قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە «Zakon.kz» اقپاراتتىق پورتالى مەن «قوعامدىق كەلىسىم» زەرتتەۋ ينستيتۋتى وكىلدەرىنىڭ قاتىسۋىمەن بريفينگ ءوتتى. بريفينگ سايلاۋ ناۋقانى اياسىندا الەۋمەتتىك زەرتتەۋلەر جۇرگىزۋدىڭ بارىسىنا ارنالدى.
«Zakon.kz» اقپاراتتىق پورتالىنىڭ باس رەداكتورى قايرات شايحيەۆ: «ەلىمىز ماڭىزدى ساياسي وقيعانىڭ قارساڭىندا تۇرعانىن بىلەسىزدەر. 20 ناۋرىز كۇنى قازاقستاندا پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارى وتەدى. بۇگىندە ۇگىت-ناسيحات ءىس-شارالارى باستالىپ كەتتى. وسىعان بايلانىستى «Zakon.kz» اقپاراتتىق پورتالى الداعى سايلاۋعا جانە ونىڭ وتكىزىلۋ بارىسىنا باعا بەرۋ ۇدەرىسىنە قاتىسۋ تۋرالى شەشىم قابىلدادى. ءبىز وزىمىزگە سەرىكتەس رەتىندە «قوعامدىق كەلىسىم» زەرتتەۋ ينستيتۋتىن تاڭدادىق», – دەي كەلە, ەلەكتوراتتى كەزەڭ بارىسىندا سايلاۋشىلار اراسىندا ساۋالداما جۇرگىزىلەتىنىن, بۇل ەل تۇرعىندارىنىڭ سايلاۋعا, ساياسي ناۋقانعا قاتىسىپ وتىرعان ۇمىتكەرلەرگە قاتىستى حاباردار بولىپ, اقپارات الۋىنا مۇمكىندىك بەرەتىنىن جەتكىزدى.
«قوعامدىق كەلىسىم» زەرتتەۋ ينستيتۋتىنىڭ اتقارۋشى ديرەكتورى ايگۇل سادۋاقاسوۆا دا ەلدە ماڭىزدى ساياسي ناۋقاننىڭ ءجۇرىپ جاتقانىنا توقتالدى. «20 ناۋرىز كۇنى «قوعامدىق پىكىر» زەرتتەۋ ينستيتۋتى ءوزىنىڭ زەرتتەۋ-ساراپتاۋ جۇمىستارىن ۇيىمداستىرىپ, سايلاۋ ۋچاسكەلەرىنەن شىققان سايلاۋشىلار اراسىندا ساۋالداما جۇرگىزەدى. بۇل – جالپى ستاندارتتى ءادىس. قازاقستاندا عانا ەمەس, بارلىق ەلدە دە وسىنداي تاجىريبە بار. وسى زەرتتەۋ ءادىسى بويىنشا ءاربىر بەسىنشى سايلاۋشى سايلاۋ ۋچاسكەسىنەن بەلگىلى ءبىر كانديداتقا داۋىس بەرىپ شىققاننان كەيىن ارنايى ساۋالداماعا قاتىسىپ, جاۋاپ بەرەدى. وعان قازاقستان بويىنشا بارلىق وبلىستار جانە استانا مەن الماتى قالالارىنىڭ سايلاۋشىلارى قامتىلادى. سونىڭ ىشىندە ەلىمىز بويىنشا 110 سايلاۋ ۋچاسكەسىن قامتۋدى كوزدەپ وتىرمىز», – دەدى ول.
سونداي-اق, ولاردىڭ اراسىندا وبلىس ورتالىقتارى مەن استانا جانە الماتى قالالارىنان 56 سايلاۋ ۋچاسكەسى, شاعىن قالالاردان 28 سايلاۋ ۋچاسكەسى, سونىمەن قاتار, اۋىلدىق وكرۋگتەردەن 26 سايلاۋ ۋچاسكەسى ىرىكتەلىپ الىنعانىن ايتتى. ال زەرتتەۋگە قاتىسۋ ءۇشىن قازاقستاننىڭ بارلىق وڭىرىنەن 200-گە جۋىق سۇحباتتاسۋشى قامتىلماق ەكەن. «نەگىزگى قورىتىندىلار جالپىلاما تۇردە زاڭمەن بەكىتىلگەن ەرەجەلەرگە سايكەس, سول كۇننىڭ سوڭىندا عانا بەرىلەدى. باق ءۇشىن 21 ناۋرىز كۇنگى تۇنگى ساعات 00.00-دە ساۋالدامانىڭ قورىتىندىسى ارنايى ايتىلاتىن بولادى», – دەدى ءا. سادۋاقاسوۆا.
ءلايلا ەدىلقىزى,
«ەگەمەن قازاقستان».
استانا.