كەشە «اۋىل» حالىقتىق-دەموكراتيالىق پاتريوتتىق پارتياسى سايلاۋ ناۋقانىنا دايىندىقتارىن پىسىقتاۋ ماقساتىندا ايماقتىق فيليالدارىمەن ونلاين-كونفەرەنتسيا وتكىزدى.
«اۋىل» پارتياسىنىڭ رەسپۋبليكالىق جانە ايماقتىق شتابتارى سايلاۋ ناۋقانىنا دايىندىق جۇمىستارىن كۇشەيتە ءتۇستى. سونىڭ ءبىر كورىنىسى رەتىندە وسى ونلاين-كونفەرەنتسيانىڭ ۇيىمداستىرىلۋىن ايتساق بولادى.
شارا بارىسىندا پارتيانىڭ رەسپۋبليكالىق قوعامدىق شتابىنىڭ جەتەكشىسى رۇستەم جولامان «سايلاۋ تۋرالى» زاڭنىڭ نەگىزگى تالاپتارىن جانە ونىڭ پارلامەنت ءماجىلىسى دەپۋتاتتارىن سايلاۋعا قاتىستى باپتارىن ەلەكتورالدى ناۋقان كەزىندە قانداي دا ءبىر زاڭ بۇزۋشىلىق ورىن الماۋى ءۇشىن ايماقتىق شتاب باسشىلارى مەن مۇشەلەرىنە ءتۇسىندىرىپ بەردى. اسىرەسە, ول الدىن الا جۇرگىزىلەتىن ۇگىت-ناسيحات جۇمىستارىنا قاتىستى زاڭنامالىق شەكتەۋلەرگە, سونىمەن قاتار, ۇگىت-ناسيحات كورنەكىلىكتەرىن ورنالاستىرۋ, تاراتۋ تالاپتارىنا باسا نازار اۋداردى.
ءوز كەزەگىندە «اۋىل» پارتياسى توراعاسىنىڭ ءبىرىنشى ورىنباسارى تولىمبەك عابدىلاشىموۆ سايلاۋالدى ۇگىت-ناسيحات ناۋقانىنا قاتىستى ۇيىمنىڭ دايىندىق بارىسى تۋرالى ءسوز ەتتى. ونىڭ ايتۋىنشا, سايلاۋالدى ۇگىت-ناسيحات ناۋقانىنا دايىندىق قىزۋ جۇرگىزىلۋدە. قازىرگى ۋاقىتتا بارلىق ءوڭىردىڭ دايىندىعى پىسىقتالىپ, ءار وبلىس ورتالىعىندا اشىلعان شتابپەن بايلانىس كۇشەيتىلگەن. سونىمەن قاتار, ول جەرگىلىكتى فيليالدار جۇمىسىنىڭ كۇندەلىكتى ەسەبى الىنىپ وتىراتىنىن, ءاربىر وڭىرلىك شتابتا ازاماتتاردى قابىلداپ, ولاردى قىزىقتىرعان ماسەلەلەرگە جاۋاپ بەرەتىن قوعامدىق قابىلداۋلار جۇمىس ىستەيتىنىن جەتكىزدى.
بۇدان كەيىن رەسپۋبليكالىق شتاب باسشىلىعى وزدەرىن تولعاندىرىپ جۇرگەن سۇراقتارىن قويعان ايماقتاعى فيليالدار وكىلدەرىنە ونلاين بايلانىس ارقىلى ءتيىستى جاۋاپتارىن بەردى.
سونىمەن بىرگە, ونلاين-كونفەرەنتسيادا سەنiم بىلدىرىلگەن ادامداردى تiركەۋ, ۇگiت-ناسيحات توپتارىن قالىپتاستىرۋ جانە باسقا دا قاجەتتى شارالاردى ۇيىمداستىرۋ تۋرالى ايتىلدى.
جولدىباي بازار,
«ەگەمەن قازاقستان».