ەلىمىزدىڭ «گەولوگيالىق بارلاۋ جۇمىستارىنىڭ, مينەرالدى رەسۋرستار مەن مينەرالدى قورلاردىڭ ناتيجەلەرى تۋرالى جاريا ەسەپتىلىكتىڭ قازاقستاندىق قاۋىمداستىعى» زاڭدى تۇلعالار بىرلەستىگى بيىل CRIRSCO مۇشەسى اتانادى. بۇل تۋرالى كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن كەزەكتى ءباسپاسوز ءماسليحاتىندا ينۆەستيتسيالار جانە دامۋ مينيسترلىگىنىڭ گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباەۆ ءمالىم ەتتى.
كوميتەت توراعاسى جەر قويناۋىن پايدالانۋ سالاسىندا ازىرلەنىپ جاتقان رەفورمالار باسەكەگە قابىلەتتىلىكتى ارتتىرۋعا جانە قازاقستاندا كومپانيالار مەن ينۆەستورلارعا قولايلى جاعداي جاساۋعا باعىتتالعانىن اتاپ ءوتتى. قىسقاشا KAZRC قاۋىمداستىعى دەپ اتالاتىن بۇل بىرلەستىكتىڭ حالىقارالىق ۇيىمعا مۇشە بولۋى ەلباسىنىڭ «100 ناقتى قادام» ۇلت جوسپارىنداعى «قاتتى پايدالى قازبالار قورى تۋرالى ەسەپ بەرۋدىڭ حالىقارالىق ستاندارتتار جۇيەسىن ەنگىزۋ تۋرالى» 74-قادامىن ىسكە اسىرۋ بارىسىندا جۇزەگە اسۋدا. ال وتكەن جىلدان باستاپ ەلىمىزدە CRIRSCO بىرىڭعاي ۇلگىسى نەگىزىندە ستاندارتتاردى ازىرلەۋ ۇدەرىسى باستالعان بولاتىن. ۇلت جوسپارىن جۇزەگە اسىرۋ اياسىندا ىسكە قوسىلعان CRIRSCO جوباسى اقپاراتتىڭ شىنايى ءارى سەنىمدىلىگىنە كەپىلدىك بەرەدى. سونداي-اق, بۇل جوبا كومپانيالار ءوز جوبالارى تۋرالى گەولوگيالىق جانە تەحنيكالىق اقپاراتتى كوپشىلىككە قالاي جاريالاۋى ءتيىس ەكەنىن كوپتەگەن ستاندارتتار نەگىزىندە بەلگىلەپ بەرەدى. ول ينۆەستورلارعا بەرىلەتىن اقپاراتتىڭ بارىنشا شىنايى ءارى سەنىمدى بولۋىن قاداعالايدى.
مينەرالدى رەسۋرستار جانە مينەرالدى قازبالار بولىگىندە قازىرگى ۋاقىتتا قازاقستاندا CRIRSCO حالىقارالىق كوميتەتىنىڭ تالاپتارىنا سايكەس قۇجاتتار دايىندالۋدا. ونىڭ ىشىندە گەولوگيالىق بارلاۋ جۇمىستارىنىڭ, مينەرالدى رەسۋرستار مەن مينەرالدى قورلاردىڭ ناتيجەلەرى تۋرالى جاريا ەسەپتىلىكتىڭ كودەكسى (KAZRC كودەكسى), قازاقستاننىڭ ەسەپتىلىك ستاندارتتارىن CRIRSCO جۇيەسى بويىنشا حالىقارالىق ستاندارتتارعا ۇيلەستىرۋ جونىندەگى باسشىلىق, ساراپشىنىڭ كاسىبي ەتيكاسى كودەكسى, «تاۋەلسىز ساراپشىلار مەن ساراپشىلار توپتارىن تارتۋ, جەر قويناۋىنا تاۋەلسىز ساراپتاما جۇرگىزۋ ءارى ولاردىڭ قىزمەتتەرىنە اقى تولەۋ ءتارتىبى», «گەولوگيالىق بارلاۋ جۇمىستارىنىڭ, مينەرالدى رەسۋرستار مەن مينەرالدى قورلاردىڭ ناتيجەلەرى تۋرالى جاريا ەسەپتىلىكتىڭ قازاقستاندىق قاۋىمداستىعى» زاڭدى تۇلعالار بىرلەستىگىنىڭ جارعىسى (KAZRC جارعىسى) بار.
ب.نۇراباەۆتىڭ ايتۋىنشا, قازاقستاندىق ستاندارتتاردى CRIRSCO ۇيىمىنىڭ ستاندارتتارىمەن سايكەس ەتۋ ماقساتىندا شەتەلدىك جانە وتاندىق ساراپشىلاردى تارتۋ جانە تاۋەلسىز ساراپتاما قىزمەتىن جۇرگىزۋ كوزدەلۋدە.
قازاقستاندا CRIRSCO ءبىرىڭعاي ۇلگىسىنىڭ نەگىزىندە ستاندارتتاردى ازىرلەۋ ۇدەرىسى 2014 جىلدان باستالدى. ناتيجەسىندە 2015 جىلعى قاڭتاردا «جەر قويناۋى جانە جەر قويناۋىن پايدالانۋ تۋرالى» زاڭعا ءوزگەرىستەر كۇشىنە ەنگەن بولاتىن. قابىلدانعان تۇزەتۋلەر جەر قويناۋىن پايدالانۋشىلار جۇمىسىنداعى كەدەرگىلەردى الىپ تاستاۋعا, سالالىق قۇقىقتىق بازانى جەتىلدىرۋگە, ينۆەستيتسيالىق احۋالدى جاقسارتۋعا جانە سالاعا تىكەلەي شەتەلدىك ينۆەستيتسيالار تارتۋعا باعىتتالعان.
پايدالى قازبالار قورلارى جونىندەگى حالىقارالىق ستاندارتتارعا كوشۋ قازاقستاننىڭ كەن ءوندىرۋشى ونەركاسىبىنىڭ ينۆەستيتسيالىق تارتىمدىلىعىن ارتتىرۋ ءۇشىن اسا ماڭىزدى جاعداي بولىپ وتىر. كەن ورىندارىن بارلاۋ جانە يگەرۋ جوبالارىنداعى ينۆەستيتسيالىق تاۋەكەلدەر جوعارى بولعاندىقتان ينۆەستورلاردىڭ رەسۋرستار مەن قورلاردىڭ دۇرىستىعىنا قوياتىن تالاپتارى دا وتە قاتاڭ. بيرجالار مەن بانكتەر كەن ءوندىرۋشى جانە گەولوگيالىق بارلاۋ كومپانيالارىنىڭ قىزمەتى مەن ەسەپ بەرۋلەرى حالىقارالىق ستاندارتتارعا سايكەس بولعان كەزدە عانا ولارعا سەنىم ارتادى. سول ءۇشىن دە ءبىزدىڭ ەلدىڭ گەولوگتارى حالىقارالىق تالاپتار ۇدەسىنەن شىعۋعا ۇمتىلىپ وتىر.
«ءبىز CRIRSCO حالىقارالىق كوميتەتىنە KAZRC-ءنىڭ مۇشەلىك ەتۋى جونىندە ءوتىنىشتى جولدادىق. ول قۇجاتتار قابىلداندى. ەندى استانادا ماۋسىم ايىندا وتەتىن امم-2016 فورۋمى اياسىندا ارنايى سەسسيا بولادى دەپ جوسپارلاپ وتىرمىز. CRIRSCO كوميتەتىنىڭ بارلىق مۇشەلەرىنە شاقىرتۋ جولدادىق, ولاردىڭ بارلىعى استاناعا كەلەتىندىكتەرىن حابارلادى. KAZRC قاۋىمداستىعى بيىل ماۋسىم ايىندا CRIRSCO كوميتەتىنىڭ تولىققاندى مۇشەسى اتانادى دەپ جوسپارلاپ وتىرمىز», دەدى ب.نۇراباەۆ.
دينارا بىتىكوۆا,
«ەگەمەن قازاقستان».