الماتى قالاسىنداعى تەمىرجولشىلاردىڭ مادەنيەت ۇيىنەن اشىلعان تۇركسىب اۋدانى بويىنشا №33 سايلاۋ وكرۋگىندە «نۇر وتان» ساياسي پارتياسى اتىنان قالالىق ماسليحاتقا كانديداتتىق تىركەۋ شاراسى بولىپ ءوتتى.
ءوزىنىڭ ومىرشەڭ يدەيالارى, قوعامنىڭ دامۋىنا ۇلەس قوسۋداعى ەرەن تالپىنىسى كوپتىڭ كوڭىلىنەن شىققان ءلاززات قالتاەۆا وكرۋگ بويىنشا ىرىكتەۋدەن سۇرىنبەي ءوتىپ, قالالىق ماسليحاتقا ۇمىتكەر رەتىندە تىركەلدى. 7 جاسىندا جول اپاتىنا ۇشىراپ, ارباعا تاڭىلعان ۇمىتكەردىڭ ءومىر جولى تىرشىلىك ءۇشىن تىرمىسۋمەن ەمەس, قورشاعان ورتانى جاقسىلىققا بولەپ, ادامزات قوعامىنا ىزگىلىكتىڭ ءىزىن قالدىرسام دەگەن ادامي كۇرەسپەن ءوتىپ كەلەدى.
17 جاسىنان باستاپ مۇگەدەكتەر قوعامىندا قاتارداعى قىزمەتكەر بولىپ ەڭبەك جولىن باستاعان ءلاززات مولدابەكقىزى 1997 جىلى قۇندى قاعازدار نارىعىنىڭ ماماندارىن دايارلايتىن ارناۋلى كۋرستى ءتامامداپ, وسى سالا بويىنشا بۇگىندە بىلىكتى مامانداردىڭ بىرىنە اينالىپ وتىر.
2001 جىلى وزىمەن تاعدىرلاس وزگە دە ىنتالى ايەلدەرمەن بىرلەسىپ, «جارىمجان ايەلدەردىڭ «شاڭىراق» اسسوتسياتسياسى» قوعامدىق بىرلەستىگىن قۇرىپ, قازىردە سول بىرلەستىكتى باسقارىپ كەلەدى. جانى جاداۋ, تاعدىرى بولەك ايەلدەردىڭ مۇڭ-مۇقتاجىن قوعامدىق دەڭگەيدە بەلسەنە كوتەرە بىلگەن ل. قالتاەۆا «قازاقستان تاۋەلسىزدىگىنە – 20 جىل» مەرەيتويلىق مەدالىمەن, «قۇرمەت» وردەنىمەن, بۇۇ تاراپىنان تاعايىندالاتىن «مۇگەدەكتەردىڭ قۇقىعىن قورعاۋشى تۇلعا» دەگەن حالىقارالىق توسبەلگىمەن ماراپاتتالعان.
«ءاربىر قازاقستاندىق ءوز وتانىنىڭ ءوسىپ-وركەندەۋىنە ۇلەس قوسۋعا مىندەتتى جانە ءاربىرىمىزدىڭ قوعامعا تەك جاقسىلىق جاساعان ءىزىمىز قالۋى كەرەك» دەيتىن ومىرلىك ۇستانىمدى تۋ ەتكەن ءلاززات مولدابەكقىزى الداعى سايلاۋدا جەڭىسكە جەتسە, قالالىق ءماسليحات مىنبەرىنەن جارىمجان جانداردىڭ ومىرىنە جاڭاشا لەپ اكەلەتىنىنە سەنىمدى.
قانات ەسكەندىر,
«ەگەمەن قازاقستان».
الماتى.