س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە ستۋدەنتتەر مەن وقىتۋشىلاردىڭ قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي حالىق قاھارمانى, عارىشكەر, «قازاقستان عارىش ساپارى» ۇك» اق ۆيتسە-پرەزيدەنتى ايدىن ايىمبەتوۆپەن كەزدەسۋى ءوتتى.
ءىس-شارا ماقساتى جاستاردى وتانسۇيگىشتىك رۋحتا تاربيەلەپ, ازاماتتىق جاۋاپكەرشىلىكتى سەزىندىرۋ, تاۋەلسىز قازاقستان جەتىستىكتەرىنىڭ ءبىرى – عارىش كەڭىستىگىن يگەرۋدىڭ بەسىنشى عىلىمي باعدارلاماسىمەن تانىستىرۋ بولدى.
ۋنيۆەرسيتەت رەكتورى اقىلبەك كۇرىشباەۆ قۇتتىقتاۋ ءسوزىندە وقۋ ورنىنىڭ تابىستارىنا توقتالىپ, قازاق عارىشكەرى ءوز ساپارىن جاھاندىق ساۋالدارعا جاۋاپ ىزدەپ, ەلىمىزدىڭ عارىش سالاسىن دامىتۋعا ارناعاندىعىن اتاپ ءوتتى.
ا.ايىمبەتوۆ ءوز اڭگىمەسىندە عارىش ساپارىنىڭ قالاي ءوتكەندىگىن ءسوز ەتىپ, قازاقستان عالىمدارى دايىنداعان عارىشتىق تەحنولوگيالار مەن تاجىريبەلەرگە توقتالدى. عارىشتىق تەحنولوگيا جەتىستىكتەرىنىڭ كۇندەلىكتى ءتىرشىلىگىمىزگە قالاي ەنە باستاعانىن, قازاقستاننىڭ عارىشكەرلەر سانى جاعىنان الەمدە توعىزىنشى ورىنعا شىققاندىعىن, ەلىمىزدىڭ عارىش كەڭىستىگىن يگەرۋ مۇمكىندىكتەرى زور ەكەنىن, بولاشاقتا دا ءوزىنىڭ بار كۇشىن سوعان ارنايتىنىن ايتتى.
كەزدەسۋ بارىسىندا ستۋدەنتتەر وزدەرىن قىزىقتىرعان سۇراقتارىن قويىپ, ءتۇرلى جايتتارعا قانىقتى. كەش سوڭىندا عارىشكەر ۋنيۆەرسيتەتتىڭ سىيلى قوناقتارعا ارنالعان العىس كىتابىنا قولتاڭباسىن قالدىردى.
«ەگەمەن-اقپارات».