«جىل باستالدى دەگەنشە تەندەر «جىرى» باستالادى» دەسەيشى» دەگەن ەكەن بىرەۋ... سول ايتپاقشى, كەشە عانا وتكەن جىلدى قورىتىندىلاپ, قول جەتكىزگەن جەتىستىگىمىزدى الاقايلاپ ايتىپ جۇرگەندە تەندەر دەگەن «تەنتەكتىڭ» جىل سايىنعى حيكاياسى باستالىپ تا كەتىپتى. مەملەكەتتىك ساتىپ الۋ ءىسىن قانشا مەڭگەردىك دەسەك تە جىل سايىن ءار نارسە سەبەپ بولىپ, كەي كەزدەرى قاڭتاردا قولعا الىنعان كونكۋرستاردىڭ قىركۇيەككە دەيىن سوزىلىپ, ادامدى سالپىلداتىپ قوياتىنى بار. – سودان بولار «تەندەر تەز وتسە, تىرلىك تە تەز بىتەدى. مەملەكەتتىك ساتىپ الۋ ءىسى ۋاقتىلى ءارى ادىلەتتى وتسە, قۇرىلىس تا ءوز مەرزىمىندە ءارى ساپالى اياقتالادى», دەگەن جامبىل وبلىسىنىڭ اكىمى كارىم كوكىرەكباەۆ قايبىر كۇنى وسى تەندەر جۇمىسىن پىسىقتاپ, بىرقاتار باسشىلاردى تىعىرىققا تىرەدى. شىنىندا, سوناۋ قارا كۇزگە دەيىن سوزىلاتىن قۇرىلىستاردىڭ قالاي باستالىپ, قالاي بىتەتىنىن وسى كونكۋرستاردىڭ قاي ۋاقىتتا وتۋىنەن-اق بىلە بەرۋگە بولاتىن سياقتى. قۇرىلىسى تىم ۇزاققا سوزىلىپ كەتكەن نىساندا قايبىر ساپا بولسىن؟!
بيىل جامبىل وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسى 11,6 ملرد. تەڭگەنى قۇرايتىن 203 لوت بويىنشا ساتىپ الۋ جوسپارىن ازىرلەپتى. ونىڭ ىشىندە 10,1 ملرد. تەڭگەنى قۇرايتىن 155 لوت بويىنشا كەلىپ تۇسكەن وتىنىمدەردىڭ بارلىعىنا كونكۋرستار جاريالاندى. بۇل 76,4 پايىزدى قۇرايدى. وتىنىمدەر ۇسىنىلماعان لوتتار سانى – 48. ارقانى كەڭگە سالعان جامبىل مەن جۋالى اۋداندارى 5 لوتتان, سارىسۋ – 8 جانە ت.رىسقۇلوۆ اۋدانى 4 لوتقا وتىنىمدەر ۇسىنباعان.
– كونكۋرس وتكىزۋ بارىسىندا مىنا كەمشىلىكتەر جىل سايىن, ءتىپتى جۇيەلى تۇردە كەزدەسەدى دەپ ايتۋعا بولادى, – دەيدى بۇل جونىندە جامبىل وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسىنىڭ باسشىسى راحمانقۇل بايتەليەۆ. – ولار, مەملەكەتتىك ساتىپ الۋ ۆەب-پورتالىنا اقپاراتتى دۇرىس ورنالاستىرماۋ, ياعني سوماسىن, اتقارىلاتىن جۇمىس مەرزىمىن دۇرىس ەنگىزبەيدى. قۇرىلىس جۇمىستارى جوبالارىنىڭ ەلەكتروندى نۇسقاسى تولىق بولمايدى جانە دەر كەزىندە ۇسىنىلمايدى. سونداي-اق, تاپسىرىس بەرۋشىنىڭ ەلەكتروندى ساندىق قولتاڭباسى بولمايدى.
وسىنىڭ سالدارىنان 2015 جىلدىڭ جەلتوقسان ايىنان بەرى تاپسىرىس بەرۋشىلەر, ياعني شۋ قالاسىنداعى «بالداۋرەن» بالاباقشاسىنىڭ جانە جۋالى اۋدانى اكىمدىگىنىڭ قۇرىلىس ءبولىمى باسشىلارىنىڭ جانە بىردە-ءبىر مامانىنىڭ ەلەكتروندى ساندىق قولتاڭباسىنىڭ بولماۋىنان مەملەكەتتىك ساتىپ الۋ جوسپارى ۆەب-پورتالعا ورنالاستىرىلماي, كونكۋرس جاريالانباۋدا.
ارينە, بۇعان اۋدان اكىمدەرىنىڭ دە ايتارى بار. ولاردىڭ ۋاجدەرىنە قاراعاندا جامبىل وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسى مەن اۋدان اكىمدەرىنىڭ بۇل ماسەلەدەگى مالىمەتتەرى ەكى ءتۇرلى ەكەن. باسقارما باسشىسى «كونكۋرستاردىڭ ءالى ءبىرازى جاريالانبادى» دەپ, قارا اسپاندى توندىرسە, اۋدان باسشىلارى «قۇجاتتاردىڭ ءبارىن ۇسىندىق, ءبىردى-ەكىلى عانا كونكۋرستار قالدى» دەپ, بۇل تىرلىكتى بىتتىگە ساناپ وتىر. ايتسە دە باسقارما باسشىسى ر. بايتەليەۆتىڭ «قۇجاتتاردى جيىپ اكەپ, باسقارماعا وتكىزە سالۋمەن ءىس بىتپەيدى. مەملەكەتتىك ساتىپ الۋ ۆەب-پورتالدا جارىق كورگەن كەزدە عانا جاريالانعان بوپ ەسەپتەلەدى», دەگەنى سەنىمدى شىقتى. وسىدان-اق, اۋداندىق اكىمدىكتەگىلەردىڭ ءالى دە مەملەكەتتىك ساتىپ الۋ ءىسىن جاقسى مەڭگەرمەگەندىكتەرى بايقالادى.
قالاي ايتساق تا, جامبىلدىڭ شارۋاسىن جاپ-جاقسى-اق ءدوڭگەلەتىپ كەلە جاتقان وبلىس اكىمى ك.كوكىرەكباەۆتىڭ بۇل سالانى قامشىلاپ, تەزگە سالىپ, تەزدەتۋىنىڭ جەمىسىن كۇزدە كورەتىن بولامىز.
ورالحان ءداۋىت,
«ەگەمەن قازاقستان».
جامبىل وبلىسى.