تالدىقورعاندا الماتى وبلىسى اكىمىنىڭ ءبىرىنشى ورىنباسارى ماحاببات بيگەلديەۆتىڭ توراعالىعىمەن قۇقىق بۇزۋشىلىقتىڭ الدىن الۋدىڭ العاشقى قادامى – جاريالىلىققا جارقىن جول اشۋ ماقساتىندا جيىن بولدى. نەگىزى ىشكى ىستەر ورگاندارى جۇمىسىن باقىلاپ جانە اشىقتىقتى قامتاماسىز ەتۋ ماقساتىندا ەلباسى باس پروكۋراتۋراعا ەلىمىزدە جاسالاتىن بارلىق قىلمىستىق قۇقىق بۇزۋشىلىقتى بەلگىلەيتىن «قۇقىق بۇزۋشىلىق كارتاسى» اتتى ينتەرنەت-پورتال قۇرۋ جونىندە تاپسىرما بەرگەن بولاتىن. بۇل شارانى اتقارۋ ۇلت جوسپارىنىڭ 32-قادامىندا ناقتىلانعان. وندا باس پروكۋراتۋرانىڭ وكىلەتتى ورگانى قۇقىقتىق ستاتيستيكا جانە ارنايى ەسەپكە الۋ كوميتەتى ۆەدومستۆوارالىق ارەكەتتەردەگى اقپاراتتىق جۇيەنى ورتالىقتاندىرۋدا جاۋاپتى اتقارۋشى بولىپ انىقتالعان.
سونىمەن, جاسالعان قىلمىس تۋرالى فاكت, قۇقىق بۇزۋشىلىق جونىندەگى حابارلاما مەن ارىز رەەسترعا ەنىپ جانە تىركەلگەن سوڭ نەبارى 3-4 مينۋتتا جاعرافيالىق كارتادا جاريالانادى. بۇگىنگى تاڭدا «قىلمىستىق كارتا» قىزمەتى بارلىق وبلىس ورتالىقتارى, الماتى, استانا قالالارى جانە 20 مونوقالادا كورسەتىلەدى. كارتا قۇقىقتىق ستاتيستيكا جانە ارنايى ەسەپكە الۋ كوميتەتىنىڭ سايتىندا قولجەتىمدى. قىلمىستىڭ وشاعىن جىلدام بەلگىلەپ, الدىن الۋ ءۇشىن كارتا ءبىرىنشى كەزەكتە ىشكى ىستەر ورگاندارىنا, اكىمدەرگە, ءبىلىم بەرۋ مەكەمەلەرىنە پايدالى بولادى. قازىر كەز كەلگەن وبلىستاعى جالپى قىلمىس سانىن, 10 مىڭ تۇرعىنى بار ەلدى مەكەندەگى قىلمىس دەڭگەيىن ءاپ-ساتتە بىلۋگە بولادى. بۇل اقپاراتتىق قىزمەتتى ينتەرنەت جەلىسى بار ءار ادام پايدالانا الادى. وبلىس ورتالىعىنداعى كارتادان ءار ادام قىلمىستى قاي كوشەدە, قاي ۇيدە جاسالعانىن دا بىلە الادى.
نۇربول الدىباەۆ,
«ەگەمەن قازاقستان».
تالدىقورعان.