اتىراۋداعى №5546 اسكەري بولىمىندە كەلىسىمشارتپەن قىزمەت ەتەتىن سەرجانت مۇحتار ءوربىسىنوۆ ساۋدا ورنىندا ەسىنەن تانىپ قۇلاعان بالدىرعاننىڭ اجالدان امان قالۋىنا قول ۇشىن سوزدى.
بۇل وقيعا تومەندەگىشە وربىگەن. 9 قاڭتاردا كەشكىلىك 22.00 ساعات شاماسىندا اسكەري قىزمەتكەر ۇيىنە تاياۋ ماڭداعى «اتابا» ساۋدا ورتالىعىنا بارعان. سول كەزدە ەسىنەن تانىپ قالعان قىزىن قۇتقارۋ قامىنا كىرىسكەن ەر ادامدى كەزدەستىرەدى. كىشكەنتاي ءبوبەكتىڭ قىزۋى 40,5 گرادۋسقا كوتەرىلگەن ەكەن. مۇحتار «جەدەل جاردەم» شاقىرىپ, ءتىپتى, ءۇيىندەگى ايەلى سامالعا دا حابار بەرىپ ۇلگەرەدى. «جەدەل ءجاردەم» بريگاداسى كەلگەنشە فەلدشەرلىك ماماندىعى بار سامالمەن بىرگە العاشقى مەديتسينالىق كومەك كورسەتۋگە كىرىسەدى. ءسويتىپ, ءمادينا ەسىمدى 1,5 جاستاعى كىشكەنتاي بوبەكتىڭ قىزۋىن ءتۇسىرىپ, ءوز-وزىنە كەلۋىنە كومەك قولىن سوزادى. ال «جەدەل جاردەم» بريگاداسى العاشقى مەديتسينالىق كومەكتىڭ دۇرىس جاسالعانى تۋرالى ءوز باعاسىن بەرىپتى.
اسكەري قىزمەتكەر مۇحتار ءوربىسىنوۆتىڭ قينالعان جانعا قول ۇشىن سوزعان ازاماتتىعى ءمادينانىڭ اكەسى ەرلان ءداۋلەتقاليەۆتىڭ №5546 ءاسكەري ءبولىم كومانديرى بەگايدار قۇرتتىباەۆقا جازعان حاتىنان كەيىن بەلگىلى بولدى. حات اۆتورى سەرجانت مۇحتار وربىسىنوۆكە قىزىن قۇتقارىپ قالعانى ءۇشىن العىسىن ءبىلدىرىپتى. ەندى اتالعان اسكەري ءبولىم سەرجانتتى ماراپاتقا ۇسىنىپ وتىر.
جولداسبەك شوپەعۇل,
«ەگەمەن قازاقستان».
اتىراۋ.