* سايلاۋ-2016
كەشە ورتالىق سايلاۋ كوميسسياسىنىڭ مۇشەسى تاتيانا وحلوپكوۆا بريفينگ وتكىزىپ, قازاقستان رەسپۋبليكاسى پارلامەنتى ءماجىلىسى مەن ءماسليحاتتارىنىڭ دەپۋتاتتارىن سايلاۋ جونىندەگى سايلاۋ ناۋقانىن ادىستەمەلىك جانە اقپاراتتىق قامتاماسىز ەتۋ ماسەلەلەرىنەن حاباردار ەتتى.
«قازاقستان رەسپۋبليكاسى پارلامەنتى ءماجىلىسى مەن ءماسليحاتتارىنىڭ دەپۋتاتتارىن سايلاۋ جونىندەگى سايلاۋ ناۋقانىن ۇيىمداستىرۋ مەن وتكىزۋ ءجونىندەگى دايىندىق جۇمىسىنىڭ شەڭبەرىندە ورتالىق سايلاۋ كوميسسياسى سايلاۋدى ادىستەمەلىك قامتاماسىز ەتۋگە ەرەكشە كوڭىل بولەدى, – دەدى ول. – اتالعان جۇمىس ورتسايلاۋكومنىڭ سايلاۋ كوميسسيالارى مۇشەلەرى مەن سايلاۋ ۇدەرىسىنە قاتىسۋشىلاردى قۇقىقتىق وقىتۋ جانە اقپاراتتاندىرۋ جونىندەگى قىزمەت باعىتتارىنىڭ ءبىرى بولىپ تابىلادى».
كوميسسيا مۇشەسىنىڭ اتاپ ءوتۋىنشە, ورتسايلاۋكوم ازىرلەگەن ءتۇرلى انىقتامالىق جانە اقپاراتتىق ماتەريالدار سايلاۋدى ۇيىمداستىرۋشىلاردىڭ سايلاۋدى ازىرلەۋ مەن وتكىزۋ جونىندەگى كاسىبي قىزمەتىندە, سونداي-اق, سايلاۋ ناۋقانىنا قاتىسۋشىلاردىڭ ولاردىڭ سايلاۋ قۇقىقتارىن ىسكە اسىرۋىنا ءجاردەمدەسۋگە بەيىمدەلگەن. وسك-ءنىڭ تاپسىرىسى بويىنشا اۋماقتىق, وكرۋگتىك جانە ۋچاسكەلىك سايلاۋ كوميسسيالارى, ساياسي پارتيالار مەن ولاردىڭ سەنىم بىلدىرىلگەن وكىلدەرى كانديداتتار مەن ولاردىڭ سەنىم بىلدىرىلگەن ادامدارى, بايقاۋشىلار, باق وكىلدەرى مەن تاعى باسقالارعا ارنالعان 8 اقپاراتتىق پلاكات جانە 14 اتاۋلى جادناما, ءادىستەمەلەر, جيناقتار جانە باسقا دا باسپا ونىمدەرى ازىرلەنۋدە.
«ورتالىق سايلاۋ كوميسسياسىنىڭ تاپسىرىسى بويىنشا ازىرلەنگەن بارلىق ادىستەمەلىك ماتەريالدار ونىڭ www.election.gov.kz رەسمي ينتەرنەت-رەسۋرسىندا ورنالاستىرىلادى, – دەپ جالعاستىردى ءسوزىن ت.وحلوپكوۆا. – ازاماتتاردى اقپاراتتاندىرۋ تيىمدىلىگىن ارتتىرۋ جانە ولاردىڭ سايلاۋعا قاتىسۋ قۇقىقتارىن قامتاماسىز ەتۋ ءۇشىن ورتسايلاۋكومنىڭ تاپسىرىسى بويىنشا, سونداي-اق, رەسپۋبليكالىق تەلەارنالاردا, راديودا, سونىمەن قاتار, نەعۇرلىم تانىمال اۋماقتىق تەلەارنالار ەفيرىندە سايلاۋ ناۋقانى بويى كورسەتىلىپ, دىبىستالاتىن اقپاراتتىق جانە جۇمىلدىرۋ بەينە جانە دىبىسروليكتەرى ازىرلەنۋدە. سونىمەن بىرگە, ەلدىڭ وڭىرلەرىندە سايلاۋ تۋرالى نەگىزگى اقپاراتتى قامتيتىن جانە ازاماتتاردى داۋىس بەرۋگە قاتىسۋعا شاقىراتىن اقپاراتتىق جانە جۇمىلدىرۋ بيلبوردتارى ورنالاستىرىلادى».
كوميسسيا مۇشەسى ورتالىق سايلاۋ كوميسسياسىنىڭ سايلاۋشىلارعا ارناعان ۇندەۋىنە دە توقتالىپ ءوتتى. ورتالىق سايلاۋ كوميسسياسىنىڭ ەلىمىزدىڭ بارلىق سايلاۋشىلارىنا ارناعان ۇندەۋىنە دە ەرەكشە نازار اۋدارۋدى وتىنەر ەدىم, – دەدى ت.وحلوپكوۆا وسى جونىندە. – 22 قاڭتار كۇنگى وسك وتىرىسىندا ۇندەۋ ءماتىنى قابىلداندى. جالپى سانى 62 مىڭ دانادان اساتىن ۇندەۋ پلاكاتتارى ەلىمىزدىڭ بارلىق وڭىرلەرىنە جونەلتىلدى. ولار ادامدار كوپ جينالاتىن ورىندار – اۋەجايلاردا, ۆوكزالداردا, كولىك قۇرالدارىندا, ساۋدا ورتالىقتارىندا جانە باسقا دا جەرلەردە ىلىنەدى».
وسك مۇشەسىنىڭ حاباردار ەتكەنىندەي, ۋچاسكەلىك سايلاۋ كوميسسيالارى ءۇشىن «سايلاۋ كۇنى داۋىس بەرۋ راسىمدەرى تۋرالى» ارنايى وقىتۋ ءفيلمى ازىرلەنۋدە ەكەن. ول ەلدىڭ بارلىق اۋماقتىق, وكرۋگتىك جانە ۋچاسكەلىك سايلاۋ كوميسسيالارىنا جىبەرىلەدى. ورتسايلاۋكوم اقپاراتتىق جانە ءتۇسىندىرۋ جۇمىسىنا, سايلاۋ ورگاندارى قىزمەتىنىڭ اشىقتىعى مەن ايقىندىعىن قامتاماسىز ەتۋگە, سايلاۋ زاڭناماسى نورمالارىنىڭ قاتاڭ ساقتالۋىنا ەرەكشە كوڭىل بولەدى. «كوميسسيا بارلىق بۇقارالىق اقپارات قۇرالدارىمەن بەلسەندى ءىس-قيمىل جاسايدى, ولاردىڭ بارلىق اقپاراتتىق ماتەريالدارعا تەڭ قول جەتكىزۋىن قامتاماسىز ەتەدى. بۇل ىنتىماقتاستىقتىڭ تيىمدىلىگىن ارتتىرۋ ءۇشىن سايلاۋ ناۋقانى كەزەڭىنە وسك جانىندا تۇراقتى تۇردە جۇمىس ىستەيتىن ءباسپاسوز ورتالىعى اشىلدى», – دەدى ت.وحلوپكوۆا.
بريفينگ بارىسىندا ت.وحلوپكوۆا ازاماتتىڭ ناقتى ءبىر سايلاۋ ۋچاسكەسىنىڭ اۋماعىندا تۇرعىلىقتى جەرى بويىنشا ءتىركەلۋى, ونى سايلاۋشىلار ءتىزىمىنە ەنگىزۋ ءۇشىن نەگىز بولىپ تابىلاتىنىن ءتۇسىندىردى. 27 قاڭتاردان كەشىكتىرمەي, سايلاۋ ۋچاسكەلەرىنىڭ شەكارالارى جەرگىلىكتى بۇقارالىق اقپارات قۇرالدارىندا جاريالانادى.
ەگەر سايلاۋشى ءوزىنىڭ تۇرعىلىقتى جەرىنەن تىس ەلدى مەكەندە بولسا, وندا ول 18 اقپاننان كەشىكتىرمەي ءوزىنىڭ ۋاقىتشا بولاتىن جەرىندەگى اكىمدىككە سايلاۋ كۇنى ءوزى داۋىس بەرەتىن سايلاۋ ۋچاسكەسىنىڭ سايلاۋشىلار تىزىمىنە ەنگىزۋ تۋرالى وتىنىشىمەن جۇگىنە الادى.
سايلاۋشى 4 ناۋرىزدان باستاپ سايلاۋ كۇنىنە دەيىن ءوزىنىڭ بولاتىن جەرىن وزگەرتكەن كەزدە, ۋچاسكەلىك سايلاۋ كوميسسياسى سايلاۋشىنىڭ ءوتىنىشى بويىنشا جانە جەكە باسىن كۋالاندىراتىن قۇجاتتى كورسەتكەن جاعدايدا سايلاۋشىعا داۋىس بەرۋ قۇقىعىن بەرەتىن ەسەپتەن شىعارۋ كۋالىگىن بەرەدى.
ەسەپتەن شىعارۋ كۋالىگى 2016 جىلعى 4 ناۋرىزدان باستاپ 19 ناۋرىزدا 18.00 ساعاتقا دەيىن بەرىلەدى.
ەگەر سايلاۋشى ءوزىنىڭ سايلاۋ ۋچاسكەسىندە ەسەپتەن شىعارۋ كۋالىگىن الا الماسا ء(ىسساپاردا جۇرسە جانە ت.ب.), ول ءوزىنىڭ سەنىم بىلدىرگەن ادامىنا سەنىمحات بويىنشا كۋالىكتى الۋدى تاپسىرا الادى. بۇل جاعدايدا سايلاۋشىنىڭ سەنىم بىلدىرگەن ادامى ەسەپتەن شىعارۋ كۋالىگىن العاننان كەيىن ونى سايلاۋشىعا ءوزى بەرەدى نەمەسە جىبەرەدى.
داۋىس بەرۋ قۇقىعىن بەرەتىن ەسەپتەن شىعارۋ كۋالىگىن ۇسىنعاننان كەيىن ۋچاسكەلىك سايلاۋ كوميسسياسى داۋىس بەرۋ كۇنى سايلاۋشىنى ونىڭ كەلگەن جەرى بويىنشا سايلاۋ ۋچاسكەسىندەگى سايلاۋشىلار تىزىمىنە ەنگىزەدى.
ەسەپتەن شىعارۋ كۋالىگى باسقا سايلاۋ وكرۋگىندە نەمەسە ءبىر ەلدى مەكەن اۋماعىنداعى باسقا سايلاۋ ۋچاسكەسىندە داۋىس بەرۋگە قاتىسقىسى كەلگەن سايلاۋشىلارعا بەرىلمەيدى.
جوعالعان ەسەپتەن شىعارۋ كۋالىكتەرى قالپىنا كەلتىرىلمەيدى جانە ولاردىڭ كوشىرمە نۇسقالارى بەرىلمەيدى.
4 ناۋرىزدان بارلىق سايلاۋشىلارعا ءوزىنىڭ سايلاۋ ۋچاسكەسىندەگى سايلاۋشىلار تىزىمىندە ءوزى تۋرالى دەرەكتەردى تەكسەرۋ ءمۇمكىندىگى بەرىلەدى.
ەگەر سايلاۋشى سايلاۋ كۇنى سايلاۋ ۋچاسكەسىنە دەنساۋلىق جاعدايىنا بايلانىستى نەمەسە وتباسىنىڭ سىرقات مۇشەسىنە كۇتىم جاساۋىنا بايلانىستى نەمەسە سايلاۋ ۋچاسكەلەرى قۇرىلماعان شالعايداعى اۋدانداردا بولۋىنا بايلانىستى كەلە المايتىن بولسا ول ۇيدە داۋىس بەرۋدى ۇيىمداستىرۋ تۋرالى ۋچاسكەلىك سايلاۋ كوميسسياسىنا ءوتىنىش جاساۋعا قۇقىلى. مۇنداي ءوتىنىشتەر 20 ناۋرىز كۇنى ساعات 12:00-گە دەيىن قابىلدانادى.
ءاليسۇلتان قۇلانباي,
«ەگەمەن قازاقستان».
سۋرەتتەردى تۇسىرگەن
ەرلان وماروۆ.