استانا. 11 قاڭتار. موردوۆيانىڭ 91 جاستاعى تۇرعىنى ەلەنا ۆيازوۆاعا 1941-1945 جىلدار ارالاعىندا بولعان ەكىنشى دۇنيەجۇزىلىك سوعىس پەن سوۆەت-جاپون اراسىندا بولعان ۇرىسقا قاتىسقانى ءۇشىن 70 جىلدان سوڭ بارىپ, اسكەري مەدالدار تاپسىرىلدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
«سالتاناتتى ءراسىم ەلەنا ۆيازوۆا تۇراتىن موردوۆيا رەسپۋبليكاسىنىڭ ەلنيك ەلدى-مەكەنىندە ءوتتى. وعان «1941-1945 جىلدارى بولعان ۇلى وتان سوعىسىنداعى جەڭىسى» مەن «جاپونيامەن ارادا كيكىلجىڭدەگى جەڭىسى» ءۇشىن ەكى مەدال تاپسىرىلدى», – دەيدى ءباسپاسوز قىزمەتى.
موردوۆيانىڭ اسكەري كوميسسارى يگور تيحوميروۆتىڭ ايتۋىنشا, 70 جىل بۇرىن بەرىلۋى ءتيىس ناگرادانىڭ ءالى كۇنگە دەيىن تاپسىرىلماعانىن وتكەن جىلى ەلەنا ۆيازوۆانى جەڭىستىڭ 70 جىلدىعىمەن قۇتتىقتاپ كەلگەن كەزدە عانا بىلگەن. وسىعان دەيىن ۋادەلى سىيلىعىنىڭ ورنىنا مەدالدىڭ ۋاقىتشا كۋالىگىن العان.
سوعىس جاڭادان اياقتالعان كەزدەرى ارداگەرلەرگە جاعدايدىڭ قىسىل-تاياڭىنا بايلانىستى ۋاقىتشا قاعازدار تاراتىلعان. كەيىننەن تيەسىلى مىدالدارى دا تاپسىرىلدى. كوميسساريات قىزمەتكەرلەرى مۇراعاتتاردان ىزدەۋ جۇمىستارىن باستادى. وسىعان بايلانىستى رەسەي فەدەراتسياسىنىڭ كادر باسشىلىعىنا سۇرانىس جىبەردى.
ايماقتىڭ اسكەري كوميسساريات قىزمەتكەرلەرى ەلەنا ۆيازوۆانىڭ وسىعان دەيىن «ستالينگراد قورعانىسى» مەدالىمەن ماراپاتتالعانىن ايتتى. سوعىس جىلدارى نەبارى 15 جاسىندا اسكەري قاتارعا ءوز ەركىمەن قوسىلىپ, جاساققا الىنعان. ستالينگراد شايقاسىنان كەيىن رجەۆتەگى ءۇشىنشى بەلورۋستىق فرونتىنا كومەكتەسكەن. بۇل جەردەن ول فرونتتىق جولىن شىعىس پرۋسسياعا دەيىن جالعاستىردى. ارتىنشا, مانچجۋرياعا دا قوسىلدى. جاپونيانى جەڭگەننەن سوڭ, جارىنىڭ تۋعان اۋىلى ورنالاسقان موردوۆياعا قونىس اۋدارعان. وندا ول ۇزاق جىلدار بويى ساۋىنشى بولعان.
ايان ءابدۋالي.
دەرەك: تاسس.
سۋرەت: ria.ru.