ەگەر ورىس ادەبيەتىندە «ءبارىمىز دە گوگولدىڭ شينەلىنەن شىقتىق» دەگەن قاناتتى ءسوز بار بولسا, قازىرگى قازاق دەرەكتى كينوسىندا ەڭبەك ەتىپ جۇرگەن جاستاردىڭ بارلىعى سول وراز ابىشەۆتىڭ «شەكپەنىنەن» شىقتى دەپ ايتۋعا بولادى. بۇلاي دەيتىنىم, بۇل كىسىدەن تىكەلەي ءدارىس الۋ مىندەتتى ەمەس. بىراق, نەگىزىن قالاپ بەرىپ, اۋىرعا ارقاسىن توسقان وراز سەكىلدى اقساقالعا قازاقتىڭ جاس كينوگەرلەرىنىڭ بارلىعى ءتانتى...
بۇل اكىم ءتارازيدىڭ پايىمدى پىكىرى. دەگەنمەن, وراز ابىشەۆتى تانيتىن ءيسى قازاقتىڭ ءبارى وسى ويمەن تولىقتاي قوسىلادى دەپ سەنەمىن. قازاقستان دەرەكتى كينوسىنىڭ ىرگەتاسىن قالاپ, نەگىزىن سالعان, قازاق كسر-ءنىڭ حالىق ءارتىسى, قازاقستان مەملەكەتتىك سىيلىعىنىڭ يەگەرى وراز ابىشەۆ ءوزىنىڭ بۇكىل عۇمىرىن, سانالى ءومىرىن وسى سالاعا ارنادى. ول كىسى ءوزىنىڭ عيبراتتى عۇمىرىندا جەتپىسكە جۋىق دەرەكتى فيلم مەن ءۇش جۇزدەن استام كينوجۋرنالدار شىعارىپ ۇلگەرگەن. كەشە قازاق ۇلتتىق ونەر ۋنيۆەرسيتەتىندە تۇعىرلى تۇلعانى ۇمىتپاۋ, كەرىسىنشە ۇلىقتاۋ ماقساتىندا وراز ءابىشەۆ اتىنداعى شاكىرتاقىنى تابىستاۋ ءراسىمى بولىپ ءوتتى. ىرىكتەۋدەن ىركىلمەي ءوتىپ, وقۋىندا وزات بولعان ءۇش وقۋشى وسى ستەپەندياعا يە بولدى. ولاردىڭ قاتارىندا, اتالمىش وقۋ ورنىنىڭ رەجيسسەر ماماندىعىنىڭ 4-كۋرس ستۋدەنتى رامازان حاليوللا, انار مەرگەنباەۆا جانە وپەراتور ونەرى ماماندىعىنىڭ 3-كۋرس ستۋدەنتى داۋلەت رىسقۇلوۆ بار. قانات ابىشەۆتىڭ دەمەۋشىلىگىمەن باستاۋ العان بۇل شارا اياسىندا ناۋرىز ايىنىڭ باسىندا وراز ابىشەۆتىڭ شىعارماشىلىعىنا قاتىستى كونفەرەنتسيا جوسپارلانىپ وتىر.
راۋان قايدار,
«ەگەمەن قازاقستان».