موڭعوليانىڭ وڭتۇستىك گوبي ايماعىندا عۇن داۋىرىندە جاسالعان تاۋتەكەنىڭ ءمۇيىزى كەيىپتەس التىن اشەكەي تابىلدى.
عالىمدار تەك موڭعول جەرى ءۇشىن عانا ەمەس, كۇللى الەم ءۇشىن دە وتە سيرەك كەزدەسەتىن 3000-3500 جىلدىق تاريحى بار جادىگەر عۇنداردىڭ سول داۋىرلەردە تىرشىلىك ەتكەندەرىن جانە وسى ەجەلگى مەملەكەتتىڭ ءوز بيلەۋشىلەرى بولعاندارىن ايعاقتايتىن قۇندى زات ەكەنىن ايتىپ وتىر.
ەڭ كونە شاي بۇدان 2150 جىل شاماسى بۇرىن پايدا بولعان
قىتايدىڭ بۇدان 2150 جىل بۇرىن ومىردەن وتكەن يمپەراتورىنىڭ مولاسىنان الەمدەگى ەڭ كونە شاي تابىلدى.
بۇدان بۇرىن كونە قىتاي ماتىنىندە ءداۋىر باسىندا ەلدىڭ تيبەتكە شايدى ەكسپورتقا شىعارعانى تۋرالى مالىمەت بولعانىمەن, قازبا جۇمىستارى بارىسىندا مۇنشالىقتى ەرتە كەزەڭدەگى شاي كەزىكپەگەن ەدى. مۇنى اشقان قىتاي عىلىم اكادەمياسىنىڭ عالىمدارى ماسس-سپەكتومەتريا كومەگىمەن ءبىزدىڭ داۋىرىمىزگە دەيىنگى II عاسىردىڭ ورتاسىندا شاي جاپىراقتارىنىڭ بولعانىن دالەلدەپ شىقتى.
سۇيىسپەنشىلىك حاتتارى 10 جاشىككە جۇك ەكەن
امەريكانىڭ نيۋ-يورك قالاسىندا تۇراتىن بيل جانە كريس برەسنانداردىڭ بىرگە ءومىر ءسۇرىپ كەلە جاتقاندارىنا 40 جىل تولعان كەزدە وتاعاسىن جۇرەك تولقىتاتىن ەرەكشە ءبىر وقيعا كۇتىپ تۇردى.
ماسەلە مىنادا. بيل سۇيىكتىسى كريسپەن قوسىلعاننان باستاپ, كۇنىنە ءبىر رەت وعان ارناپ, حات جازىپ كەلىپتى. ال كريس بولسا, ونىڭ ءبىر داناسىن دا شاشاۋ شىعارماي جيناي بەرگەن. وسىنشا ۋاقىتتا ونىڭ كۇيەۋىنەن جاسىرىپ, ءۇيدىڭ شاتىرىنا جيناپ وتىرعان حاتتارى 10 ۇلكەن جاشىككە جۇك بولعان. مۇنى كورگەن بيل قاتتى تەبىرەنگەننەن جىلاپ جىبەرىپتى.
1995 جىلى جوعالعان ەركەك پەن ايەل ەنيسەيدەن شىقتى
رەسەيدىڭ كراسنويارسك قالاسىندا قۇتقارۋشىلار جاتتىعۋ كەزىندە ەنيسەي وزەنىنىڭ تۇبىندە شوگىپ جاتقان ءاۆتوموبيلدىڭ ۇستىنەن ءتۇستى.
سۇڭگۋىرلەر اباكاننىڭ قۇيارلىعىنان كورگەن كولىكتىڭ ىشىنەن ءبىر ەر كىسى مەن ايەلدىڭ دەنەسى الىندى. Mitsubishi Galant ماشيناسى جاعادان 20 مەتر قاشىقتىقتا, 3 مەترگە جۋىق تەرەڭدىكتە جاتقان. تەرگەۋشىلەر كىم ەكەندەرى بولجانىپ وتىرعان 1957 جىلى تۋعان بۇل ەركەك پەن 1965 جىلى تۋعان ايەلدىڭ جوعالىپ كەتكەندەرى تۋرالى دابىلدى 1995 جىلى كوتەرگەنىن مالىمدەدى.
ويىن قارسىلاستارى 802 مينۋتتىق ايىپقا تارتىلدى
رەسەيدىڭ تۇنگى ليگا دەپ اتالاتىن توبىندا چەمپيوناتتىڭ كەزەكتى كەزدەسۋىن وتكىزگەن ماسكەۋدىڭ «مولوت» جانە «يۋگان» كوماندالارىنىڭ حوككەيشىلەرى 802 مينۋت ايىپ ورىندىعىندا وتىردى.
بيىلعى 9 قاڭتار كۇنى وينالعان ماتچتىڭ 42-مينۋتىندا جاپپاي توبەلەستىڭ سالدارىنان ويىن توقتاتىلدى. مۇنى باستاپ بەرگەن ەپيزودتى قايتا قاراپ شىققان سپورت-ءتارتىپ كوميتەتى اۋەسقوي ليگا ويىنشىلارىن جالپى مولشەرى 802 مينۋتقا ايىپقا تارتتى. بۇدان باسقا, حوككەيشىلەر 140 مىڭ رۋبلدەن ارتىق اقشا تولەۋگە ءتيىس بولدى.
روك جۇلدىزىنىڭ ءولىمىن دە كەلەكە ەتتى
سوڭعى جىلدارى ورىنسىز كاريكاتۋرالارىمەن اتى شىققان فرانتسۋزدىڭ Charlie Hebdo ساتيرالىق جۋرنال-سىماعى ءوزىنىڭ ءبىرىنشى بەتتەگى مۇقاباسىن جاقىندا راك اۋرۋىنان قايتىس بولعان اتاقتى مۋزىكانت دەۆيد بوۋيگە ارنادى.
باسىلىمدا «روك يدولى» اتانىپ كەلگەن بريتانيالىق ءانشى ءارى اندەر اۆتورى دەۆيد بوۋي تابىت سەكىلدى ەتىپ بەرىلگەن گيتارانىڭ قورابى ىشىندە جاتقانى بەينەلەنگەن. ول قولدارىن كەۋدەسىنە ايقاستىرىپ قويعان, وڭ جاعىندا شىراعدان جانىپ تۇر. وسىلايشا جۋرنال ۇجىمى وزدەرىنىڭ ءولىمنىڭ وزىنەن دە ىلىك ىزدەۋدەن قايتپاعانىن تاعى كورسەتتى.
اقپارات اگەنتتىكتەرىنىڭ ماتەريالدارى نەگىزىندە دايىندالدى.