتام ەلىمە!» اتتى سالتاناتتى جيىن ءوتتى. بۇل تۋرالى egemen.kz ءتىلشىسى حابارلادى.
شاراعا وبلىسىمىزداعى ەتنو-مادەني بىرلەستىك وكىلدەرى, ۋنيۆەرسيتەتتىڭ وقىتۋشى-پروفەسسورلارى مەن ستۋدەنت-جاستارى قاتىستى. جيىن ەلىمىزدە ءومىر ءسۇرىپ جاتقان ءتۇرلى ەتنوستاردىڭ قازاق جەرىنە كەلۋ تاريحى جايلى دەرەكتى فيلممەن باستالدى.
سالتاناتتى كەشتىڭ اشىلۋىندا ۋنيۆەرسيتەت رەكتورى, تەحنيكا عىلىمدارىنىڭ دوكتورى, پروفەسسور قىلىشباي بيسەنوۆ قازاقتىڭ كەڭ بايتاق دالاسىن مەكەن ەتكەن 130-دان اسا ۇلت پەن ۇلىستىڭ ىنتىماعىن ودان ءارى نىعايتىپ, ارمان-تىلەگىن ءبىر ارناعا توعىستىراتىن بۇل مەرەكەنىڭ ماڭىزدىلىعىنا توقتالدى.
«تاريحي دەرەكتەرگە سۇيەنەر بولساق, 1946 جىلى كسرو-دا جالپى جەر اۋدارىلعاندار سانى 2 ملن. 463 940 ادام بولسا, ولاردىڭ قازاق جەرىن پانالاعاندارى 1 ملن. 200 مىڭ بولدى. ورتا ازياعا قونىس اۋدارعانداردىڭ 36%-ى قازاق جەرىن پانالاعان. بىزدىڭ اتا-بابالارىمىز قيىن-قىستاۋ كەزەڭدە ءوزىنىڭ مەيىرىمى مەن پاراساتىن وسىلاي تانىتتى. ۇلى دالا ەلىنەن پانا تاپقان وزگە ۇلت وكىلدەرىنىڭ بۇگىنگە دەيىن ءبىزدى اسا قۇرمەت تۇتىپ, قادىرلەيتىنى دە وسىدان», – دەدى ۋنيۆەرسيتەت رەكتورى قىلىشباي بيسەنوۆ.
كەش اياسىندا وبلىستىق كورەي ەتنومادەني بىرلەستىگى توراعاسىنىڭ ورىنباسارى ۆيلوري شين, «قازاقستان ورىستارى قاۋىمداستىعى» قوعامدىق بىرلەستىگى وبلىستىق فيليالىنىڭ جەتەكشىسى ۆلاديمير تولوكوننيكوۆ, وبلىس اكىمى اپپاراتى جانىنداعى «قوعامدىق كەلىسىم» ورتالىعىنىڭ ديرەكتورى ۋاليحان يبراەۆتار ءسوز سويلەپ, قازاق حالقى قاي كەزدە دە قىسىلعانعا دەم بەرىپ, قينالعاندى قولتىعىنان دەمەگەن ۇلى دالا ۇرپاقتارى ەكەندىگىن ەرەكشە سەزىممەن جەتكىزدى.
مەرەكەلىك كەشتە ورىس, ۋكراين, كورەي, پولياك, موڭعول, يتاليان حالىقتارىنىڭ ۇلتتىق اندەرى ورىندالىپ, «ديدار» حالىقتىق بي ءانسامبلىنىڭ قويىلىمدارى ساحنالاندى.
سونىمەن قاتار, ۋنيۆەرسيتەتتە ءبىلىم الىپ جاتقان وزگە ۇلت ستۋدەنتتەرى وزدەرىنىڭ العىستارىن جەتكىزدى.
ايان ءابدۋالي.
دەرەك, سۋرەت: egemen.kz.