استانا. 11 قاڭتار. قازاقستان رەسپۋبليكاسى قارۋلى كۇشتەرىنىڭ بولىمدەرى مەن قۇرامالارىندا 2016 جىلى وقۋ بىتىرەتىن كادەتتەردىڭ اسكەري تاعىلىمداماسى باستالدى. بۇل تۋرالى egemen.kz ءتىلشىسى حابارلادى.
تاعىلىمداما قورعانىس مينيسترلىگى كادەت كورپۋسىنىڭ ۇيرەنۋشىلەرى ءۇشىن جاڭا تاجىريبە مەن قارۋلى كۇشتەردىڭ اسكەري بولىمدەرى مەن بولىمشەلەرىندە ناعىز قىزمەتتى تانىپ-ءبىلۋدىڭ العاشقى مۇمكىندىگى.
بارلىعى پراكتيكالىق ساباقتارعا ەكىنشى كۋرستىڭ 185 كادەتى تارتىلادى. ولاردىڭ 53-ءى «باتىس» وڭىرلىك قولباسشىلىعىندا, 45 كادەت اەروۇتقىر اسكەرلەرىندە, 35-ءى «وڭتۇستىك» وڭىرلىك قولباسشىلىعىندا, تاعى 52 كادەت «شىعىس» وڭىرلىك قولباسشىلىعىندا تاعىلىمدامادان وتەدى.
اسكەري تاعىلىمدامانىڭ مەرزىمى ەكى اي. وسى ۋاقىت ىشىندە بولاشاق سەرجانتتار كادەت كورپۋسىنىڭ قابىرعاسىندا العان تەوريالىق, پراكتيكالىق داعدىلارى مەن شەبەرلىكتەرىن پىسىقتاۋى, قارۋلى كۇشتەردەگى شىنايى قىزمەتكە دايىندالۋى, كاسىپقوي كوشباسشىنىڭ ماشىعىن جەتىلدىرۋى ءتيىس.
ەلىمىزدەگى بىردەن-ءبىر ش.ءۋاليحانوۆ اتىنداعى قورعانىس مينيسترلىگىنىڭ كادەت كورپۋسى وسى جىلى ءوزىنىڭ 20 جىلدىعىن اتاپ وتەدى.
20 جىلدا كادەت كورپۋسىنىڭ قابىرعاسىنان 2 400-دەن اسا كىشى كوماندالىق قۇرام ماماندارى تۇلەپ شىقتى. بۇگىندە «اسكەري باسقارۋدىڭ كىشى مامانى» ديپلومى جانە بىلىكتىلىگىمەن, ءجاجم-ءنىڭ مەحانيك-جۇرگىزۋشىسى جانە «ۆ», «س» ساناتىنداعى جۇرگىزۋشى كۋالىگىمەن ولاردىڭ بارلىعى قازاقستاندىق ارميادا قىزمەت ەتۋدە. قم كادەت كورپۋسىنىڭ تۇلەكتەرى قاتارىندا بولىمشە كومانديرىنەن باستاپ قارۋلى كۇشتەرىنىڭ باس سەرجانتىنا دەيىنگى لاۋازىمداردا وزدەرىنىڭ اسكەري بورىشىن جوعارى ءارى لايىقتى دەڭگەيدە اتقارىپ جۇرگەن كوپتەگەن دارىندى اسكەري قىزمەتشىلەر بار.
داستان كەنجالين.
دەرەك, سۋرەت: egemen.kz