اتىراۋ. 18 قاڭتار. اتىراۋ وبلىسىنىڭ يساتاي اۋدانىنا «ديپلوممەن – اۋىلعا» باعدارلاماسىمەن جۇمىسقا كەلگەن جاس ماماننان 98 910 تەڭگە كولەمىندە كوتەرمە جاردەماقى سوت ارقىلى مەملەكەت پايداسىنا ءوندىرىلدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
يساتاي اۋدانى اكىمىنىڭ اپپاراتى جاس ماماننان كوتەرمە جاردەماقىنى ءوندىرۋ جونىندە اۋداندىق سوتقا تالاپ ارىزبەن جۇگىنگەن. وعان اققىستاۋ ورتا مەكتەبىنە «ديپلوممەن – اۋىلعا» باعدارلاماسىمەن مۇعالىم بولىپ جۇمىسقا ورنالاسقان جاس ماماننىڭ ەكىجاقتى كەلىسىمدى بۇزۋى سەبەپ بولعان. جاس مامانعا باعدارلاماعا سايكەس جەرگىلىكتى بيۋدجەتتەن ءبىر جولعى كوتەرمە جاردەماقىسى بەرىلگەن. ونىڭ كولەمى – 98 910 تەڭگە. اكىمدىكپەن ارادا جاسالعان كەلىسىم بويىنشا جاس مامان سول مەكتەپتە 5 جىل جۇمىس جاساۋعا مىندەتتەمە العان. الايدا, جاس مامان كورسەتىلگەن مەرزىمنەن بۇرىن ءوز ەركىمەن جۇمىستان كەتۋگە ارىز جازىپتى. دەمەك, باعدارلاما جانە ەكىجاقتى كەلىسىم تالاپتارى بۇزىلعان.
اكىمدىك اپپاراتى مەن جاس مامان اراسىنداعى ازاماتتىق ءىستى قاراعان يساتاي اۋداندىق سوتىنىڭ شەشىمىمەن جاۋاپكەردەن, ياعني, جاس ماماننان كوتەرمە جاردەماقى – 98 910 تەڭگە جانە 2 968 تەڭگە كولەمىندەگى مەملەكەتتىك باج ءوندىرىلدى.
سوت شەشىمى زاڭدى كۇشىنە ەندى.
جولداسبەك شوپەعۇل.
دەرەك: اتىراۋ وبلىستىق سوتىنىڭ ءباسپاسوز قىزمەتى.
سۋرەت: askeri.sud.kz.