استانا. 26 قاڭتار. ەرلەر مەن ايەلدەر اراسىنداعى جۇرەك تالماسىنىڭ ايىرماشىلىقتارى انىقتالدى. بۇل تۋرالى lenta.ru اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
امەريكانىڭ Circulation كارديولوگيالىق قاۋىمداستىعىنىڭ جۋرنالى ايەلدەر جۇرەك تالماسىنىڭ سەبەپتەرى, بەلگىلەرى مەن زاردابى ەرلەرگە قاراعاندا وزگەشە بولاتىنى تۋرالى حابارلاپ وتىر. XXI عاسىردا اقش-تا جۇرەك-قان تامىرلارى اۋرۋلارىنان كوز جۇماتىنداردىڭ سانى ەداۋىر ازايعانىمەن, ايەلدەر بۇل دەرتتەن ەرلەرگە قاراعاندا كوبىرەك قايتىس بولادى. مۇنىڭ سەبەبىن عالىمدار ايەلدەر اراسىندا جۇرەك اۋرۋلارىن ءالى كۇنگە دەيىن ناشار ەمدەۋ جانە اۋرۋدىڭ سەبەبىن كەش انىقتاۋمەن بايلانىستىرىپ وتىر.
ميوكارد ينفاركتىسىنىڭ باستى سەبەبى جۇرەككە اپاراتىن نەگىزگى قان تامىرىنىڭ بىتەلۋى بولىپ تابىلادى. ەرلەرگە قاراعاندا, ايەلدەردە تامىردىڭ بىتەلۋى اسا قاۋىپتى بولمايدى, سول سەبەپتى ولارعا ارتەريانى كەڭەيتۋدىڭ قاجەتى جوق. الايدا, نازىك جانداردا جۇرەككە اپاراتىن قان تامىرى ءجيى بۇزىلاتىندىقتان جۇرەك بۇلشىق ەتىنە قان كەلۋىنىڭ ازايۋىنا اكەپ سوعۋى مۇمكىن. بۇل دەرتتىڭ سالدارى دا سول – جۇرەك تالماسى.
ەرلەر مەن ايەلدەر ءۇشىن دە جۇرەك تالماسىنىڭ باستى بەلگىسى – كەۋدە تۇسىنىڭ شانشۋى بولىپ سانالادى. دەگەنمەن, ايەلدەردە تىنىستىڭ ءبىتۋى, جۇرەكتىڭ اينۋى, ارقانىڭ اۋرۋى سەكىلدى وزگە دە بەلگىلەر بولۋى مۇمكىن.
ەمدەۋگە كەلەتىن بولساق, ايەلدەر قان اعىسى قالپىنا كەلگەننەن كەيىن بۇل دەرتتىڭ اسا اۋىر اسقىنۋىمەن بەتپە-بەت كەلەدى. سەبەبى, ولاردىڭ قان تامىرلارى ادەتتە كىشىرەك بولىپ كەلەدى. سوندىقتان دا قىز-كەلىنشەكتەر كوبىنە-كوپ ديابەت جانە جوعارى قان قىسىمى سەكىلدى تاۋەكەل فاكتورلاردان زارداپ شەگەدى. سونداي-اق, دارىگەرلەر ايەلدەرگە جۇرەك اقاۋىن قالپىنا كەلتىرۋ جونىندە سيرەك كەڭەس بەرەدى. ال, نازىك جاندار قالپىنا كەلتىرۋ باعدارلاماسىن سوڭىنا دەيىن جەتكىزبەيدى.
ەلامان قوڭىر.
دەرەك: lenta.ru.
سۋرەت: asosudy.ru.