بايزاق اۋدانى, قىزىل جۇلدىز اۋىلىنىڭ ماڭىنداعى «Rola-7» جاۋاپكەرشىلىگى شەكتەۋلى سەرىكتەستىگىنىڭ قۇرىلعانىنا 8 جىلعا جۋىقتادى. اۋەلى مۇندا ءبىر عانا «چابرەتس» جايما تسەحى جۇمىس ىستەدى. بىراق, كاسىپورىن باسشىسى تۇرسىنبەك نۇرباەۆتىڭ جوسپارلارى وتە كوپ بولاتىن. ارادا ەكى جىل وتكەندە ەكىنشى جايما تسەحى اشىلدى. 2011 جىلى قۇرعاق كەسپە جاسايتىن ءۇشىنشى تسەح ءوز جۇمىسىن باستادى. بۇل كەزدە مۇندا جۇمىسشىلار سانى دا ارتا ءتۇستى. 2012 جىلى كاسىپورىنعا ونىمدەرى حالىقارالىق «حالال» ستاندارت تالابىنا ساي ەكەندىگىن ايعاقتايتىن ارنايى كۋالىك بەرىلدى. جۇمىس دۇرىس جولعا قويىلدى. كاسىپورىننىڭ ساپالى ونىمدەرىنە سۇرانىس ۇلعايدى.
«Rola-7» كاسىپورنى تاۋار ءوندىرۋشىلەر اراسىندا «قازاقستان كوشباسشىسى – 2013» بايقاۋىنىڭ جەڭىمپازى اتاندى. 2014 جىلى تاۋار وندىرۋشىلەردىڭ رەسپۋبليكالىق «پارىز» بايقاۋىندا «ۇزدىك ۇجىمدىق كەلىسىم» اتالىمى بويىنشا جەڭىمپاز دەپ تانىلعانى كاسىپورىننىڭ جۇيەلى جۇمىسىنىڭ جەمىسى. «پارىز» بايقاۋىنىڭ ديپلومىن ««Rola-7» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ت.نۇرباەۆ ەلباسىنىڭ قولىنان الىپ قايتتى. بۇل كاسىپورىندا پارلامەنت ءماجىلىسىنىڭ دەپۋتاتتارى دا بولىپ, جۇمىس بارىسىنا, ەڭبەككەرگە دەگەن قۇرمەتكە كوڭىلدەرى تولعان ەكەن.
بۇل كۇندە «Rola-7» ونىمدەرى استانا, الماتى قالالارىنا جانە بىرنەشە وبلىستارعا جونەلتىلەدى. ۇلكەن سۇرانىسقا يە. مۇندا ماكارون ءونىمىنىڭ 20 ءتۇرى شىعارىلادى. مۇندا وندىرىلگەن ءونىم رەسەي, ۋكراينا, بەلورۋسسيا ەلدەرىندەگى ونىمدەردەن ارتىق بولماسا, كەم ەمەس. كاسىپورىندا 18 اۆتوكولىك تۇراقتى جۇمىس ىستەپ تۇر. جۇمىسشىلار مەن كاسىپورىن باسشىلىعى اراسىندا جاسالعان كەلىسىمشارت بار. كەيىنگى جىلدارى جۇمىسشىلار سانى ءۇش ەسەگە ۇلعايىپتى. مۇندا ەڭبەك ەتۋشىلەردىڭ جالاقىلارى دا كوڭىلدەن شىعادى.
– ەڭ باستىسى, 150 ادامدى جۇمىسپەن قامتىپ وتىرمىز. بىلتىر جايمانىڭ جىلدام دايىندالاتىن ءتۇرى بويىنشا تاعى ءبىر تسەح اشتىق. سوڭعى جىلدارى جۇمىسشىلاردىڭ جالاقىسىن تاعى 10 پايىزعا كوبەيتتىك. مۇنىڭ ءبارى ءوڭىردىڭ ەكونوميكاسىنىڭ وركەندەۋىنە سەپتىگىن تيگىزەتىنىن تۇسىنەمىز. الداعى ۋاقىتتا ونىمدەرىمىزدى سىرت ەلدەرگە دە شىعارۋىمىز مۇمكىن. مۇندا جۇمىسشىلارىمىزعا قاجەتتى جاعدايدىڭ بارلىعى جاسالعان. ءتارتىپتى قاداعالاۋ, جۇمىس بەلسەندىلىگىن نازاردا ۇستاۋ ماقساتىمەن بەينەباقىلاۋ قويىلعان. ۇجىم ەڭبەككەرلەرىنىڭ جۇمىسى قاشاندا باعالانىپ وتىر, – دەيدى كاسىپورىن باسشىسى.
كاسىپورىننىڭ تسەحتارىن ارالاپ كوردىك. جۇمىسشىلار ەڭبەك كورىگىن قىزدىرۋدا. ولاردىڭ جۇزدەرىنەن كاسىپورىننىڭ بولاشاعىنا دەگەن ۇلكەن سەنىمدى بايقادىق. بۇل جاۋاپكەرشىلىگى شەكتەۋلى سەرىكتەستىك جىلىنا شامامەن 9-10 ميلليون تەڭگە تازا تابىس تاۋىپ وتىر.
مەملەكەت قولداۋىنا سۇيەنىپ, ءىستىڭ كوزىن تاپقاندى تابىس ءوزى ىزدەپ كەلەتىنىنە تاعى كوزىمىز جەتتى.
ەسەت دوسالى,
جۋرناليست.
جامبىل وبلىسى,
بايزاق اۋدانى.
سۋرەتتى تۇسىرگەن
اقادىل رىسماحان.