2015 جىل ەلىمىزدەگى ارنايى ەكونوميكالىق ايماقتار ءۇشىن جەمىستى جىل بولدى. وتكەن جىلدىڭ قورىتىندىسى بويىنشا اەا-دا جالپى قۇنى 88 ميللياردتان اساتىن 17 ءىرى جوبا جۇزەگە اسىرىلدى. وسى جوبالار تولىق كۇشىنە ەنگەننەن كەيىن, ەل تۇرعىندارىن ەكى مىڭنان استام جۇمىس ورنىمەن قامتاماسىز ەتۋگە مۇمكىندىك بولادى.
بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا «KAZNEX INVEST» اق باسقارما توراعاسىنىڭ ورىنباسارى الماس ايداروۆ ءمالىم ەتتى. ونىڭ ايتۋىنا قاراعاندا, قازىرگى تاڭدا اەا-لار بويىنشا جالپى قۇنى 2,3 ترلن.تەڭگەدەن اساتىن 166 جوبا ىسكە اسقان. ولاردىڭ ىشىندە 34 ءىرى جوبالار شەتەلدىك ينۆەستورلارمەن بىرلەسىپ جاسالعان. ىسكە قوسىلعان ءىرى جوبالار قاتارىنا قۇنى 40 ملرد.تەڭگە بولاتىن قۇرعاق پورت, قۇنى 16,8 ملرد.تەڭگە بولاتىن مۇناي كوكسىن قىزدىرۋدى ورناتۋ جانە سينتەتيكالىق ءجىپ شىعارۋ مەن پوليمەرلىك ءونىم ءوندىرۋ, سونداي-اق, قۇنى 6 ملرد.تەڭگە بولاتىن ەلەكتروندى بولشەكتەر ءوندىرۋ جوبالارى كىرەدى.
سونىمەن قاتار, مەملەكەت باسشىسىنىڭ كوپشىلىككە جول تارتقان «100 ناقتى قادام» ۇلت جوسپارىندا ايتىلعان ينۆەستيتسيا تارتۋ ماسەلەسى دە ارنايى ەكونوميكالىق ايماقتاردا ينۆەستورلار تارتۋداعى باستى الاڭ رەتىندە ۇلكەن ءرول اتقارادى. بۇل رەتتە وتكەن جىلدىڭ وسى سالا توڭىرەگىندەگى جاقسى جاڭالىعى ەلباسىنىڭ «قازاقستان رەسپۋبليكاسىنداعى ارنايى ەكونوميكالىق ايماقتاردى جەتىلدىرۋ ماسەلەلەرى بويىنشا بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعاندىعى ەدى. اەا قاتىسۋشىلارىنىڭ, سونداي-اق, باسقارۋ ورگاندارىنىڭ قىزمەتىن جەتىلدىرۋگە باعىتتالعان زاڭ ارقىلى ەلدىڭ ەكونوميكالىق الەۋەتىن ارتتىرۋعا مۇمكىندىك تۋماق.
ال اتالعان زاڭدى ىسكە اسىرۋ ءۇشىن ونداعى 16 نورماتيۆتىك اكتىلەرگە وزگەرىستەر مەن تولىقتىرۋلار ەنگىزۋ جوسپارلانىپ وتىر. نورماتيۆتىك قۇقىقتىق اكتىلەر ازىرلەنىپ, ولار اككرەديتتەلگەن ۇيىمدار مەن مەملەكەتتىك ورگاندارعا كەلىسۋگە جولدانعان. بۇل زاڭ قولدانىستاعى ارتىقشىلىقتاردى الۋداعى قۇقىقتىق كەدەرگىلەردى جويۋعا جانە دامۋدىڭ جاڭا تاسىلدەرىن ەنگىزۋگە, الەۋەتتى ينۆەستورلار ءۇشىن قولايلى كليمات تۋدىرۋعا, اەا ساتىلى قۇرالىن جەتىلدىرۋگە, باسقارۋشى كومپانيالاردىڭ اەا قىزمەتىندەگى ءرولىن ارتتىرۋعا باعىتتالعان. جانە دە زاڭ اياسىندا اەا اۋماعىندا قىزمەتتىڭ باسىم تۇرلەرىن انىقتاۋ رەسىمدەرىن جەتىلدىرۋ, سالىق زاڭناماسىنىڭ تۇراقتىلىعىن ورناتۋ, جەر ۋچاسكەلەرىن جەڭىلدىكپەن پايدالانۋ مەرزىمىن اەا ارەكەت ەتۋ مەرزىمىنە تەڭەستىرۋ جانە باسقا دا رەداكتسيالىق تۇزەتۋلەر سەكىلدى تۇجىرىمدامالىق وزگەرىستەردى قاراستىرادى.
قازىرگى تاڭدا «بۋراباي», «وڭتۇستىك», «سارىارقا» اەا ينفراقۇرىلىمىنىڭ, «اقتاۋ تەڭىز پورتى» اەا 2 سۋبايماعىنىڭ قۇرىلىسى تولىعىمەن اياقتالدى. سونىمەن قاتار, الداعى جوسپارلار بويىنشا, ا.ايداروۆ 2016-2017 جىلدارى اەا قاتارىنداعى «قورعاس-شىعىس قاقپاسى», «يتپ», «استانا» جانە «تاراز حيمپاركى» قۇرىلىسى اياقتالادى دەپ كۇتىلەتىنىن جەتكىزدى. حيميا جانە مۇناي حيمياسى سالاسى نىساندارىنىڭ بىرەگەيلىگىنە بايلانىستى «ۇيمت» مەن «پاۆلودار» اەا-لاردا ينفراقۇرىلىم قۇرىلىسى 2018-2019 جىلدارى اياقتالاتىنىن اتاپ ءوتتى.
جالپى العاندا, 2020 جىلعا دەيىن بارلىق قولدانىستاعى اەا ينفراقۇرىلىمىن جاساۋ اياقتالاتىن بولادى. بۇگىنگى تاڭدا ارنايى ەكونوميكالىق ايماقتاردا 103 جوبا جۇزەگە اسىرىلۋ ساتىسىندا. تۇراقتى تۇردە اەا باسقارما ورگاندارىنىڭ قىزمەتىن جاقسارتۋ جونىندە جۇمىستار جۇرگىزىلۋدە. وتكەن جىلى «يتپ», «سارىارقا», «اقتاۋ تەڭىز پورتى», «وڭتۇستىك», اەا باسقارۋ ورگاندارىندا حالىقارالىق ستاندارتتار بويىنشا باسقارۋدىڭ بىرىڭعاي جاڭا مودەلىن ەنگىزۋ باستالدى. بيىل جالپى سوماسى 500 ملرد.تەڭگەنى قۇرايتىن 53 جوبانى ىسكە قوسۋ جوسپارلانىپ وتىر.
ەلميرا ماتىباەۆا,
«ەگەمەن قازاقستان».