استانا. 16 قاڭتار. سودىرلاردىڭ بۋركينا-فاسونىڭ استاناسى – ۋاگادۋگۋ قالاسىنداعى شابۋىلى كەزىندە 27 ادام قازا بولدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان جاساعان egemen.kz ءتىلشىسى حابارلادى.
فرانتسيانىڭ اتالعان ەلدەگى ەلشىسى جيل تيبونىڭ ايتۋىنشا, ۋاگادۋگۋدەگى مەيرامحانا مەن قوناق ءۇيدى باسىپ الۋ كەزىندە قازا بولعان قۇربانداردىڭ سانى 27-گە جەتكەن. بۇدان بۇرىن شابۋىل سالدارىنان 23 ادامنىڭ كوز جۇمعانى تۋرالى حابارلانعان ەدى. جيل تيبو Twitter-دەگى جەكە پاراقشاسىندا: «قۇرباندار سانى 27-گە جەتتى. قازا بولعانداردىڭ ۇلتتارى ءالى بەلگىسىز», – دەپ جازعان. ول سونداي-اق, كۇش قۇرىلىمدارىنىڭ قوناقۇيدەن 150 ادامدى قاۋىپسىز جەرگە شىعارىپ, قاجەتتى دارىگەرلىك كومەك كورسەتكەنى جونىندە دە مالىمدەگەن. عيماراتتا بولعانداردىڭ اراسىندا 18 ەلدىڭ وكىلى بار.
ەستەرىڭىزگە سالا كەتەيىك, كەشە, ياعني, 15 قاڭتار كۇنى بەلگىسىز بىرەۋلەر دامحاناعا وق جاۋدىرىپ, ۋاگادۋگۋدەگى Splendid قوناق ۇيىندەگى ادامداردى كەپىلدىككە العان بولاتىن. بۇل قوناق ۇيگە باتىس ەلدەرىنىڭ وكىلدەرى, سونىڭ ىشىندە بۇۇ-نىڭ قىزمەتكەرلەرى ءجيى توقتايتىنىن اتاپ وتكەن ءجون.
فرانتسيانىڭ ديپلوماتيالىق وكىلدەرى مەن رەسەيلىك قۇرمەتتى كونسۋل بۇل قانقۇيلى وقيعانى تەرروريستەردىڭ شابۋىلى دەپ اتادى. SITE مونيتورينگتىك توپتىڭ اقپاراتىنا سايكەس, بۋركينا-فاسوداعى قاندى شابۋىلعا قاراشا ايىندا مالي استاناسىنداعى قوناق ءۇيدى باسىپ العان «ءال-مۋرابيتۋن» لاڭكەستىك توبىنىڭ تىكەلەي قاتىسى بار.
ەلامان قوڭىر.
دەرەك: ريا «نوۆوستي».
سۋرەت: AFP.