استانا. 17 قاڭتار. الەمدەگى ەڭ باي ادامدار جىل باسىنان بەرى 305 ملرد. اقش دوللارىن جوعالتتى. بۇل تۋرالى interfax.ru اگەنتتىگىنە سىلتەمە جاساعان egemen.kz ءتىلشىسى حابارلادى.
جاڭا جىلدىڭ العاشقى ەكى اپتاسىندا الەمنىڭ ەڭ قالتالى 400 ادامى جالپى ايتقاندا 305 ملرد. دوللارىنان ايىرىلدى. سول سەبەپتى, الەمدىك نارىق ءۇشىن 2016 جىلدىڭ باسى ەڭ كۇردەلى كەزەڭ رەتىندە ەستە قالدى. Bloomberg كومپانياسىنىڭ مالىمدەۋىنشە, جاعىمسىز ديناميكا ازيا, ەۋروپا جانە امەريكا نارىقتارىندا ءجيى بايقالۋدا. سونداي-اق, يرانعا قارسى سانكتسيانى الىپ تاستاۋ ماسەلەسى قوزعالعالى مۇنايدىڭ دا باعاسى كۇرت تومەندەپ كەتتى.
Bloomberg Billionaires Index-ءتىڭ دەرەكتەرىنە سۇيەنسەك, وسى اپتانىڭ وزىندە عانا الەم بايلارى 115 ملرد. دوللارىن جوعالتتى. سونىڭ ىشىندە 76 ميللياردەردىڭ ارقايسىسى ءبىر ملرد. جانە ودان دا كوپ اقشاسىنان ايىرىلدى. سونداي-اق, تەك جۇما, ياعني, ءبىر كۇننىڭ وزىندە جەتى ادامنىڭ ارقايسىسىنىڭ بايلىعى ءبىر ملرد. دوللارعا جانە ودان دا كوپ قارجىعا ازايدى.
2016 جىل باستالعالى داعدارىستان ەڭ كوپ زارداپ شەككەن ميللياردەر – Amazon كومپانياسىنىڭ نەگىزىن قالاۋشى, الەمنىڭ ەڭ باي ادامدارىنىڭ قاتارىندا 4-ورىندا تۇرعان دجەفف بەزوس. ول 1 قاڭتاردان بەرى 8,9 ملرد. دوللارىن جوعالتتى. وسى اپتانىڭ اياعىندا ونىڭ كومپانياسىنىڭ اكتسياسى 3,85 پايىزعا ارزانداپ, 1,9 ملرد. دوللارى جەلگە ۇشتى.
ال الەم بايلارىنىڭ ىشىندە كوش باستاپ تۇرعان بيلل گەيتس جاڭا جىلدان بەرى 6,8 ملرد. دوللارىنان ايىرىلدى. قىتايدىڭ ەڭ باي ادامى ۆان تسزيانلين دە مەشىن جىلى باستالعالى 6,4 ملرد. دوللارىن جوعالتتى.
ەڭ باي ادامداردىڭ تىزىمىندە تۇرعان 400 ميللياردەردىڭ 9-ى عانا جاڭا جىلدى تابىستى باستادى. ولاردىڭ ىشىندە Reliance Industries Ltd. كومپانياسىنىڭ باسشىسى, ءۇندىستان كاسىپكەرى مۋكەش ءامبانيدىڭ ەسەبى تۇگەل. اتاپ ايتقاندا, ول 1 قاڭتاردان بەرى بايلىعىن 620 ملن. دوللارعا كوبەيتتى.
قازىرگى تاڭدا تىزىمدە تۇرعان ەڭ باي ادامداردىڭ بايلىعى 3,6 ترلن. دوللاردى قۇرايدى. 2015 جىلدىڭ مامىر ايىندا بۇل كورسەتكىش 4,3 ترلن. دوللار بولعان ەدى.
ەلامان قوڭىر.
دەرەك: Interfax.ru.
سۋرەت: تاسس.