«اتامەكەن» ۇلتتىق كاسىپكەرلەر پالاتاسىنىڭ تورالقا توراعاسى تيمۋر ق ۇلىباەۆ پەن الماتى قالاسىنىڭ اكىمى باۋىرجان بايبەكتىڭ قاتىسۋىمەن الماتى قالاسى كاسىپكەرلەرىنىڭ ءداستۇرلى ءىى كونفەرەنتسياسىندا بيزنەستىڭ جۇيەلىك پروبلەمالارىن شەشۋ ماسەلەلەرى تالقىلاندى.
وتاندىق بيزنەستىڭ سان ءتۇرلى ماسەلەلەرىن ءسوز ەتكەن بۇل جيىنعا ۇلتتىق بانك توراعاسى دانيار اقىشەۆ, قارجى مينيسترلىگى مەملەكەتتىك كىرىستەر كوميتەتىنىڭ توراعاسى داۋلەت ەرعوجين, «اتامەكەن» ۇلتتىق كاسىپكەرلەر پالاتاسىنىڭ توراعاسى ابىلاي مىرزاحمەتوۆ, سونداي-اق, «بايتەرەك» ۇلتتىق حولدينگى, قارجى جانە دامۋ ينستيتۋتتارى مەن الماتى قالاسىنىڭ شاعىن جانە ورتا بيزنەس سۋبەكتىلەرىنىڭ باسشىلارى قاتىستى.
القالى كەڭەستە بۇگىنگى تاڭدا بيزنەس ارىپتەستىك ءۇشىن ەڭ وزەكتى پروبلەمالاردىڭ ءبىرى – ەكونوميكانىڭ دامۋ ينفراقۇرىلىمىنا قوسىلۋ جانە قولجەتىمدىلىك ماسەلەلەرى كاسىپكەرلەر ءۇشىن ءالى دە الىنباس قامال بوپ تۇرعاندىعى ايتىلدى. ۇلتتىق كاسىپكەرلەر پالاتاسى توراعاسىنىڭ ورىنباسارى نۇرجان التاەۆ كاسىپتىك-تەحنيكالىق ءبىلىم بەرۋدىڭ دامۋى مەن بيزنەستىڭ ساتىپ الۋداعى ءرولى تۋرالى, پالاتا باسشىسىنىڭ ورىنباسارى يۋليا ياكۋپباەۆا قازىرگى نارىق جاعدايىنداعى بيزنەستى جەكەشەلەندىرۋ مەن زاڭداستىرۋ تاقىرىبىندا باياندامالار جاسادى.
ءوز سوزىندە الماتى قالاسى كاسىپكەرلەر پالاتاسىنىڭ ديرەكتورى يۋري تىلەۋمۇراتوۆ كاسىپكەرلەردىڭ قالالىق پالاتاسى الماتى قالاسى بويىنشا ۇنەمى بيزنەستىڭ جۇيەلى ماسەلەلەرىنە ساراپتاما جۇرگىزىپ وتىراتىندىعىن ايتا كەلىپ, وتاندىق بيزنەستىڭ الدىندا تۇرعان نەگىزگى كەدەرگىلەردى اتاپ كورسەتتى. ونىڭ ايتۋىنشا, وسى جىلعى مونيتورينگ جۇرگىزۋ بارىسىندا قالا بويىنشا 3 مىڭنان استام بيزنەس سۋبەكتىلەر قامتىلىپ, قورىتىندىسىندا 1139 كاسىپورىنداردىڭ ناقتى ماسەلەلەرى انىقتالعان, كاسىپكەرلىك سالاسىندا ءجيى كەزدەسەتىن جۇيەلى ماسەلەلەر – وتاندىق ءوندىرۋشىلەردىڭ ءونىمىن وتكىزۋ, قارجى رەسۋرستارىنىڭ قولجەتىمدىلىگى, ساتىپ الۋلار مەن جەرگىلىكتى قامتۋ جۇمىستارى, اكىمشىلىك كەدەرگىلەر, بيزنەستى قولداۋعا ارنالعان مەملەكەتتىك باعدارلامالاردىڭ قولجەتىمدىلىگى, نارىق قاتىناسىندا بولىپ تۇراتىن وزگە دە ماسەلەلەر, سالىق جۇيەسىندە كەزدەسەتىن ءماسەلەلەر دەپ ناقتى 7 توپقا توپتاستىرىلعان.
انىقتالعان ماسەلەلەرگە وراي ۇلتتىق كاسىپكەرلەر پالاتاسىنىڭ وسى پروبلەمالاردى شەشۋ بويىنشا بىرقاتار ۇسىنىستار ءازىرلەگەنىن جەتكىزدى.
باۋىرجان بايبەك الماتى قالاسى ەلىمىزدەگى بيزنەستىڭ ورتالىعى جانە وتاندىق كاسىپكەرلەرگە قالادا مەيلىنشە جايلى جاعداي تۋدىرۋ كۇن تارتىبىنەن ءتۇسپەيتىن ماسەلە ەكەندىگىن ايتا كەلە, قازىرگى تاڭدا رەسپۋبليكا بويىنشا جۇرگىزىلىپ وتىرعان جەكەشەلەندىرۋدىڭ ەكىنشى لەگى بيزنەستى دامىتۋدا ۇلكەن ءرول اتقاراتىندىعىن دا جەتكىزدى.
بۇدان وزگە اتالمىش جيىندا ۇلتتىق كاسىپكەرلەر پالاتاسى تاراپىنان باسقا دا ۇسىنىستار ايتىلدى. ولاردىڭ ىشىندە شاعىن جانە ورتا بيزنەستىڭ اينالىمدىق قاراجاتىن قارجىلاندىرۋ جانە ۆاليۋتالىق قارىزدارىن قايتا قارجىلاندىرۋدى ۇسىنۋ, ۇلتتىق بانككە ەكىنشى دەڭگەيلى بانكتەرگە بىرىڭعاي مولشەرلەمە بويىنشا قىسقا مەرزىمدى وتىمدىلىكتى جۇزەگە اسىرۋ مۇمكىندىگىن بەرۋ, سونىمەن بىرگە, پايىزدىق مولشەرلەمەنى سۋبسيديالاۋ, «بيزنەستىڭ جول كارتاسى-2020» باعدارلاماسى بويىنشا بولىنەتىن بيۋدجەتتىك قاراجات كولەمىن ارتتىرۋ جاعى ۇسىنىلدى.
قانات ەسكەندىر,
«ەگەمەن قازاقستان».
الماتى.