ايىپپۇلدىڭ «اششى» ءدامى-اي...

نەمەسە كوكتايعاقتان زارداپ شەككەندەردىڭ قاتارى قالىڭ قاقاعان قاڭتاردىڭ قاق ورتاسىندا جاڭبىر جاۋعاندى كوردىك. ارتىنشا اياز ۇرىپ, قاراعاندىنىڭ كوشەلەرى مۇز ايدىنىنا اينالدى. كوشەدەگى حالىق تۇساۋلى اتتاي كىبىرتىكتەپ, بىرەۋ شالقاسىنان قۇلادى, ەندى بىرەۋى ەتپەتىنەن ءتۇستى. اياق-قولىن شىعارىپ, مايىپ بولعانداردا ەسەپ جوق. جاڭبىر جاۋعان 11 قاڭ­­تاردىڭ وزىندە ءتۇرلى جاراقات العان 70-كە تارتا ادام دارىگەردىڭ كومەگىنە جۇگىنگەن... وسىدان كەلىپ, كوشەدەگى كوك­تايعاققا كىم جاۋاپ بەرەدى دەگەن سۇراق تۋادى. زاڭ بويىنشا شاعىن جانە ورتا بيزنەستىڭ كەز كەلگەن نىسانى نەمەسە قانداي دا ءبىر مەكەمە عيماراتىنىڭ اۋماعى دەپ جۇرگىنشى جولدىڭ جيەگىنە دەيىنگى ارالىقتى ايتامىز. ياعني, جەردى پايدالانۋشى وزىنە تيەسىلى وسى اۋماقتىڭ تازالىعى مەن قاۋىپسىزدىگىنە جاۋاپ بەرۋى ءتيىس. سولايى سولاي عوي, بىراق تا زاڭنىڭ بۇل تالابى كوپ جاعدايدا ورىندالماي جاتادى. ەندى بۇل شارۋا­نى اياقسىز قالدىرماۋدى قالالىق اكىمدىك ءوز قولىنا الدى. وزىنە تيەسىلى جەردىڭ قارىن تازا­لاماعان, مۇزىن ويماعان سالدىر-سالاق كا­سىپكەرلەرگە, مەكەمە باسشىلارىنا شىتىرلاتىپ تۇرىپ ايىپپۇل سالادى. جەكە تۇلعالارعا – 20 ايلىق ەسەپتىك كورسەتكىش (اەك), ال شاعىن, ورتا جانە ءىرى كاسىپكەرلىك سۋبەكتىلەرىنە 30-دان 100 اەك ارالىعىنداعى كولەمدە ايىپپۇل بەلگىلەنگەن. بۇگىنگى كۇنگە دەيىن كوشەسىن كۇرەمەگەن ءبىراز تۇلعالار ايىپ­پۇلدىڭ «اششى» ءدامىن تاتىپ ۇلگەردى. وسىلاي شومىشتەن قىسقاندا عانا اقشانىڭ قادىرىن جاقسى بىلەتىن اعايىن امالدىڭ جوقتىعىنان قولىنا كۇرەك الىپ, قيمىلداي باس­تادى. قارىن كۇرەپ, مۇزىن ويىپ, قۇ­مىن شاشىپ, تۇزىن سەۋىپ دەگەندەي... قايرات ءابىلدينوۆ, «ەگەمەن قازاقستان». قاراعاندى.