ەلباسى ن.ءا.نازارباەۆ جاھاندىق قاتەرلەردى شۇقىپ كورسەتىپ, ەڭسەرەتىن ناقتى جوسپارىن ۇسىندى. بەس ينستيتۋتتىق رەفورمانى جۇزەگە اسىرۋدىڭ «جول كارتاسىن» جاسادى. جاھاندىق ناقتى احۋال جاعدايىن ساراپقا سالا وتىرىپ «100 قادام» ۇلت جوسپارىن دايىندادى.
وسى ۇلى جوسپاردى ناقتى ومىردە ىسكە اسىرۋ قاينار كوزدەرىن كورسەتىپ «ۇلت جوسپارى – قازاقستاندىق ارمانعا باستايتىن جول» اتتى ساياسي ماقالاسىن حالقىنا ارناپ ءىس باسىندا وتىرعاندار الدىنا قويدى. وندا قوزعالعان ماسەلەلەردىڭ بىرنەشەۋىنە توقتالساق: بىرىنشىدەن, كادرلاردىڭ كاسىبي دەڭگەيىن كوتەرۋ. بۇل دەگەنىڭىز باسشىلىق كادرلارمەن قاتار قوعامدى العا سۇيرەيتىن جۇمىسشى توبىنا قازىرگى داۋىردەگى عىلىمي-تەحنيكالىق پروگرەستى يگەرتۋ, الەمدىك ستاندارت دەڭگەيىندە ءونىم وندىرەتىن مامانداردى دايىنداۋ دەگەن ءسوز; ەكىنشىدەن, زاڭ سالاسىن رەفورمالاۋ. مۇنىڭ دا قاتپار-قاتپار قىرتىسى, ساياسي جانە سانالىق ءيىرىمى, اسۋ بەرمەس ايقاي دۇنيەسىنە تازا اۋا كىرە باستادى; ۇشىنشىدەن, ەڭبەكتى باعالاۋ. بۇگىنگى جاعدايدا جۇمىسشىلار مەن ديحانداردىڭ توككەن تەرى مەن ەتكەن ەڭبەگىنىڭ جەمىسىن باسشىسى كورەتىن ادىلەتسىز جۇيەنى ورنىنا قويۋعا ۇلكەن ىقپال ەتەتىنىن ايتۋ ءجون سياقتى; تورتىنشىدەن, اشىق مەملەكەت قۇرۋ. جەمقورلىق جايلاعان مىنا زاماندا حالىقتىڭ قالتاسىنان جينالعان ۇكىمەتتىك قارجى مەن جەر بايلىعىنان قۇيىلىپ جاتقان مول بايلىقتىڭ قايدا, نەگە جۇمسالىپ جاتقانىن انىق تا اشىق باقىلاپ وتىرۋ ءۇشىن قۇقىقتىق تەتىگى قاجەت ەدى. مىنە, سول مولدىرلىكتى, ادىلەتتىلىكتى, ادالدىقتى ىسكە اسىراتىن جۇيە كوزىن ەلباسى ناقتى كورسەتىپ بەردى; بەسىنشىدەن, ينۆەستيتسيا, يننوۆاتسيالىق-يندۋستريالىق باعىتتى مىقتاپ ۇستانىپ ەل بايلىعىن مولايتۋ جولىن ەلباسى تاعى دا ناقتىلاپ بەردى.
وسىنىڭ ءبارى, اينالىپ كەلگەندە, تاۋەلسىزدىكتى ساقتاۋ, ۇلتتىق ۇيىسۋ پروتسەسىن قالىپتاستىرۋ بولماق. مۇندا ەكونوميكالىق بىرلىكپەن قاتار, ەلدىڭ يدەيالىق-رۋحاني سالاسىن قالىپتاستىرۋ ماسەلەسى تۇر. يدەيالىق-رۋحاني بىرىگۋ, توپتاسۋ عانا ەمەس ۇيۋ, ۇيىسۋ. مۇندا ۇلتارالىق كەلىسىم, بۇكىل حالىقتىڭ, ۇلتتىڭ ۇلتتىق ۇيىسۋ ماسەلەسىن ەلباسى ءسوز ەتىپ وتىر. بۇل وتە ۇلكەن ءارى جاۋاپتى جانە قازاق قوعامى ءۇشىن قاجەتتى پروتسەسس. بۇل پروتسەستى ىسكە اسىرۋ ارقىلى تاۋەلسىزدىگىمىزدى ماڭگىلىككە ساقتاي الامىز.
ەلباسى ەلىمدى, حالقىمدى قايتسەم داعدارىستان الىپ شىعامىن دەپ جانتالاسىپ جاتقان كەزدە, ءماجىلىس دەپۋتاتتارى مەرزىمىنەن بۇرىن سايلاۋ وتكىزۋ تۋرالى باستاما كوتەردى. بەسىنشى شاقىرىلىمداعى دەپۋتاتتار دا حال-قادەرىنشە جۇمىس جاسادى. ولاردىڭ جاساعان ءىسىن باعالاماي قويۋعا بولمايدى.
ەلباسىنىڭ جوعارىدا ءبىز ايتقان ۇلت جوسپارى جانە ونى ىسكە اسىرۋ ناقتى قادامدارىن ومىرگە ەنگىزۋ ءۇشىن بيلىك پەن حالىقتىڭ اراسىن ۇيىستىراتىن جاڭا كۇش, جاڭا لەپ, جاڭا يدەيا, جاڭا بۋىن قاجەت بولىپ تۇر ەدى. مىنە, سونىڭ كۇنى تۋدى.
جاڭادان شاقىرىلاتىن پارلامەنت سايلاۋىنا وي ەركىندىگى بار, زاماننىڭ اۋانىنا قاراي تىڭ يدەيالار ۇسىنا الاتىن, حالىق پەن ۇكىمەتتىڭ اراسىن بايلانىستىراتىن مەملەكەتشىل ازاماتتار, سونىڭ ىشىندە جاستار مول بولسا, ەل باسقارۋ ءىسىنىڭ جۇيكە-جۇيەسىنە تازا قان جۇگىرەر ەدى. سوندا بۇكىل الەم تولعاتىپ وتىرعان وسىناۋ الماعايىپ زاماندا قازاق قوعامى ۇلى وزگەرىستەرگە قازىرگىدەن دە گورى بەلسەندى ىلەسەر ەدى. جانە دە ەلباسى ۇسىنىپ, حالقىمىزدىڭ ارمانىنا اينالعان ۇلت جوسپارى جۇزەگە اسىپ, تاۋەلسىزدىكتىڭ قاسيەتتى كوك تۋىن تىك ۇستاپ, قازاق قوعامىنىڭ ماڭدايى جارقىراي تۇسەر ەدى.
قارجاۋباي سارتقوجا ۇلى,
پروفەسسور, تۇركىتانۋشى.
استانا.