استانا. 11 قاڭتار. بۇگىن شۆەيتساريانىڭ تسيۋريح قالاسىندا حالىقارالىق فۋتبول فەدەراتسياسىنىڭ (فيفا) ءداستۇرلى گالا-كەشى وتەدى. وندا 2015 جىلدىڭ ەڭ ۇزدىك فۋتبولشىسى انىقتالىپ, وعان «التىن دوپ» تابىس ەتىلەدى. بۇل تۋرالى egemen.kz ءتىلشىسى حابارلادى.
«التىن دوپتان» باستى ءۇش ۇمىتكەر – يسپانيانىڭ «بارسەلوناسى» مەن ارگەنتينا قۇراماسىنىڭ شابۋىلشىسى ليونەل مەسسي, اتالعان كلۋب پەن برازيليا قۇراماسىنىڭ ويىنشىسى نەيمار جانە پورتۋگاليا قۇراماسى مەن يسپانيانىڭ «رەال مادريد» كومانداسىنىڭ جارىق جۇلدىزى كريشتيانۋ رونالدۋ.
بۇگىن كەشتە وسى ءۇش ويىنشىنىڭ ءبىرى اتالعان سىيلىقتىڭ يەگەرى اتانادى. وسى رەتتە, مەسسي مەن رونالدۋدىڭ بۇعان دەيىن «التىن دوپتى» العانىن اتاپ وتكەن ءجون. ناقتى ايتقاندا, مەسسي قاتارىنان ءتورت رەت, ياعني, 2009, 2010, 2011 جانە 2012 جىلدارى الەمنىڭ ەڭ ۇزدىك ويىنشىسى اتانسا, رونالدۋ 2008, 2013 جانە 2014 جىلداردىڭ ۇزدىگى بولدى. ال نەيمار ۇزدىك ءۇش ۇمىتكەردىڭ قاتارىنا العاش رەت قوسىلىپ وتىر.
سونىمەن قاتار, بۇگىنگى كەشتە «جىل جاتتىقتىرۋشىسى», «ۇزدىك ايەلدەر فۋتبولىنىڭ جاتتىقتىرۋشىسى» سىندى اتالىمدار بويىنشا ۇزدىكتەر ماراپاتتالىپ, ەڭ ادەمى سوعىلعان گولدىڭ اۆتورىنا بەرىلەتىن فەرەنتس پۋشكاش سىيلىعى مەن ادال ويىن ءۇشىن تاعايىندالعان «فەير-پلەي» سىيلىقتارىنىڭ يەگەرلەرى بەلگىلى بولادى.
ايتا كەتەيىك, «التىن دوپتى» تاپسىرۋ ءۇردىسىن العاش رەت 1956 جىلى France Football جۋرنالى ۇيىمداستىردى. باستاپقىدا اتالعان سىيلىق تەك ەۋروپانىڭ ۇزدىك ويىنشىسىنا بەرىلىپ كەلدى. ال فيفا 1991 جىلدان باستاپ جىلدىڭ ۇزدىك ويىنشىسىنا ءوز سىيلىعىن تاعايىندادى. وسىدان 6 جىل بۇرىن ەكى جۇلدەنى بىرىكتىرۋ تۋرالى شەشىم شىقتى. سول 2010 جىلدان باستاپ جاڭادان تاعايىندالعان «التىن دوپتى» تەك مەسسي مەن رونالدۋ كەزەكتەسىپ الىپ كەلە جاتقانىن نازارعا العان ءجون.
جىلدىڭ ەڭ ۇزدىك ويىنشىسى بارلىق ۇلتتىق قۇرامالاردىڭ باس جاتتىقتىرۋشىلارى مەن كاپيتاندارىنىڭ جانە جۋرناليستەردىڭ داۋىس بەرۋى ارقىلى انىقتالادى. بۇگىنگى گالا-كەش استانا ۋاقىتىمەن ساعات 22:00-دە باستالادى.
ەلامان قوڭىر.
دەرەك: egemen.kz.
سۋرەت: eurosport.ru.