● رەسپۋبليكامىزدا اۋىل شارۋاشىلىعى ماقساتىنداعى جەرلەردى الۋ جەڭىلدەتىلەدى. ۇلتتىق ەكونوميكا مينيسترلىگىنىڭ حابارلاۋىنشا, ەندى ەلىمىزدەگى كاسىپكەرلەر جەرلەردى كاداسترلىق قۇنىنىڭ 50 پايىزدىق جەڭiلدiك باعامەن 10 جىلعا دەيىن ءبولىپ تولەۋ ارقىلى جالعا الۋعا بولادى. سونىمەن قاتار, شەتەلدىك كومپانيالارعا جەردى جالعا بەرۋ مەرزىمى 10 جىلدان 25 جىلعا دەيىن ۇزارتىلدى.
● ەلىمىزدە جالعا بەرىلەتىن تۇرعىن ۇيلەردىڭ سالىعى ءتومەندەتىلدى. بۇل «قازاقستان يپوتەكالىق كومپانياسى» اكتسيونەرلىك قوعامىنىڭ جەلىسى بويىنشا جۇزەگە اسىرىلدى. جالپى, اتالعان كومپانيا 2020 جىلعا دەيىن وڭىرلەردى دامىتۋ باعدارلاماسى اياسىندا «جالدامالى تۇرعىن ءۇي» جوباسىنىڭ باستى وپەراتورى.
● وتكەن جىلى ەلىمىزدىڭ وقۋشىلارى ءبىلىم باسەكەسىنەن 1300-دەن استام مەدال جەڭىپ العان. دارىندى شاكىرتتەر ءبىر جىلدا 30-عا جۋىق حالىقارالىق ءبىلىم دوداسىنا قاتىسىپ, 276 التىن, 384 كۇمىس, 629 قولا مەدال, 20 گراموتا يەلەنگەن. سونداي-اق, ءبىلىم جانە عىلىم مينيسترلىگى بيىلعى جىلى دا وقۋشىلار ءتۇرلى حالىقارالىق جارىستاردا توپ جارادى دەپ بولجاپ وتىر.
● استانادا 2015 جىلى 43 تۇرعىن ءۇي كۇردەلى جوندەۋدەن ءوتتى. قالا اكىمىنىڭ ورىنباسارى قوسمان ايتمۇحامەتوۆتىڭ ايتۋىنشا, استانادا ايماقتاردى دامىتۋدىڭ 2020 جىلعا دەيىنگى باعدارلاماسى شەڭبەرىندە 14 ۇيدە 26 ليفت جاڭالانىپ, 5 ءۇيدىڭ شاتىرى جوندەۋدەن وتكەن. سونداي-اق, 17 كوپقاباتتى تۇرعىن ۇيدە 31 ليفت اۋىستىرىلعان.
● الماتىدا پوليتسەيلەر جول اپاتىنا تۇسكەندەردىڭ ءومىرى ءۇشىن قان تاپسىردى. بۇل «مىڭ يگى ءىس» اكتسياسى اياسىندا جۇزەگە استى. المالى اۋدانىنىڭ ءتارتىپ ساقشىلار «ادام ءومىرىن اراشالاۋعا ءوز ۇلەسىمىزدى قوسۋ ءۇشىن دونور بولۋ ءبىزدىڭ ازاماتتىق پارىزىمىز», – دەيدى.
● وڭتۇستىك قازاقستان وبلىسىندا 9 قاباتتى تۇرعىن ءۇي كەشەنىنىڭ قۇرىلىسى باستالدى. جوسپار بويىنشا 48 پاتەردەن تۇراتىن 9 قاباتتى ەكى ءۇي سالىنۋ كەرەك. اتالعان جوبانى «شىمكەنت» الەۋمەتتىك-كاسىپكەرلىك كورپوراتسياسى اكتسيونەرلىك قوعامى مەن «وڭتۇستىك قۇرىلىس سەرۆيس» سەرىكتەستىگى بىرلەسىپ جۇزەگە اسىرماقشى.
● جامبىل وبلىسىندا «بەيبىتشىلىك پەن جاسامپازدىقتىڭ 25 جىلى» اتتى فلەشموب ءوتتى. شارادا 100-گە جۋىق جاس «قارا جورعا» انىنە بيلەپ, پاتريوتتىق سەزىمدى ارتتىراتىن شوۋ كورسەتتى. جالپى, اكتسيانىڭ ماقساتى – ەگەمەن ەلىمىزدەگى وتانسۇيگىشتىك سەزىمدى ەسەلەۋ, بەيبىتشىلىك, كەلىسىم, قوعامنىڭ بىرلىگى, ەكونوميكالىق جانە الەۋمەتتىك تۇراقتىلىقتى نىعايتۋ بولىپ تابىلادى.
● اقمولا وبلىسى ستەپنوگور قالاسىنداعى الەۋمەتتىك جاعىنان از قامتىلعان توپتارعا ارەندالىق باسپانا بەرىلمەكشى. وسى ورايدا قالا اكىمدىگىندە بيزنەستىڭ الەۋمەتتىك جاۋاپكەرشىلىگى اياسىندا اتالعان توپتار ءۇشىن قولايلى جاعدايلار جاساۋ تۋرالى مەموراندۋمعا قول قويىلدى. ايتا كەتەيىك, بۇگىندە بىرنەشە تۇرعىن ۇيلەردە الەۋمەتتىك از قامتىلعان وتباسىلار باسپاناعا قول جەتكىزگەن.
حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «24kz» تەلەارناسىنىڭ دەرەكتەرى بويىنشا دايىندالدى.