گيمناستەركاڭدى قايىس بەلبەۋمەن شارت بايلاپ, سولدات ەتىگىمەن سارت-سۇرت ادىمداپ جۇرگىڭ كەلمەسە, جولىن جاسا.
وڭتۇستىك قازاقستان وبلىسىنداعى سايرام اۋدانى قورعانىس ىستەرى جونىندەگى ءبولىمىنىڭ اسكەري شاقىرتۋ قىزمەتىنىڭ باسشىسى وسىلاي ويلايدى ەكەن. ول ت. دەگەن ازاماتقا بورىشىن اتقارماي-اق اسكەري بيلەت اپەرۋگە ۋاعدا جاساعان. اقىسىنا 35 مىڭ تەڭگە قولعا قىستىراسىڭ. قۇر اياققا باتا جۇرمەيدى عوي.
شىمكەنت قالاسىنداعى قاراتاۋ پوليتسيا ءبولىمىنىڭ ۋچاسكەلىك پوليتسيا ينسپەكتورى دا وسىنداي كۇدىكپەن قولعا تۇسكەن.
ينسپەكتور مەرزىمىنەن بۇرىن شارتتى تۇردە بوساتىلعان ازاماتتان تۇرعىلىقتى جەرىندە بولمادى دەپ اكت تۇزبەۋ جانە ماتەريالدى سوتقا جولداماۋ جونىندە انت-سۋ ىشكەنگە ۇقسايدى. ارينە, قۇرسوزگە ەمەس, 35 مىڭ تەڭگەگە.
الايدا, ەكەۋىنىڭ دە دەگەنى بولمادى. سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ وڭتۇستىكتەگى دەپارتامەنتى قىزمەتكەرلەرىنىڭ قولىنا تۇسكەن. ەندى ولاردىڭ ۇستىنەن اتالعان دەرەكتەر بويىنشا قر قك 366-بابى 1-بولىمىنە سايكەس پارا الۋ دەرەگى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.
وسىنى ەستىگەن ءبىر جىگىت: «بۇلاردىڭ قايتا ىنسابى بار ەكەن. الماتى قالاسىنداعى ىنىمە اسكەري بيلەت جاساتۋ ءۇشىن ءۇش مىڭ دوللار بەرگەن ەدىم» دەپتى.
ارينە, ۇستالماعان ۇرى ەمەس. سونداي-اق, پارانىڭ دا ۇلكەن-كىشىسى بولمايدى. زاڭ الدىندا ءبارى بىردەي.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.