گرەك-ريم كۇرەسىنەن بىشكەكتە ءتورت جۇلدە الدىق

بۇل جۇلدەلەردى ومار ساتاەۆ پەن ءالىمحان سىزدىقوۆ (كۇمىس) جانە يبراگيم ماگومادوۆ پەن ءشامىل وجاەۆ (قولا) يەلەندى. بۇل كورسەتكىشكە قازاق جانكۇيەرلەرىنىڭ كوڭىلى تولمادى. ويتكەنى, گرەك-ريم كۇرەسىندە جەڭىسپەن ورىلگەن باي ءداستۇرىمىز بار. ءدال وسى سپورت ءتۇرىن سەرىك ەتكەن بالۋاندارىمىز كەزىندە تولاعاي تابىستارعا قول جەتكىزىپ, سارى قۇرلىقتا ۇستەمدىك قۇردى. كۇللى الەم بىزبەن ساناساتىن. سوندىقتان دا يوردانياداعى ساتسىزدىكتى «كەزدەيسوقتىق» دەپ قابىلدادىق. كەلەسى جىلى سول ولقىلىقتىڭ ورنىن تولتىرۋعا كۇش-جىگەرىمىز بەن الەۋەتىمىزدىڭ جەتەتىنىنە قاتتى سەندىك. 

الاتاۋدىڭ ارعى بەتىندەگى باسەكە بۇل جولى بىزدەر ءۇشىن كوڭىلسىزدەۋ باستالدى. العاشقى كۇنى بوزكىلەمدە بەلدەسكەن بەس بالۋاننىڭ بىردە-بىرەۋى فينالعا شىعا المادى. تۇساۋكەسەر كەزدەسۋلەرىندە يراندىق موحامماد پاناحاسانيدەن ۇتىلعان نۇرزات قابدارقىموۆ (55 كگ) پەن جاپونيالىق يۋتا نارادان جەڭىلگەن جوھار ۇزاروۆ (130 كگ) بىردەن كورەرمەندەر قاتارىنا قوسىلدى.

جەرەبە سايفوللا قۇرماندى (63 كگ) تۇركىمەنستاندىق ازاتجان اچيلوۆپەن جولىقتىرعاندا قانداسىمىزدىڭ ايقىن جەڭىسكە قول جەتكىزەتىنىنە ەش كۇمان بولمادى. بىراق قاتتى قاتەلەسكەن ەكەنبىز. بىشكەكتە ازاتجان سايفوللاعا سان سوقتىرىپ كەتتى. سوعان قاتتى كۇيىندىك. شىنى كەرەك, سول ساتكە دەيىن قازاقستاننىڭ گرەك-ريم كۇرەسى مەكتەبىنىڭ تۇلەگى تۇركىمەنستاننىڭ وكىلىنەن ۇتىلادى دەگەن وي ءۇش ۇيىقتاساق تا تۇسىمىزگە دە كىرمەگەن. ءسويتىپ, ءۇش جەرلەسىمىز جەر قۇشتى.

ولارعا قاراعاندا قاھارمان قيسىمەتوۆتىڭ (77 كگ) تۇزى جەڭىل ەكەن. العاشقى اينالىمدا ول قىرعىزستاننىڭ ماقتانىشى اقجول ماحمۇدوۆتان ويسىراي ۇتىلعانىمەن, جۇلدەلى ورىن ءۇشىن تالاسۋ قۇقىعىن ساقتاپ قالدى. سەبەبى, اقجول فينالعا دەيىن جەتىپ, جەرلەسىمىزگە جول اشتى. بىراق قيسىمەتوۆ وزىنە بەرىلگەن مۇمكىندىكتى پايدالانا المادى. جۇبانىش بەلدەسۋدە جاپونيالىق يسامي نوريكيتانى ۇتقان ول ءۇشىنشى ورىن ءۇشىن باسەكەدە وزبەك دونيورحون ناكيبوۆتان ايلاسىن اسىرا المادى. 

35 جاستاعى نۇرسۇلتان تۇرسىنوۆ (87 كگ) تۇساۋكەسەر كەزدەسۋىندە  وڭتۇستىك كورەيانىڭ وعىلانى سەۋنگحۆان ءليدى ەش قينالماي جىققانىمەن, جارتىلاي فينالدا 20 جاستاعى جەرگىلىكتى جاس دارىن اسان جانىشەۆتان وڭباي جەڭىلدى. قانداسىمىز قولا مەدال ءۇشىن باسەكەدە تۇركىمەنستاندىق داۆلەتمۇرات بايراموۆتى باس كوتەرتپەي ۇتىپ, جەڭىس تۇعىرىنا كوتەرىلدى.

كەلەسى كۇنى تاعى بەس سالماق دارەجەسىنىڭ جۇلدەلەرى ساراپقا سالىندى. سولاردىڭ اراسىنان فينالعا تەك الماتبەك امانبەك (72 كگ) شىقتى. قىتايلىق دونجۋ لي مەن قىرعىز امانتۇر يسمايىلوۆتى جولىنان ىعىستىرعان قانداسىمىز شەشۋشى تۇستا جاستار اراسىنداعى الەم چەمپيوناتىنىڭ ءفيناليسى, ازيا چەمپيونى, يراندىق موحامماد دجاۆاد رەزايمەن كۇش سىناستى. سىن ساعاتتا الماتبەك ءوزىن جاقسى قىرىنان كورسەتتى. قارسىلاسى العا ۇمتىلعان ساتتە قارىمتا شابۋىلعا جۇگىنگەن ول ونى جىعىپ الدى دا, تىرپ ەتكىزبەي ۇستادى. رەزاي جەڭىلگەنىن مويىندادى. الماتبەك – ازيا چەمپيونى!

جارتىلاي فينالدا جەڭىلىس تاۋىپ, باس جۇلدە ءۇشىن سايىسقا ءتۇسۋ مۇمكىندىگىنەن ايىرىلعان يبراگيم ماگومادوۆ (82 كگ) پەن يسلام ەۆلوەۆ (97 كگ) قولا مەدال ءۇشىن كۇرەستى. وسى سىناقتان ولار مۇدىرمەي ءوتتى. يبراگيم اسا شيەلەنىستى باسەكەدە قىتايلىق رۋي ءليۋدى ەكى ۇپاي ايىرماشىلىعمەن ۇتسا,  يسلام وڭتۇستىكورەيالىق مينحۋ ءليدى 1 مينۋت 27 سەكۋندتا تاس-تالقانىن شىعاردى. ال يراندىق ءالي ابدوللاح احمادي ۆافاعا ءالى جەتپەگەن ەربول كاماليەۆ (60 كگ) بەسىنشى ورىندى قاناعات تۇتتى.

گرەك-ريم كۇرەسى جارىسىنىڭ جالپى كوماندالىق ەسەبىندە قىرعىزستان قۇراماسى جەكە-دارا كوش باستادى. جارىس قوجايىدارى ءتورت سالماق دارەجەسىندە باس جۇلدەنى قانجىعاعا بايلادى. ەكىنشى جانە ءۇشىنشى ورىنداردا – يران (2 التىن+4 كۇمىس+3 قولا) مەن وزبەكستان (2+1+2). ءتورتىنشى مەن بەسىنشى ساتىعا قازاقستان (1+0+3) مەن كاتار (1+0+0) جايعاستى. سونداي-اق, جۇلدە العاندار قاتارىندا ءۇندىستان (0+2+3), جاپونيا (0+1+2), سولتۇستىك كورەيا (0+1+0), قىتاي (0+0+4) جانە وڭتۇستىك كورەيانىڭ (0+0+3) بالۋاندارى بار.    

گرەك-ريم كۇرەسىنەن ازيا چەمپيوندارى

55 كگ – يحتيەر باتىروۆ (وزبەكستان), 60 كگ – الىشەر گانيەۆ (وزبەكستان), 63 كگ – اۆتانديل تاالايبەك ۇلى (قىرعىزستان), 67 كگ – راززاق بەيشەكەەۆ (قىرعىزستان), 72 كگ – الماتبەك امانبەك (قازاقستان), 77 كگ – اقجول ماحمۇدوۆ (قىرعىزستان), 82 كگ – شاحين باداحي (كاتار), 87 كگ – اسان جانىشەۆ (قىرعىزستان), 97 كگ – موحاممادحادي ساراۆي (يران) جانە 130 كگ – ءامين ميرزازادە (يران).