كەشە قازاقستان رەسپۋبليكاسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا مۇشەلەرى (سبرقك) «نۇر وتان» پارتياسىنىڭ سايلاۋالدى شتابىندا بولىپ, ونىڭ وكىلدەرىمەن كەزدەستى.
كەزدەسۋگە سبرقك توراعاسى نۇرلان ەرىمبەتوۆ پەن كوميسسيا مۇشەلەرى جابايحان ءابدىلدين, كامال بۇرحانوۆ, امانقۇل سەرىكباەۆ, تامارا شيرمەر, «نۇر وتان» پارتياسى توراعاسىنىڭ ءبىرىنشى ورىنباسارى – «نۇر وتان» پارتياسى سايلاۋالدى شتابىنىڭ جەتەكشىسى اسقار مىرزاحمەتوۆ, «نۇر وتان» پارتياسىنىڭ حاتشىلارى فارحاد قۋانعانوۆ پەن قانىبەك جۇماشەۆ قاتىستى.
كەزدەسۋ كەزىندە ەلەكتورالدى ناۋقاننىڭ بارىسى تالقىلانىپ, سايلاۋ ۇدەرىستەرىنىڭ اشىقتىعىن قامتاماسىز ەتۋ ماقساتىندا ونىڭ بارلىق كەزەڭدەرىندە سبرقك بايقاۋشىلارىنىڭ «نۇر وتان» پارتياسىنىڭ سايلاۋالدى شتابىمەن ءوزارا ءىس-قيمىلىنىڭ ءادىس-تاسىلدەرى ناقتىلاندى.
سبرقك توراعاسى نۇرلان ەرىمبەتوۆ كوميسسيانىڭ كوپ جىلعى جۇمىس تاجىريبەسى تۋرالى ايتا كەلىپ, قوعامدىق بايقاۋ قازاقستانداعى سايلاۋلاردىڭ اجىراماس بولىگى رەتىندە سەرپىندى دامىپ كەلە جاتقاندىعىن اتاپ كورسەتتى:
– كوميسسيا بەس ەلەكتورالدى تسيكلدى تابىستى وتكەردى. ءبىزدىڭ بايقاۋشىلار سايلاۋ ناۋقانىنىڭ بارلىق كەزەڭدەرىندە بايقاۋ مەن جۇيەلى مونيتورينگتەردى قامتاماسىز ەتىپ, سايلاۋ كۇرەسىنە قاتىسۋشىلاردىڭ بارلىعى ءۇشىن بىردەي جاعداي جاسالۋىن, قازاقستاندىقتاردىڭ سايلاۋ قۇقىعىنىڭ ساقتالۋىن قاداعالايدى, – دەپ اتاپ ءوتتى ن.ەرىمبەتوۆ.
سبرقك مۇشەسى كامال بۇرحانوۆ كوميسسيا بايقاۋشىلارىنىڭ قاتارىنا ۇكىمەتتىك ەمەس ۇيىمدار, تاۋەلسىز باق-تار وكىلدەرى, قوعامدىق بەلسەندىلەر ەنگەنىن كولدەنەڭ تارتا كەلىپ, ولاردىڭ سايلاۋدىڭ اشىقتىعىن قامتاماسىز ەتۋ ءۇشىن بار كۇش-جىگەرىن جۇمسايتىنىنا سەندىردى.
اسقار مىرزاحمەتوۆ سايلاۋ ناۋقانىنىڭ بارىسىندا قوعامدىق بايقاۋدىڭ ماڭىزى جوعارى ەكەنىن اتاپ ءوتتى:
– «نۇر وتان» پارتياسى, ەلىمىزدەگى جەتەكشى ساياسي كۇش بولا وتىرىپ, سايلاۋشىلار مەن كانديداتتاردىڭ كونستيتۋتسيالىق قۇقىقتارى قاتاڭ ساقتالۋى قامتاماسىز ەتىلەتىن اشىق تا ءمولدىر دەموكراتيالىق سايلاۋ وتكىزۋگە مۇددەلى. وسى تۇرعىدان كەلگەندە, سبرقك تاۋەلسىز قوعامدىق ۇيىم رەتىندە ماڭىزدى ميسسيا اتقارادى, – دەدى ا.مىرزاحمەتوۆ.