وبلىس ورتالىعىنداعى گاگارين كوشەسى, 76/3 مەكەنجايى بويىنشا تاعى دا ءبىر كوپ قاباتتى تۇرعىن ءۇيدىڭ قۇرىلىسى اياقتالدى. بۇل جولى پاتەرلەردىڭ كىلتتەرى بيۋدجەتتىك جانە الەۋمەتتىك سالا قىزمەتكەرلەرىنە تابىستالدى. تاعى دا دەيتىنىمىز, بىلتىر مىسالى, «قولجەتىمدى باسپانا-2020» جانە وڭىرلەردى دامىتۋ باعدارلامالارى اياسىندا 9 تۇرعىن ءۇيدىڭ قۇرىلىسى باستالىپ, 4-ءۋى پايدالانۋعا بەرىلدى. جاڭادان سالىنعان بيىك ءۇيدىڭ قاسىنان 1200 ورىندىق جاڭا قازاق مەكتەبى وقۋشىلارعا ەسىك اشتى. ال, گاگارين كوشەسىندەگى ۇيدەن 76 وتباسى پاتەر الدى. تۇرعىنداردى وبلىس اكىمى قانات بوزىمباەۆ قۋانىشتارىمەن قۇتتىقتادى.
– الداعى جىلى وبلىس ورتالىعىنداعى «سارىارقا» شاعىن اۋدانىندا قازىر قۇرىلىسى جۇرگىزىلىپ جاتقان كوپقاباتتى 4 ءۇيدى قولدانىسقا بەرۋدى جوسپارلاپ وتىرمىز. ءار قازاقستاندىق پاتەرگە قول جەتۋى ءۇشىن مەملەكەت تاراپىنان مۇمكىندىكتەر جاسالۋدا, – دەدى ق. بوزىمباەۆ.
جارقىراعان جاقسى پاتەرگە قول جەتكىزگەن شولپان شاكەنوۆا باسپانا كەزەگىندە 11 جىل تۇرىپتى. مەملەكەتتىك باعدارلامانىڭ كومەگىمەن ۇيگە قولى جەتىپ, 2 بولمەلى پاتەر الدى. جالعا الۋ مەرزىمى 9 جىل.
شولپان اپايدان باسقا تۇرعىنداردىڭ ءبىر بولىگى مەملەكەتتىك باعدارلاما كومەگىمەن باسپانانى جالعا السا, ەندى ءبىر بولىگى قازاقستان تۇرعىن ءۇي قۇرىلىس جيناق بانكىنىڭ سالىمشىلارى. دارىگەر راديك مۋفاسالوۆ باسپانانى جالعا بەرۋ باعدارلاماسىنىڭ بولعانى جاس وتباسىلار ءۇشىن جاسالعان مۇمكىندىك, دەيدى. «بىزدەر سياقتى ءار وتباسىنىڭ ءوز ءۇيى بولسىن», – دەيدى پاتەرگە قولى جەتكەندەر. جاڭا پاتەر يەلەرىن «قازاقستان تۇرعىن ءۇي قۇرىلىس جيناق بانكى» اق باسقارما توراعاسى ايباتىر جۇماعۇلوۆ تا قۇتتىقتادى.
– وبلىس تۇرعىن ءۇي قۇرىلىسى بويىنشا ەلىمىزدە الدا كەلەدى. بانك سالىمشىلارى جيناعان قارجىسى ناتيجەسىندە باسپانالى بولۋدا. بيىك-بيىك ۇيلەر تۇرعىزعان قۇرىلىسشىلارعا, وبلىستىق اكىمدىككە راحمەت! – دەدى ول.
فاريدا بىقاي,
«ەگەمەن قازاقستان».
پاۆلودار.
سۋرەتتەردى تۇسىرگەن ۆالەري بۋگاەۆ.