قاراعاندىدا قوعامدىق كولىكتە جولاۋشىلارعا قىزمەت كورسەتۋشىلەر اراسىندا «ۇزدىك ەكيپاج» دەپ اتالاتىن قىزىقتى كونكۋرس ءوتىپ جاتىر. اۆتوبۋستارى وبلىس ورتالىعىنداعى «مايلى» مارشرۋتتارعا قاتىنايتىن №3 اۆتوپارك پەن eKaraganda.kz اقپاراتتىق پورتالى ءار اي سايىن جولاۋشىلارعا ساپالى قىزمەت كورسەتەتىن ەكيپاجدى انىقتاپ وتىرادى. كونكۋرس ەرەجەسى بويىنشا, جىل سوڭىندا 12 ۇمىتكەردىڭ ىشىنەن 2016 جىلعى ەڭ ۇزدىك ەكيپاج تاڭدالىپ الىنباقشى.
قاڭتار ايىنىڭ ۇزدىك ەكيپاجى بولىپ ەرلى-زايىپتى ارمان مەن ماقپال جاقسىباەۆتار تانىلدى. جاقسىباەۆتار ۇلگىلى وتباسىلار ساناتىنان. ولاردىڭ جەلكىلدەپ ءوسىپ كەلە جاتقان ءۇش ۇلدارى بار. ەكەۋىنىڭ №43 مارشرۋتتا جۇمىس ىستەپ كەلە جاتقاندارىنا بيىل تۇپ-تۋرا 15 جىل بولادى ەكەن.
ارمان مەن ماقپال – جاراسىمدى جۇپ. ولار ءومىردىڭ وزىندە عانا ەمەس, جۇمىس بارىسىندا دا ءبىر-ءبىرىن ايتقىزباي تۇسىنەدى. مىسالى, ماقپال جولاۋشىلاردان جولاقىنى جيناپ ۇلگەرمەي جاتقاندا, ارمان اۆتوبۋستىڭ جىلدامدىعىن باياۋلاتا قويادى ەكەن. قاي ايالدامادان شامامەن قانشا ادام وتىراتىنىن دا ولار جاتقا بىلەتىن كورىنەدى. ويتپەيىنشە تاعى بولمايدى: ولاردىڭ كۇندەلىكتى تابىسى وسى تيىن-تەبەننەن قۇرالادى.
اۆتوبۋستىڭ ىشىندە ادام كوپ بولعاندا ماقپالدىڭ قاعىلەزدىگى كوپ كومەگىن تيگىزەدى ەكەن. ءيىن تىرەسىپ تۇرعان جولاۋشىلاردىڭ اراسىنا سىنالاپ كىرىپ, جولاقى جيناۋدىڭ ءوزى ايتقانعا وڭاي. ال ماقپال بولسا, مۇنداي جاعدايدا ءوزىن سۋداعى بالىقتاي سەزىنەدى.
ارمان مەن ماقپال قىزمەت ەتەتىن №43 مارشرۋتتىڭ ۇزىندىعى 26 شاقىرىمدى قۇرايدى. ءبىر كۇننىڭ ىشىندە ولاردىڭ اۆتوبۋسى ون اينالىم جاسايدى. بۇل دەگەنىڭىز – 260 شاقىرىم!
«ءبارى جاقسى, – دەيدى اۆتوبۋس جۇرگىزۋشى ارمان. – تەك, مايقۇدىققا كەلگەندەگى جولدىڭ ويقى-شويقىلىعى بولماسا. اسىرەسە, 13 جانە 14-ءشى شاعىن اۋداندار اراسىنداعى جول ادامدى شارشاتىپ جىبەرەدى...».
وزدەرىنىڭ جۇمىسىن ادال جانە ساپالى اتقارىپ جۇرگەن ارمان مەن ماقپالدىڭ بيىلعى جىلدىڭ ەڭ ۇزدىك ەكيپاجى بولۋعا تولىق تالاسى بار.
قايرات ءابىلدينوۆ,
«ەگەمەن قازاقستان».
قاراعاندى.