سارسەنبى كۇنى «استانا ەكسپو-2017» ۇلتتىق كومپانياسى» اق جانە «ترانستەلەكوم» اق سەرىكتەستىك مەموراندۋمىنا قول قويدى. ءسويتىپ, «ترانستەلەكوم» كومپانياسى «كورمە سەرىكتەسى» مارتەبەسىنە يە بولدى.
«ترانستەلەكوم» – ەلىمىزدىڭ ءىرى ءىت جانە بايلانىس وپەراتورلارىنىڭ ءبىرى. ول تەلەكوممۋنيكاتسيا, اقپاراتتىق كوممۋنيكاتسيا سالاسىندا كەڭ اۋقىمدى قىزمەت كورسەتە الاتىن بىرەگەي كومپانيا, سونداي-اق, ءىت ينتەگراتور بولىپ تابىلادى.
«قازاقستاندىق كومپانيانىڭ يننوۆاتسيالىق جوبالاردى ءساتتى جۇزەگە اسىرىپ جاتقاندىعى كوڭىل قۋانتادى. «ترانستەلەكومنىڭ» اۋقىمدى فيليالدىق جۇيەسى بار, ول بۇكىل قازاقستان اۋماعىندا ەكسپو كورمەسىنىڭ كەڭ تاراۋىنا ىقپال ەتەدى. سوندىقتان ءبىزدىڭ جوبامىزعا «ترانستەلەكوم» سىندى الدىڭعى قاتارلى كومپانيالاردىڭ قاتىسۋى ەلىمىزدىڭ بولاشاققا دەگەن سەنىمىن نىعايتىپ, ەلباسى تاپسىرماسىنىڭ ورىندالۋىن قامتاماسىز ەتەدى», دەدى ءوز سوزىندە «استانا ەكسپو-2017» ۇك» اق باسقارماسىنىڭ ءتوراعاسى احمەتجان ەسىموۆ.
«حالىقارالىق مامانداندىرىلعان ەكسپو-2017 كورمەسىنىڭ رەسمي «ءىت سەرىكتەسى» بولۋ «ترانستەلەكوم» ءۇشىن ۇلكەن ءمارتەبە. بۇگىنگى تاڭدا «ترانستەلەكوم» اكتسيونەرلىك قوعامى «استانا ەكسپو-2017» ۇلتتىق كومپانياسىمەن بىرلەسىپ جۇمىس ىستەۋدە. ءبىز ءىس-شارانىڭ ءمانى مەن ماڭىزىن تۇسىنە وتىرىپ, وعان ۇلكەن جاۋاپكەرشىلىكپەن قارايمىز», دەدى كومپانيا پرەزيدەنتى داۋرەن پىشەمباەۆ.
الداعى ۋاقىتتا «استانا ەكسپو-2017» ۇلتتىق كومپانياسى مەن «ترانستەلەكوم» اق حالىقارالىق كورمەنى وتكىزۋ باعىتىندا بىرلەسكەن ءىس-شارالاردى جۇزەگە اسىراتىن بولادى. سونداي-اق, «ترانستەلەكوم» اق ەكسپو-2017 كورمەسى بارىسىندا «ۇيىمداستىرۋشىلار كەڭسەسىن» تەلەفون جانە ينتەرنەتپەن قامتاماسىز ەتىپ, شەتەلدىك قاتىسۋشىلار ءۇشىن VPN قولجەتىمدىلىگىنە تەحنيكالىق تۇرعىدان جاعداي جاساپ, كورمە قوناقتارىنا بۇكىل كورمە وتەتىن كەزەڭ بارىسىندا ينتەرنەت جەلىسىن ۇسىنادى.
حالىقارالىق كورمەنى وتكىزۋگە 10-نان اسا ءىرى كومپانيا تارتىلىپ وتىر. ولاردىڭ قاتارىندا: NCOC, Shell, Samsung, ەير استانا, CISCO, Saint-Gobain, «قازكوممەرتسبانك» اق, «سامۇرىق-ەنەرگو» اق, «قازپوشتا» اق جانە ت.ب. بار.
«ەگەمەن-اقپارات».