گازەتىمىزدىڭ بيىلعى جىلعى ءبىرىنشى نومىرىندە «210 932!» دەگەن تاقىرىپپەن جاريالانعان كىرىسپە ىسپەتتەس ماقالانىڭ ءىزىن ينتەرنەت-سايت ارقىلى قۋالاپ جەتكەن كوممەنتتەر اۆتورلارىنىڭ ءبىرى ويىن تاپ وسىلاي: «جاقسى كورسەتكىش. بۇل – ەلدىكتىڭ بەلگىسى!» دەپ ءبىلدىرىپتى. كورنەكىلەپ كورسەتىلگەن وسى ايشىقتى كورسەتكىشكە بايلانىستى ءبىزدىڭ دە تۇجىرىمىمىز وسىنداي. سوندىقتان وسى ءماتىندى تاقىرىپقا شىعاردىق.
بۇل جەردە «كورسەتكىش» دەپ وتىرعانىمىزدىڭ نەندەي نارسە ەكەنىن وسى ماقالادان حابارى بار وقىرمان بىردەن بىلە قويعان شىعار دەگەن ويدامىز. اڭگىمە گازەتىمىزدىڭ بيىلعى جىلعى تارالىم سانى جونىندە بولىپ وتىر. ءيا, «ەگەمەن قازاقستان» 2016 جىلدىڭ 1 قاڭتارىنان باستاپ 210 932 دانا تيراجبەن تارالا باستادى. بۇل – ءبىزدىڭ ەلىمىزدىڭ گازەتتەرى تاريحىندا بۇرىن-سوڭدى بولماعان جوعارى كورسەتكىش. ەكى ءجۇز مىڭدىق مەجەگە 2011 جىلى جەتكەن ەلىمىزدىڭ باس باسىلىمى سودان بەرى تارالىم سانىن جىل سايىن ساتىلاپ وسىرۋمەن كەلەدى. ال بيىل ول, ءتىپتى, كۇرت كوتەرىلىپ, 210 مىڭنىڭ ۇستىنە ءبىر-اق شىقتى.
البەتتە, مۇندا گازەتىمىزدى جازدىرىپ الۋ داستۇرىنەن اينىماعان, سونىمەن بىرگە, قاتارى ۇدايى تولىعىپ وتىرعان وقىرمان قاۋىمنىڭ ەڭبەگى وراسان زور. وسىنىڭ ءوزى, راسىندا, ءبىزدىڭ ەلدىگىمىزدىڭ ءبىر كورىنىسى ءتارىزدى. مۇنداي رۋحاني جەتىستىككە بەرەكە-بىرلىگى جاراسقان, تاتۋ-ءتاتتى ەلدە ءومىر ءسۇرىپ جاتقان حالىق قانا جەتە السا كەرەك.
اتالعان ماقالاعا پىكىر قوسۋشىلار مۇنى دا لايىقتى باعالاي ءبىلىپتى. وقىرماندار تالقىسىنان ەلىمىزدىڭ ءار ايماعىنداعى باسپاحانالاردا گازەتتىڭ قانشالىقتى مولشەردە باسىلىپ شىعاتىنى دا تىس قالماپتى. كەرەك دەسەڭىز, وسىنىڭ ءوزى دە شىن جاناشىرلىقتى تانىتادى. سوندىقتان بۇعان دا سۇيسىنە قاراعانىمىزدى جاسىرا المايمىز. ال ءبىز ءوز تاراپىمىزدان سىزدەردىڭ سۇيىكتى باسىلىمدارىڭىزدى بۇرىنعىدان دا تارتىمدى, تانىمدى, تاعىلىمدى, وقىلىمدى ەتە ءتۇسۋ جولىندا قالام قايراتىن اياپ قالمايتىنىمىزدى جەتكىزگىمىز كەلەدى.
ەندى وقىرماندارىمىزدىڭ ماقالامەن تانىسا سالا, جوپەلدەمەدە جازىپ جونەلتكەن جەدەل پىكىرلەرىنە كەزەك بەرەيىك.
جۋرناليست
تاماشا تابىس.
قۇرمەت
«ەگەمەن» قازاق گازەتتەرىنىڭ ىشىندە وزگەلەرمەن تەرەزەسى تەڭ بيىككە كوتەرىلىپ وتىر. قازاق ەلىنىڭ پاتريوتتارى ءۇشىن جاڭا جىلعا ءسۇيىنشىلى جاڭالىق.
باتىرحان
باسىلىم بەكەردەن-بەكەر «ەل گازەتى «ەگەمەن» دەگەن اتاققا يە بولىپ وتىرعان جوق. قاشاننان سابىرلى دا ساليقالى پىكىرىمەن حالىقتىڭ سەنىمىنەن شىعىپ كەلەدى.
راۋان
قاشاندا حالىققا جاعىمدى جاڭالىعىمەن تانىلعان گازەت. ەلدى جاقسى كۇندەردەن ءۇمىتتەندىرىپ وتىرادى. سوندىقتان, حالىق تا جاقسى كورەدى.
گۇلزيرا
ەلدەگى جاعىمدى جاڭالىقتاردى حالىققا جەدەل جاريالاپ وتىرادى. قارا اسپاندى توندىرمەيدى, سونىسى بارىنەن جاقسى.
جاھانگەر
بۇل كورسەتكىش ەلىمىزدىڭ باس گازەتى – «ەگەمەن قازاقستاننىڭ» بيىك بەدەلىن ايعاقتايدى. جاقىندا عانا رەداكتسيا جانىنان جاڭا عيمارات تۇرعىزىلىپ, جۋرناليستەر تولىق باسپانامەن قامتىلدى. ەلدىڭ الەۋمەتتىك, ساياسي, ەكونوميكالىق, رۋحاني ماسەلەلەرى جونىندە تەرەڭنەن وي تولعاپ, ەل سەنىمىن قاشاندا اقتاپ جۇرگەن باس باسىلىمنىڭ وتاندىق باق-قا ۇلگى بولار تۇستارى جەتەرلىك. وقىرماندارىڭىز بۇدان دا ارتا ءتۇسسىن دەگىم كەلەدى.
داريعا
وتە تاماشا تابىس. قانشا جەردەن اكىمشىلىك رەسۋرسى قوسىلدى دەگەنمەن, مىناداي تابىسقا جەتۋ ءۇشىن دە گازەتتىڭ وقىلىمدىلىعى كەرەك. ال اۋىل-ايماقتاردا, مەكتەپتەر مەن مادەنيەت مەكەمەلەرىنىڭ قالاي دەگەندە دە «ەگەمەن قازاقستانسىز» كۇنى جوق. ولار وزدەرىنە كەرەكتى ساياسي-تاريحي اقپاراتتىڭ دەنىن وسى باسىلىمنان الادى.
قايرات, وڭتۇستىك قازاقستان
«ەگەمەننىڭ» «ەتجەڭدى» ءنومىرىن ءسۇيىپ وقيمىن. وندا تاريحي, رۋحاني, تانىمدىق, ادەبي, قۇقىقتىق تاقىرىپتاردا جازىلعان كەرەمەت ماقالالار جاريالانادى. گازەت بەتتەرىنەن وزگە بىردە-ءبىر ءباسپاسوز قۇرالدارىندا كەزدەسپەيتىن تىڭ ماتەريالداردى كەزدەستىرۋگە بولادى. ودان ءارى دامىپ, وركەندەۋلەرىڭىزگە تىلەكتەسپىن.
ومار
قۇرمەت, قاتەلەسپەڭىز, «ەگەمەن» وزگەلەرمەن «تەرەزەسى تەڭ بيىككە كوتەرىلىپ» وتىرعان جوق. ول باياعىدان قازاق گازەتتەرىنىڭ فلاگمانى, كوش باستاۋشىسى, ال باسقا باسىلىمدار ونىڭ جەتكەن بيىگىنىڭ جارتىسىنىڭ جارتىسىنا دا جەتكەن جوق. ادام ءسوزدى دۇرىس قۇراستىرا ءبىلۋى كەرەك, ويدى دۇرىس, اشىق ايتا الۋى كەرەك.
ليزا
جاقسى ەكەن. ماڭعىستاۋ وبلىسىنىكىن دە از كورىپ وتىرمىن. 500 مىڭ حالىقپەن, كوبىسى قازاق بولا تۇرا, 7 مىڭعا دا جەتپەيدى.
رينات
قازاق ءباسپاسوزىنىڭ جەتىستىگى. جازار كوبەيسىن!
ماعجان
ۇلكەن تابىس! ەل گازەتى وقىرمانداردان لايىقتى باعاسىن الىپ وتىر.
عاني
گازەتتىڭ «ەتجەڭدى» نومىرلەرى قىزىقتى وقىلادى. كۇندەلىكتى ساندارى دا جاقسى, وقىلىمدى بولىپ شىعىپ جاتىر.
ماقسات
جاقسى كورسەتكىش. بۇل – ەلدىكتىڭ بەلگىسى. ەل ەكەنبىز, اعايىن!
قوستانايلىق
قۇتتى بولسىن جاڭا تيراج! قوستانايعا قاتىستى. مۇنداعى دەموگرافيالىق جاعدايدى جانە قالىپتاسىپ قالعان مەنتاليتەتتi ەسكەرiڭiز, سوندا بiزدiڭ وڭتۇستiك قازاقتارىنان كەم پاتريوت ەمەس ەكەنiمiزدi بiلەتiن بولاسىزدار!
تۇرار
شىنى كەرەك, «ەگەمەن قازاقستان» گازەتىن وقىپ وتىرىپ, ەلدە بولىپ جاتقان جاڭالىقتارعا مەيلىنشە قانىق بولاسىڭ. تاۋەلسىز ەلىمىزدىڭ كۇننەن كۇنگە قارىشتاپ, دامىپ جاتقانىن وسى گازەتىمىز العاش بولىپ حابارلاپ جاتادى. ەندىگى ءبىر ءوتىنىش: ەكونوميكالىق داعدارىس ۇلى دالا ەلىنە قانشالىقتى كەرى اسەرىن تيگىزىپ جاتقانىن ەگجەي-تەگجەيلى جازساڭىزدار ەكەن. قانشا دەگەنمەن, قۋانىش پەن قايعىنىڭ قاتار ءجۇرۋى زاڭدىلىق قوي.
ايقىن
«ەگەمەن قازاقستان» قانشاما ىزگى تۇلعالار قىزمەت ەتىپ كەتكەن حالقىمىزدىڭ تاريحي گازەتتەرىنىڭ ءبىرى.
ايقىن
جاسا, قازاق ەلى! ەلىمنىڭ قۋانىشىن قۇر جىبەرمەي, حالقىمنىڭ مەرەيىن اسىرىپ تۇرعان باس گازەتىمىز! ءاربىر سانىن جىبەرمەي وقىپ جۇرەمىن.
ەسبول
«ەگەمەننىڭ» ۇجىمىن باعىندىرعان جاڭا بەلەستەرىمەن قۇتتىقتايمىن. ەڭبەكتەرىڭىز جانسىن! «اناۋ – اناداي, مىناۋ – مىناداي» دەپ, جۇرتتى ۇركىتىپ-قورقىتا بەرگەننەن گورى, حالىققا وپتيميستىك پىكىر قالىپتاستىرىپ, العا جەتەلەيتىن گازەت دەپ بىلەمىن مەن مۇنى. قاتپارلى تاريحى بار, ەلىمىزدىڭ ايتۋلى تۇلعالارى جۇمىس جاساعان اعا گازەتتىڭ قازىرگى ۇجىمى دا وسال ەمەس. ءبارىن وقىپ-بىلىپ ءجۇرمىز. الدا دا گازەت جۇمىسىنا ساتتىلىك, جۋرناليستەرگە تابىس تىلەيمىن. جاڭا جىلدى جاقسى تابىسپەن باستادىڭىزدار, جالعاسىن تابا بەرسىن!
ىقىلاس
ۋنيۆەرسيتەتتە وقىپ جۇرگەنىمدە «ەگەمەن قازاقستان» گازەتىن ىزدەپ قينالمايتىنمىن. تيراجى دا از ەمەس. الداعى ۋاقىتتا جاپونيانىڭ كۇنىنە ءۇش مەزگىل شىعاتىن گازەتتەرىنىڭ دارەجەسىنە جەتسىن دەپ تىلەيمىن!
اسىلان
ەكى ءجۇز مىڭنان استام تارالىمى بار گازەتتىڭ ەل الدىنداعى بەدەلى بارىمىزگە بەلگىلى. قارىشتاپ دامىعان ۇستىنە دامي بەرسىن دەپ تىلەيمىن!
قاسىم, شىمكەنت
فاريدات دۇرىس ايتادى, قوستاناي سەكىلدى بۇرىنعى ەكى وبلىستىڭ باسىن قوسىپ وتىرعان ايماق ءۇشىن مىنا كورسەتكىش ءالى دە تومەن. بۇل وبلىستا بۇرىنعى اكىمنىڭ كەزىندە قازاق تىلىنە ءتىپتى دە ءمان بەرىلگەن جوق, ول ەكىنشى نە ءۇشىنشى پلانعا ىعىسىپ كەتتى. بوساعادان سىعالاپ قارايتىن كۇنگە جەتتى. مۇنىڭ ءبارى سونىڭ سالقىنى بولسا كەرەك.
سافۋرا, استانا
مەن ءوزىمنىڭ تۋعان قىزىلوردامنىڭ وسىناۋ ۇلى كوشتە ءوڭتۇستىك قازاقستاننان كەيىن ەكىنشى بولىپ كەلە جاتقانىنا قاتتى رازىمىن. قازاعىنىڭ سانى جاعىنان ول شىمكەنتتەن ءۇش ەسە كەم. سول سياقتى, قازاقتارى سانى بويىنشا شىعىس قازاقستان, جامبىل, الماتى, اقتوبە سەكىلدى وبلىستاردان دا كەيىن. بىراق مىنا كورسەتكىشى ولاردان الدەقايدا كوپ. ءتانتىمىن ساعان, سىر ءوڭىرى!
سالىمگەرەي, اتىراۋ وبلىسى
گازەتتىڭ تابىسىنا ءسۇيسىنىپ وتىرمىز. بۇل, شىنىندا دا, زور تابىس. وندا گازەت جۋرناليستەرىنىڭ ينەمەن قۇدىق قازعانداي اۋىر بەينەتتەرى جاتىر. ال, ونىڭ ءبىر زەينەتى وسى – تولاعاي تارالىم.
الماس ومىربەك
تاماشا كورسەتكىش ەكەن. گازەتتىڭ بۇكىل قىزمەتكەرلەرىنىڭ, اسىرەسە, مەنشىكتى تىلشىلەردىڭ ەڭبەگى باعالاۋعا تۇرارلىق. ءبىزدىڭ شىعىس قازاقستان وبلىسى 12 مىڭعا جەتىپ جىعىلعان ەكەن. جاقسى ناتيجە. وسى قارقىننان تايماڭىزدار. ەڭبەكتەرىڭىز جەمىستى بولسىن!
اسەل, وسكەمەن قالاسى
ءبىر عاسىرعا تاياۋ تاريحى بار «ەگەمەن قازاقستان» گازەتى — بارشا قازاق قاۋىمى جۇمىلا وقيتىن, ازاماتتارىمىزدىڭ دۇرىس قوعامدىق ساناسىن قالىپتاستىرىپ وتىرعان گازەت. «ەگەمەن قازاقستاندى» ۋنيۆەرسيتەتىمىزدىڭ كىتاپحاناسىنان, وبلىستىق كىتاپحانامىزدان, رەسمي سايتتان وقىپ وتىرامىز. ماتەريالدارى مازمۇن جاعىنان دا, جۋرناليستەردىڭ ءتىلدى قولدانۋ شەبەرلىگى مەن ءستيلى جاعىنان دا بيىك دەڭگەيدە. دۇنيەتانىمىمدى كەڭەيتىپ, ءاردايىم اقپاراتپەن قارۋلانىپ جۇرەمىن دەگەن وقىرمان ءۇشىن عانا ەمەس, جازۋ ماشىعىن قالىپتاستىرامىن, ۇلگى قىلامىن دەگەن جاس قالامگەر ءۇشىن ءبىر ءوزى ءبىر مەكتەپ.
جانار
پاۆلودار ورىس ءتىلدى ايماق بولسا دا كوپ تيراج جاساپتى. وڭىرلەردەگى جۋرناليستەردىڭ ەڭبەگى ەرەن. اۋىر جۇمىستى ەر ازاماتتارمەن بىردەي كوتەرىپ جۇرگەن قىزدارىڭ قايراتتى ەكەن, «ەگەمەن»!