«ەسكى ايىم ەسىركە, جاڭا ايىم جارىلقا!» – دەيدى قازاق. ەسكى جىلدان ەڭسەمىز تۇسكەن جوق, جاڭا جىلدان جارىلقاۋ كۇتەمىز. قوڭىر مىنەز حالىقتىڭ نيەت-پەيىلىنە وراي, قوي جىلى مولشىلىق, ىرىس جىلى بولدى. ەڭ باستىسى, قازاق دەگەن قاراپايىم حالىقتىڭ باۋىرى ءبۇتىن, باسى امان. ارمانى العا جەتەلەگەن, سەنىمى تاۋەكەلشىل ەتكەن ەلىمىزدىڭ اۋزىنداعى شۇكىر مەن تاۋبە, يمان مەن ىنساپ, بەرەكە مەن بىرلىك ۇلتىمىزدىڭ قاينار كوزى. ءاربىر جىلدىڭ وزىمەن بىرگە كەلگەن ايتۋلى وقيعاسى, ەستە قالار ەستەلىگى بولادى. بيىلعى جىلدىڭ دا جانىڭا شۋاق, كوڭىلىڭە قۋات سىيلايتىن جارقىن كۇندەرى كوپ بولدى. «قوي ۇستىنە بوزتورعاي جۇمىرتقالاعان» دەيتىندەي مامىراجاي كەزەڭ دامۋىمىزعا, العا وزۋىمىزعا ۇلكەن مۇمكىندىكتەر سىيلادى. ەلىمىزدە ەكونوميكالىق, الەۋمەتتىك, ساياسي, مادەني جاعىنان دا ورلەۋ ورىن الدى.
ءوزىم باسشىلىق ەتىپ وتىرعان «قازفوسفات» جاۋاپكەرشىلىگى شەكتەۋلى سەرىكتەستىگى بيىلعى جىلدى تولايىم تابىستارمەن قورىتىندىلاپ وتىر. ءبىر عانا وتكەن جىلمەن بيىلعى 10 ايدى قوسقاندا 11 754 ميلليون تەڭگەنى سالىق پەن بيۋدجەتتىك ەمەس اۋدارىمدارعا تولەدىك. ونىڭ ىشىندە جامبىل وبلىسىنىڭ بيۋدجەتىنە 5 789 ميلليون تەڭگە قۇيدىق. ءبىزدىڭ كومپانيا ەلىمىزدىڭ ءۇش ايماعىندا, ياعني جامبىل, وڭتۇستىك قازاقستان جانە اقمولا وبلىستارىندا جۇمىسىن جالعاستىرۋدا. سونىمەن قاتار, الماتى, تاراز, جاڭاتاس, قاراتاۋ, شىمكەنت, ستەپنوگور قالالارى مەن وعان جاقىن ورنالاسقان ەلدى مەكەندەردىڭ تۇرعىندارىن تۇراقتى جۇمىسپەن قامتىپ وتىرمىز.
ءتورت قۇبىلاسىن تۇگەندەپ, التى قۇرلىقتىڭ الدىندا ابىروي بيىگىنە كوتەرىلگەن ەلىمىزدىڭ ەرتەڭگى كۇنى جارقىن. ءاربىر وتكەن جىل ۇلت تاريحىنا ءوزىنىڭ ورنەگىن قالدىردى. قوي جىلىندا قوينىمىز قازىناعا تولىپ, حالقىمىزدىڭ سانى ارتتى. مۇمكىندىگىمىز جوعارىلاپ, كەڭىستىگىمىز كەڭ ەتەك الدى. كەمەل ەل, كوركەم ۇلت ساناتىندا ءارى قارايعى تىرشىلىگىمىزدى تىكتەدىك. ءورىسىمىز مالعا, شاڭىراعىمىز جانعا تولعان قاسيەتتى جىلدىڭ ەستەلىگى كوپ. كەلەر جىل دا كوركەمدىگىمەن, كەمەلدىگىمەن كەلسىن. وتكەن جىلدىڭ ورنەگى بولەك. ەسكى جىل ەسىركە, جاڭا جىل جارىلقا!
مۇقاش ەسكەندىروۆ,
قازاقستاننىڭ ەڭبەك ەرى,
«قازفوسفات» جشس-ءنىڭ باس ديرەكتورى.
جامبىل وبلىسى.