قازاقستاندىق اۆتوسپورتشى قانات شاگيروۆ شتۋرمان ۆيتالي ەۆتەحوۆپەن بىرگە Africa Eco Race-2016 راللي-مارافونىنىڭ تۇجىرىمدى جالپى ەسەبىندە توپ جاردى. وسىلايشا «داكار» ءرالليىنىڭ كلاسسيكالىق مارشرۋتى بويىنشا وتەتىن ءداستۇرلى جارىستا قازاق سپورتشىسى تاريحي جەڭىسكە قول جەتكىزدى. Mobilex Racing كومانداسى ساپىندا سىنعا تۇسكەن وتانداستارىمىز جارىس جولىنا Toyota Overdrive كولىگىمەن شىققانىن اتاپ وتكەن ءجون.
دودا افريكا قۇرلىعىنداعى ماروككو, ماۆريتانيا جانە سەنەگال ەلدەرىنىڭ اۋماعىندا ءوتتى. سوڭعى 12-كەزەڭدە فرانتسۋزدىق ەكيپاج فيليپپ گوسسەلەن مەن پاسكال ۆينسەنت جەڭىسكە جەتتى. الايدا, بۇل كورسەتكىش جالپى ەسەپتەگى جاعدايعا ەشقانداي وزگەرىس اكەلگەن جوق. ناتيجەسىندە قازاقستاندىق سپورتشى قانات شاگيروۆ باستاعان ەكيپاج جەڭىستىڭ ەڭ بيىك تۇعىرىنان كورىندى. ءبىزدىڭ ساڭلاقتار ەكىنشى ورىن العان فرانتسيانىڭ تاعى ءبىر ەكيپاجى پاسكال توماس پەن پاسكال لاروكتى 25 مينۋت 24:48 سەكۋندقا ارتتا قالدىردى. ال كەلەسى فرانتسۋزدىق ۇجىم ماتە سەررادوري مەن ديدە اكەت جەڭىمپازداردان 1 ساعات 33:23 سەكۋندقا قالىپ, ۇزدىك ۇشتىكتى ءتۇيىندەدى.
Hummer كولىگىمەن سايىسقا تۇسكەن Mobilex Racing كومانداسىنىڭ تاعى ءبىر ەكيپاجى, قازاقستاندىقتار يۋري سازونوۆ پەن الەكسەي كۋزميچ جالپى ەسەپتە 8-ورىن السا, تاجىريبەلى شتۋرمان ارسلان ساحيموۆپەن بىرگە ونەر كورسەتكەن ءرالليدىڭ دەبيۋتانتى, قانداسىمىز ەردەن شاگيروۆ 27-ورىنعا تابان تىرەدى.
سونىمەن قاتار, سەريالىق «جول تالعامايتىن كولىك» ت2 كلاسى بويىنشا جارىسقا قاتىسقان جالعىز قازاقستاندىق وكىل, Off Road Kazakhstan كومانداسىنىڭ ەكيپاجى مارات ابىقاەۆ پەن اندرەي چيپەنكو جالپى ەسەپتە ەكىنشى ورىن الدى. ولار سايىسقا Toyota كولىگىمەن قاتىستى. بۇل سىندا قازاقستاندىق ەكيپاج Ford كولىگىن تاقىمداعان رەسەيلىك الەكساندر تەرەنتەۆ پەن الەكسەي بەركۋتكە ەسە جىبەردى. ال جارىستىڭ قولا جۇلدەسى Nissan كولىگىنە مىنگەن فرانتسۋزدار جوزەف روسسو مەن گاي لەنەفۆيۋگە بۇيىردى. ال ءابسوليۋتتى جالپى ەسەپتە مارات ابىقاەۆ 23-ورىنعا تۇراقتادى.
ايتا كەتەيىك, Africa Eco Race-2016 راللي-مارافونىندا قازاقستاندىق سپورتشىلار 12 كەزەڭنىڭ تورتەۋىندە توپ جاردى. اتاپ ايتقاندا, ءبىرىنشى جانە ءۇشىنشى كەزەڭدەردە يۋري سازونوۆ پەن الەكسەي كۋزميچ ەكيپاجى جەڭىسكە جەتسە, بەسىنشى جانە جەتىنشى كەزەڭدەردە قانات شاگيروۆ پەن ۆيتالي ەۆتەحوۆ مارە سىزىعىن ءبىرىنشى بولىپ قيدى.
ەلامان قوڭىر,
«ەگەمەن قازاقستان».