قازىر داعدارىس تۋرالى سوزدەر كوپ ايتىلادى. ول ءبىر سۋىت الەم سەكىلدى جۇرتتىڭ تالابىن كەيىن قايتارىپ, ەڭسەسىن باسىپ تاستايتىنداي كورىنەدى. مەنىڭ ويىمشا, داعدارىستان بۇلاي جاسقانۋدىڭ كەرەگى جوق. ءبىزدىڭ ەلدىڭ ەكونوميكاسى الەمدىك ەكونوميكانىڭ ءبىر بولشەگى, سوندىقتان دۇنيەجۇزىلىك قارجى جانە ساياسي داعدارىستاردىڭ وعان ىقپالى بولعانىمەن دە, اركىم ىشكى مۇمكىندىكتەردى بارىنشا بىلىمدىلىكپەن پايدالانسا, تەك دامي تۇسەتىنىمىز انىق. ەلباسى نۇرسۇلتان نازارباەۆ ءوزىنىڭ جولداۋلارىندا جانە «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا, «نۇر وتان» پارتياسىنىڭ كەزەكتەن تىس حVII سەزىندە سويلەگەن سوزىندە دامۋدىڭ جولدارىن سوقىرعا تاياق ۇستاتقانداي ەتىپ, بەس ينستيتۋتتىق رەفورمانى جۇزەگە اسىرۋدىڭ ءار ناقتى قادامىنا تالداۋ جاساپ بەردى. ەڭ باستىسى, ءىس ىستەيمىن دەگەنگە مەملەكەت تاراپىنان كومەك-قولداۋ بار. بۇل ەلباسى ايتقان «100 ناقتى قادامنىڭ» جۇزەگە اساتىنىنا, بولاشاققا سەنىم ۇيالاتا تۇسەدى.
مەن قوستانايداعى ا.بايتۇرسىنوۆ اتىنداعى مەملەكەتتىك ۋنيۆەرسيتەتىن اۋديت جانە ەسەپ ماماندىعى بويىنشا بىتىرگەننەن كەيىن «قوستاناي مينەرالدارى» اكتسيونەرلىك قوعامىنا قىزمەتكە تۇردىم. وسىندا قىزمەت ىستەي ءجۇرىپ, مەنى جەكە بيزنەسىمدى اشسام دەگەن وي مازالاي بەرەتىن. ول اينالامىزداعى ەكولوگيانىڭ ساقتالۋىنا ۇلەس قوسسام دەگەن ويدان ورىستەگەن ەدى. قازىر پوليەتيلەننەن جاسالعان ىدىستار وتە كوپ, ءومىرىمىزدى «جاۋلاپ» الدى دەسە دە بولادى. وكىنىشتىسى, بوساعان پوليەتيلەن ىدىستار مەن قالتالار اينالانى لاستاپ بولدى. ەكولوگيالىق تازالىق الەمدىك وزەكتى ماسەلەگە اينالعالى قاشان. پوليەتيلەن قالدىقتارىنان قۇتىلۋدىڭ جولى ونى وندىرىسكە پايدالانۋ ەكەنى از ايتىلىپ جۇرگەن جوق.
مەن وسى پوليەتيلەن ىدىستاردى پايداعا قالاي اسىرۋ كەرەك دەگەن ساۋالمەن رەسەيدەگى وسى ماقساتتا جۇمىس جاساپ جاتقان ارىپتەستەرگە دە باردىم. زەرتتەدىم, ەكونوميكالىق شىعىندارىن ەسەپتەدىم. ارينە, ءىس باستاۋ ءۇشىن قارجى كەرەك. بيزنەس جوبامدى جاساپ, ءتيىستى ورىندارعا ۇسىندىم. جوبا بويىنشا زاماناۋي تەحنولوگيانى پايدالانا وتىرىپ, مەن بوساعان پوليەتيلەن ىدىستار مەن كادىمگى توپىراق قوسپاسىنان كۇندەلىكتى تۇرمىسقا, وندىرىسكە, قۇرىلىسقا قاجەتتى بۇيىمدار جاساپ شىعارۋعا تاۋەكەل ەتتىم. مەن سۇراعان 3 ميلليون تەڭگەمدى گرانت ارقىلى ۇتىپ الدىم. شىنىمدى ايتسام, قۋانىشىمدا شەك جوق. العان قاراجاتتىڭ بارلىعىن دا پوليمەر-قۇم ءونىمىن شىعاراتىن قۇرىلعى ساتىپ الۋعا جۇمسادىم. قازىر جىتىقارادا مەنىڭ بولاشاق ءوندىرىسىمنىڭ عيماراتى, جابدىقتاردى ورنالاستىرۋ, قۇراستىرۋ ساتىسى ءجۇرىپ جاتىر. ءبىز ۇستىمىزدەگى جىلدىڭ جاز ايلارىنان باستاپ ءونىم شىعارا باستايتىن بولامىز. ءبىزدىڭ «ەكوپوليمەر» كاسىپورنىمىز شىعاراتىن جول جاعاسىنا ءتوسەيتىن پليتالار, برۋسچاتكالار, دەكوراتيۆتى البارلار, شاتىرلار, البارلاردىڭ بەدەرلەرى, كاناليزاتسيا قۇبىرلارىنا ارنالعان قاقپاقتار, تاعى باسقا دا بۇيىمدار نارىقتا سۇرانىسقا يە بولارىنا سەنىمدىمىن. مەن مەملەكەتىمنىڭ قولداۋى ارقاسىندا وسىنداي جاقسى ءىس باستاۋىما مۇمكىندىك الدىم. ونى دامىتىپ اكەتۋ وزىمە بايلانىستى.
قايرات مۇقاتوۆ,
«ەكوپوليمەر» جەكەمەنشىك كاسىپورنىنىڭ جەتەكشىسى.
قوستاناي وبلىسى,
جىتىقارا قالاسى.