كەشە استانادا قازاقستان رەسپۋبليكاسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا مۇشەلەرىنىڭ (سبرقك) «بىرلىك» پارتياسى سايلاۋالدى شتابىنىڭ وكىلدەرىمەن كەزدەسۋى بولدى.
كەزدەسۋگە قاتىسۋشىلار اعىمداعى سايلاۋ ناۋقانىنا بايلانىستى ماسەلەلەردىڭ كەڭ اۋقىمىن تالقىلادى. ۇنقاتىسۋ شەڭبەرىندە سبرقك مەن «بىرلىك» پارتياسى سايلاۋالدى شتابىنىڭ اراسىندا سىندارلى ءوزارا ءىس-قيمىل ورناتۋ ماسەلەسىنە باسا نازار اۋدارىلدى.
سبرقك توراعاسى نۇرلان ەرىمبەتوۆ ءوزىنىڭ سوزىندە ترانسپارەنتتى جانە ءادىل سايلاۋدى, ازاماتتاردىڭ ەركىن تاڭداۋ جاساۋلارىن, بارلىق سايلاۋ ۇدەرىسىنە قاتىسۋشىلاردىڭ قۇقىقتارىن ساقتاۋدىڭ, زاڭ بويىنشا بەلگىلەنگەن راسىمدەردىڭ ورىندالۋىن قامتاماسىز ەتۋدىڭ ماڭىزى اسا زور ەكەنىنە توقتالدى:
– كوميسسيا قۇرىلىپ, ءوز ءمىندەتىن اتقارۋعا كىرىسكەن جىلدار بەدەرىندە ۇلكەن ءتاجىريبە جيناقتالدى, ءبىزدىڭ ۇسىنىمدامالارىمىز قازاقستانداعى سايلاۋ ۇدەرىستەرىن جەتىلدىرۋگە وڭ ىقپال ەتتى. تۇتاستاي العاندا, سبرقك قىزمەتى مەن باسقا دا بايقاۋشىلىق ميسسيالارى ەلەكتورالدى ۇدەرىستەرگە سۇبەلى ۇلەس قوسىپ, حالىقتىڭ ساياسي-قۇقىقتىق مادەنيەتىن جوعارىلاتۋعا وڭ اسەرىن تيگىزىپ كەلەدى, – دەدى ن.ەرىمبەتوۆ.
سبرقك مۇشەسى امانقۇل سەرىكباەۆتىڭ سوزىنە قاراعاندا, سايلاۋ ناۋقانىنىڭ بارلىق كەزەڭدەرى ۇزاق مەرزىمدى بايقاۋمەن قامتىلاتىن بولادى.
– بايقاۋ شارالارىن بۇكىل رەسپۋبليكا بويىنشا ءار سايلاۋ ۋچاسكەسىندە جۇزەگە اسىرۋ جوسپارلانىپ وتىر. ءبىزدىڭ جۇمىسىمىزدىڭ باستى قاعيداتى – اشىقتىق, ادىلەتتىلىك, باسەكەگە قابىلەتتىلىك جانە زاڭدىلىق, – دەدى ا.سەرىكباەۆ.
«بىرلىك» پارتياسى توراعاسىنىڭ ورىنباسارى بولات بايقاداموۆ وزدەرىنىڭ پارتياسى پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارى ۇدەرىستەرىنە العاش رەت قاتىسىپ وتىرعانىن اتاپ كورسەتە كەلىپ, وسى سەبەپتى, پارتيا ءۇشىن سبرقك-مەن ءوزارا ىنتىماقتاسۋ جانە ءوزارا ءىس-قيمىل تانىتۋ قۇندى مۇمكىندىك ەكەنىن جاريا ەتتى:
– «بىرلىك» پارتياسى مەن ءبىزدىڭ دەپۋتاتتىققا كانديداتتارىمىز سالماقتى دا اشىق جۇمىسقا يەك ارتىپ وتىر. ءبىز تاۋەلسىز قوعامدىق بايقاۋ سەكىلدى وسىنشالىقتى ماڭىزدى ميسسيانى جۇزەگە اسىراتىن سايلاۋدى بايقاۋ جونىندەگى رەسپۋبليكالىق قوعامدىق كوميسسيامەن ىنتىماقتاستىعىمىزدى قۋانا قولدايمىز, – دەدى ب.بايقاداموۆ.
ساۋلەبەك ءبىرجان.
استانا.