وسكەمەندىك كاسىپكەر, «ءلاززات» تىگىن تسەحىنىڭ جەتەكشىسى ايگۇل تۇڭعاتاروۆا – سال اۋرۋىمەن جەتى جىل توسەك تارتىپ جاتسا دا, ءوز ءومىرىن ءوزى قولىنا الىپ, اياقتان نىق تۇرعان, جەكە كاسىبىن قۇرعان ەرىك-جىگەرى ەرەكشە جان. ەكىنشى توپتاعى مۇگەدەك ايەل الەۋمەتتىك جاردەماقى كولەمىنىڭ ارتۋى كەمباعال جانداردىڭ تۇرمىسىنا سەپ بولاتىندىعىن ايتادى.
– ادامدى العا جەتەلەيتىن – ەڭبەك پەن ەرىك-جىگەر. ەلباسىمىز وسى قاسيەتتەردى ارقاشان ەلىمىزگە ۇلگى ەتىپ كەلەدى. ءبىز, ومىردە قانشاما قيىندىق كورسەك تە, ەڭبەكتىڭ ارقاسىندا كوزدەگەن ماقساتىمىزعا جەتتىك. ايتالىق, بۇگىندە اتەلەمىزدە مۇگەدەكتىكتىڭ ءارتۇرلى توبىنا جاتاتىن 14 ادام ەڭبەك ەتەدى. ال جالپى وبلىس كولەمىندە 18 ادامدى جۇمىسپەن قامتىپ وتىرمىز. كاسىپورنىمىزدا جۇزدەن استام توسەك-ورىن جابدىقتارى مەن ارنايى كيىم تۇرلەرىن شىعارامىز.
پرەزيدەنت جۋىرداعى جولداۋىندا جاڭا الەۋمەتتىك ساياسات جۇزەگە اسىرىلاتىنىن مالىمدەدى. ياعني, مەملەكەت ءالسىز قورعالعان ازاماتتاردى قولدايدى. مۇقتاج ادامدارعا اتاۋلى الەۋمەتتىك كومەك كورسەتەدى. بىراق بۇل مەملەكەتكە ءبىرجولا ماسىل بولۋ دەگەندى بىلدىرمەسە كەرەك. وسى ورايدا مەملەكەت باسشىسى «باسقالار تابىستى ءوز ەڭبەكتەرىمەن تابۋى ءتيىس», دەپ اتاپ كورسەتتى.
البەتتە, قازاقستاندا الەۋمەتتىك جاعىنان از قامتىلعان ادامدارعا مەملەكەت تاراپىنان كوپ كوڭىل بولىنەدى. مىسالى, مەن الەۋمەتتىك جاردەماقى الامىن. بيىل بۇل كومەك 1 قاڭتاردان باستاپ 30 پايىزعا ارتاتىنى ەرەكشە قۋانتادى. سونداي-اق, ءبىز جىلىنا ءبىر مارتە مەملەكەتتىڭ قولداۋىمەن ەمدىك-ساۋىقتىرۋ شيپاجايىنا جولداما الامىز. 2015 جىلدىڭ 11 جەلتوقسانىندا كىل مىقتى كاسىپكەرلەر قاتىسقان «التىن ساپا» بايقاۋىنىڭ «ىسكەر» اتالىمى بويىنشا جەڭىمپاز بولىپ تانىلدىق. پرەزيدەنت نۇرسۇلتان ءابىش ۇلىنىڭ الدىندا ءوز ونىمدەرىمىزدى كورسەتۋگە مۇمكىندىك الدىق. مۇنىڭ بارلىعى ەڭ الدىمەن ەلباسىنىڭ, تاۋەلسىز مەملەكەتىمىزدىڭ قولداۋى مەن قازىرگىدەي قارجىلىق قىسپاق كۇشەيگەن زاماندا ءوز ازاماتتارىن قيىندىققا قالدىرمايتىنىنىڭ كورىنىسى دەپ بىلەمىن.
جازىپ العان
دۋمان اناش,
«ەگەمەن قازاقستان».
وسكەمەن.