ورال. 18 قاڭتار. باتىس قازاقستان وبلىسىنىڭ ورتالىعى – ورال قالاسىندا جول اپاتى سالدارىنان تاتار مەشىتىنىڭ نايب يمامى ەرعالي قاجى جۇماتاش پەن پروكۋراتۋرا سالاسىندا ۇزاق جىلدار بويى قىزمەت ەتىپ كەلگەن باتىر جازباەۆ قازا تاپتى. بۇل تۋرالى egemen.kz ءتىلشىسى حابارلادى.
جول اپاتى 14 قاڭتار كۇنى ساراتوۆ-ورال تاسجولىندا بولعان. تاسقالا اۋىلىنان شىعىپ, ورال قالاسىنا بىرنەشە شاقىرىم قالعان تۇستا «لەكسۋس» اۆتوكولىگى جولدىڭ قارسى بەتىنە شىعىپ «تويوتا پرادو» اۆتوكولىگىنە بەتپە بەت سوقتىعىسقان. سالدارىنان «لەكسۋس» كولىگىندە وتىرعان ورال قالالىق مۋحاممەد-عاريف اتىنداعى مەشىتتىڭ نايب يمامى, 10 جىل وبلىس يمامى قىزمەتىن اتقارىپ كەلگەن, ەلگە تانىمال ەرعالي قاجى جۇماتاش پەن پروكۋراتۋرا سالاسىنىڭ ارداگەرى باتىر جازباەۆ جەدەل جاردەممەن رەانيماتسياعا جونەلتىلىپ, كوپ كەشىكپەي وبلىستىق كلينيكالىق اۋرۋحانادا كوز جۇمدى. ال «تويوتانىڭ» جۇرگىزۋشىسى امان قالدى.
ورتالىق مەشىت وكىلدەرىنىڭ راستاۋىنشا, ەرعالي قاجى جۇماتاش تاتار مەشىتىنىڭ نايب يمامى بولىپ قىزمەت ەتە ءجۇرىپ 2016 جىلدىڭ 14 قاڭتارى كۇنى تاسقالا اۋىلىنا جەرلەۋ ءراسىمىن وتكىزۋگە بارادى. كەيىن سول اۋىلدان قالاعا بەت العان تۇستا جول اپاتىنا ۇشىراپ قازا بولدى.
ايتا كەتەرلىك جايت, 49 جاستاعى ەرعالي قاجى جۇماتاش وبلىستا 90-شى جىلداردان بەرى 10 جىل وبلىستىڭ باس يمامى بولىپ قىزمەت ەتىپ كەلگەن. ال ونىڭ جول سەرىكتەسى بولعان باتىر جازباەۆ 1952 جىلى 21 قاراشادا تاسقالا اۋىلىندا دۇنيەگە كەلگەن. پروكۋراتۋرا سالاسىندا 1988 جىلدان باستاپ ەڭ العاش قىزمەتىن الماتى قالاسى پروكۋرورىنىڭ كومەكشىسى, الماتى وبلىستىق پروكۋراتۋراسىنىڭ اعا تەرگەۋشىسى, قاپشاعاي قالاسى پروكۋرورىنىڭ ورىنباسارى, اتىراۋ, ورال قالاسىنىڭ پروكۋرورى جانە باتىس قازاقستان وبلىسى پروكۋرورىنىڭ ورىنباسارى قىزمەتتەرىن اتقارعان.
اپات بولاتىن كۇنى ورال قالاسى اۋماعىندا قاتتى بوران تۇرىپ, قالىڭ قار جاۋعانىن اتاپ وتكەن ءجون.
تەمىر قۇسايىن.
دەرەك: egemen.kz.
سۋرەت: egemen.kz, mgorod.kz.