پارلامەنت دەپۋتاتتارىنىڭ مەملەكەت باسشىسى ن.ءا.نازارباەۆتىڭ اتىنا جولداعان ۇندەۋى باتىسقازاقستاندىق جۇرتشىلىق وكىلدەرى اراسىندا ءتيىستى قولداۋ مەن تەرەڭ تۇسىنىستىك تاۋىپ وتىر. ەل مەن تۇرعىندار تىلەگىن ءارى ولاردىڭ سەنىمدەرىن ارقالاپ جۇرگەندەردىڭ ءبىرى جەرگىلىكتى ءماسليحات دەپۋتاتتارى ەكەنى انىق. وسى ورايدا, ورال قالالىق ءماسليحاتىنىڭ حاتشىسى ا.ءۇ.اۋبەكەروۆپەن اڭگىمە بۇگىنگى كۇنى بارشا قازاقستاندىقتار اراسىندا ۇلكەن جاڭعىرىق تۋعىزىپ وتىرعان ماسەلەلەر جونىندە ءوربىدى.
– اققالي ۇمبەتقالي ۇلى, پارلامەنت ءماجىلىسى مەن بارشا دەڭگەيدەگى ءماسليحات دەپۋتاتتارىن مەرزىمىنەن بۇرىن سايلاۋ جونىندەگى باستاما ءسىزدى قانداي ويعا قالدىردى؟
– جەكە ءوز باسىما قاتىستى ايتسام, پارلامەنت دەپۋتاتتارىنىڭ ەلباسىنىڭ اتىنا جازعان ۇندەۋىن «نۇر وتان» پارتياسىنىڭ ءمۇشەسى رەتىندە تولىعىمەن قولدايمىن. بۇگىنگى كۇنى ءار قازاقستاندىقتىڭ ەل مۇددەسىنە قىزمەت جاساي ءبىلۋى بۇرىنعى قاي كەزدەگىدەن دە ماڭىزدىراق بولىپ وتىر. بۇل ماسەلە ەلباسىنىڭ «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا دا جان-جاقتى سارالانعان. قازىرگى كۇنى ءبىز ءبارىمىز جاڭا مىندەتتەر مەن تەرەڭ جاۋاپكەرشىلىكتەر جۇكتەلەتىن كۇردەلى دە سىندارلى ءساتتىڭ الدىندا تۇرمىز. ءبىر ەسەپتەن ۇندەۋ وسىنداي تىڭ ىستەردى تەزىرەك قولعا الۋ قاجەتتىگىنەن دە تۋىندادى دەپ وي تۇيۋگە بولادى. وسىلايشا, پارلامەنت پەن جەرگىلىكتى ءماسليحات دەپۋتاتتارى مەرزىمىنەن بۇرىن قايتادان سايلاناتىن بولسا, تىڭ باستامالار مەن ىرگەلى ىزدەنىستەرگە مۇرىندىق بولا الاتىن تۇلعالار پارلامەنت قابىرعاسىنا كەلەدى دەگەن ويدامىن.
سونداي-اق, بۇل ءۇردىس قازاقستاندىق قوعامنىڭ ودان ءارى جاڭعىرىپ, ىستە جاڭا سەرپىن پايدا بولۋىنا دا ءوز اسەرىن تيگىزە الاتىنىنا ەشقانداي كۇمانىمىز جوق. ەڭ باستىسى, پارلامەنت دەپۋتاتتارى ۇندەۋى ءمانى جوعارى, قيسىنى بار شەشىم دەپ سانايمىن. وسى ارقىلى ۇلت بىرلىگىن ودان ءارى تەرەڭدەتىپ, داعدارىستىڭ تيگىزەتىن زيانىن جەڭىلدەتۋ جونىندە ۇتىمدى جولداردى بەلگىلەۋگە بولاتىنى انىق. قىسقاسى, مەرزىمىنەن بۇرىن سايلاۋ وتكىزۋ قازىرگى كۇردەلى كەزەڭنىڭ تالابىنان تۋىنداپ وتىرعانى كۇمانسىز. جەرگىلىكتى ءماسليحات دەپۋتاتتارىنىڭ كورپۋسى بولىپ سانالاتىن ارىپتەستەرىم دە بۇل ۇسىنىسقا كەلىسەدى دەگەن ويدامىن.
– ۇلت جوسپارى مەن بەس ينستيتۋتتىق رەفورمانى جۇزەگە اسىرۋ بويىنشا پراكتيكالىق قادامدار باستالىپ وتىر. بۇعان بايلانىستى قولعا الىنعان قانداي ىستەردى اتاپ كورسەتە الار ەدىڭىز؟
– وتە ورىندى سۇراق. وسى اپتادا وتكىزىلگەن وبلىستىق ءماسليحاتتىڭ كەزەكتەن تىس سەسسياسىنىڭ كۇن تارتىبىنە ىشكى ىستەر دەپارتامەنتى جەرگىلىكتى پوليتسيا قىزمەتىنىڭ باسشىسى لاۋازىمىنا ءماسليحات دەپۋتاتتارىنىڭ كەلىسىمىن بەرۋ تۋرالى ماسەلە ەنگىزىلدى. وسى ماسەلە بويىنشا جەرگىلىكتى پوليتسيا قىزمەتى باسشىسى لاۋازىمىنا بۇعان دەيىن بۇل سالادا ءوزىن جاقسى قىرىنان كورسەتە بىلگەن ماناربەك عابدۋلليندى تاعايىنداۋعا كەلىسىم بەرىلدى. ول بۇعان دەيىن ورال قالالىق ىشكى ىستەر باسقارماسىنىڭ باستىعى قىزمەتىن اتقارعان.
– بۇگىنگى كۇنى جەرگىلىكتى جەردە قوعامدىق كەڭەستەردى قۇرۋ ماسەلەسى ايرىقشا ماڭىزعا يە بولىپ وتىر. بۇل ماسەلەنىڭ قازىرگى جاي-كۇيىنە قاتىستى نە ايتار ەدىڭىز؟
– اتالعان ماسەلە جەرگىلىكتى دەپۋتاتتار كورپۋسى قىزمەتىنىڭ مازمۇنىن بايىتىپ, ودان ءارى تەرەڭدەتە الادى. ونىڭ مۇشەلەرى بەدەلدى, ىسكەر, ەل اراسىندا ابىرويلى ادامدار قاتارىنان ىرىكتەلەدى دەپ ەسەپتەيمىن. ولار قوعامداعى تۇيتكىلدى ماسەلەلەردى جەرگىلىكتى بيلىك ورگاندارىنىڭ نازارىنا جەتكىزە الاتىن, وي-ءورىسى كەڭ ادامدار قاتارىنان جاساقتالۋىنا نازار اۋدارىپ وتىرمىز.
اڭگىمەلەسكەن
تەمىر قۇسايىن,
«ەگەمەن قازاقستان».
باتىس قازاقستان وبلىسى.