استانا. 11 قاڭتار. قازاقستان مۇسىلماندارى ءدىني باسقارماسىنىڭ ءباسپاسوز قىزمەتى زاڭ جۇزىندە ەش جەردە مويىندالماعان «قازاقستان مۇسىلماندار وداعى» دەگەن ۇيىمدى قۇرىپ, وعان ءوزىن باسشى ەتىپ تاعايىنداپ العان مۇرات تەلىبەكوۆ ەسىمدى ازاماتقا قاتىستى رەسمي مالىمدەمە جاسادى. بۇل تۋرالى «قامشى» پورتالىنىڭ دەرەگىنە سىلتەمە جاساعان egemen.kz ءتىلشىسى حابارلادى.
ءمۇفتيات وكىلى مۇرات تەلىبەكوۆتىڭ ارەكەتتەرىنىڭ ءبارىنىڭ قازاقستاننىڭ مۇسىلمان جاماعاتىنا ەشقانداي قاتىسى جوق ەكەنىن مالىمدەدى. «قمدب (قازاقستان مۇسىلماندارىنىڭ ءدىني باسقارماسى – رەد.) بۇعان دەيىن دە مۇرات تەلىبەكوۆ قازاقستاننىڭ بارلىق مۇسىلماندارى اتىنان سويلەۋگە قۇقىعى جوقتىعى, «قازاقستاننىڭ مۇسىلماندار وداعى» مۇسىلمان ۇيىمى ەمەس ەكەنى تۋرالى رەسمي مالىمدەمە جاساعان بولاتىن. ءبىز ادىلەت مينيسترلىگىنە دە سۇراۋ سالىپ, اتالعان ۇيىم تۋرالى مالىمەتتەردى ىزدەستىردىك. بىزگە مينيسترلىكتەن «قازاقستان مۇسىلماندارىنىڭ وداعى» دەگەن ۇيىمنىڭ تىركەلمەگەنى تۋرالى جاۋاپ كەلدى. بۇدان باسقا, مۇرات تەلىبەكوۆ ەشبىر ءدىني ۇيىمنىڭ باسشىسى نەمەسە مۇشەسى رەتىندە دە تىركەلمەگەن. وسىعان بايلانىستى قمدب ونىڭ ءوزىن قازاقستان مۇسىلماندار وداعىنىڭ باسشىسى دەپ تانىستىرۋىنا, باق-تاردا مۇسىلماندار اتىنان سويلەۋگە, ومىردە جوق ۇيىمنىڭ اتىنان اقپارات تاراتۋعا قۇقىعى جوق دەپ سانايدى», – دەلىنگەن مۋفتيات ءباسپاسوز قىزمەتىنىڭ جەتەكشىسى اعابەك قونارباي ۇلى بەرگەن مالىمدەمەدە.
«دىندەردى زەرتتەۋ ورتالىقتارى قاۋىمداستىعىنىڭ» ديرەكتورى يۋليا دەنيسەنكو دا وسىنداي پىكىر بىلدىرگەن. «ەل ىشىندە مۇرات تەلىبەكوۆتىڭ باق-تا كورىنۋ ءۇشىن اقپاراتتىق سەبەپ تۋعىزۋعا تىرىسىپ جۇرگەن ادام ەكەنىن ءبارى بىلەدى. ال شەتەلدىك قۇقىق قورعاۋ ورگاندارىن «قازاقستان مۇسىلماندار وداعى» شاتاستىرىپ كەلەدى. ادام قۇقىقتارىن قورعاۋ, تەرروريزممەن جانە ەكسترەميزممەن كۇرەس تاقىرىبىنداعى جيىنداردا, دوڭگەلەك ۇستەلدەردە ونىڭ پىكىرلەرى مۇسىلماندار ءدىني بىرلەستىگى اتىنان قابىلدانىپ قالادى. مۇرات تەلىبەكوۆتىڭ جىنىستىق قاتىناسقا سالىق ەنگىزۋ سياقتى دەسترۋكتيۆتى سوزدەرى قوعامدا تۇسىنبەۋشىلىك تۋدىرىپ, حالىقارالىق ۇيىمدارمەن بايلانىس ورناتۋ ارەكەتتەرىنە كەدەرگى جاسادى. سول ءۇشىن ونىڭ قازاقستان مۇسىلماندارى اتىنان سويلەۋىنىڭ جولىن كەسۋ كەرەك», – دەدى ول.
مۇرات تەلىبەكوۆتىڭ ءوزى «قازاقستان مۇسىلماندار وداعىنىڭ» «ماك» – Muslim اssociation of Kazakhstan جەكە قايىرىمدىلىق قورى رەتىندە تىركەلگەن ۇيىم ەكەنىن, وعان قولدانىستاعى زاڭنامالارعا سايكەس, مۇشەلىككە وتۋگە بولاتىنىن جانە ول ءۇشىن مۇسىلمان بولۋ مىندەتتى ەمەستىگىن ايتقان.
زاڭ جۇزىندە كۇشى جوق «قازاقستان مۇسىلماندار وداعى» دەگەن «ۇيىمنىڭ» باسشىسى رەتىندە تانىلىپ كەلگەن مۇرات تەلىبەكوۆ بۇعان دەيىن ءبىر ءوزى ەسەپتە تۇراتىن سول «ۇجىم» اتىنان مس سايلاۋبەك ەسىمدى رەپەرگە «جىل ادامى» اتاعىن بەرىپ, ميحايل سااكاشۆيليدى قازاقستاننىڭ ءبىر وبلىسىنا اكىم ەتىپ تاعايىنداۋدى, گريگوري مارچەنكونى قمدب توراعالىعىنا ۇسىنىپ, جىنىستىق قاتىناسقا تۇسەتىندەردەن سالىق جيناۋدى باستاما ەتىپ كوتەرىپ, ەلدى ءبىراز دۇرلىكتىرگەن.
قازىر الماتى قالاسى المالى اۋداندىق سوتىندا «مۇرات تەلىبەكوۆتىڭ «ۆەتەر س ۋليتسى» كىتابىنان قازاق حالقىنىڭ ار-نامىسىنا تيەتىن ۇزىندىلەر جاريالادى» دەگەن ايىپپەن ە. نارىمباەۆ جانە س. مامبەتالين ەسىمدى ازاماتتاردىڭ ۇستەرىنەن قىلمىستىق ءىس قارالىپ جاتىر. ال م. تەلىبەكوۆتىڭ ءوزى اتالعان كىتاپتىڭ اۆتورى ەكەنىن مويىنداعانىمەن, بۇل ەكەۋى جاريالاعان ۇزىندىلەرگە قاتىسىم جوق دەپ, ازار دا بەزەر بولىپ وتىر.
تالعات رايىمبەك.
دەرەك, فوتو: قامشى.