سوعىس اياقتالدى
وتكەن اپتانىڭ باستى وقيعاسى اقش-تىڭ يراكتاعى اسكەري ميسسياسىنىڭ اياقتالۋى بولدى. ەندى بۇل ەلدە 50 مىڭ اقش اسكەرى قالعانمەن, ول يراك قارۋلى كۇشتەرىن دايىنداۋ ماسەلەسىمەن شۇعىلدانادى. جەتى جىلدان اسا ۋاقىتتا اقش اسكەري ميسسياسىن جۇزەگە اسىرۋعا 1 تريلليون دوللاردان استام قارجى جۇمسالىپتى, 4400 اسكەرى قازا تاۋىپ, 35 مىڭ ادام جارالانىپتى. كەلەسى جىلدىڭ اياعىندا اقش ءوز اسكەرىن تولىق الىپ كەتپەك. پرەزيدەنت باراك وباما سايلاۋ ناۋقانى كەزىندەگى ۋادەسىندە تۇردى.
كارزاي كەلىسىمدى قالايدى
اۋعانستان پرەزيدەنتى حاميد كارزاي “تاليبان” قوزعالىسىمەن كەلىسىم جۇرگىزەتىن كەڭەستى جاساقتادى. ونىڭ قۇرامى 50 ادامنان تۇرماق. كوپ ءۇمىت سونىڭ قۇرامىنا جۇكتەلمەك. ويتكەنى, وندا بۇرىنعى جاساقشىلار دا, ايەلدەر دە, وپپوزيتسيا وكىلدەرى دە, سونداي-اق ۇكىمەت مۇشەلەرى دە بار كورىنەدى. بۇل قارسىلاستارعا, ياعني “تاليبان” جاعىنا ايتارلىقتاي سەنىم تۋدىرادى.
ارىڭ تازا ما؟
قىرعىزستان پرەزيدەنتى روزا وتۋنباەۆانىڭ مەملەكەتتىك قىزمەتكە العاندا ادامداردى جالعاندىق دەتەكتورىنان وتكىزۋ تۋرالى جارلىعى راسىندا دا تاڭدانارلىق وقيعا. ادالدىقتى پوليگراف كومەگىمەن انىقتاۋ ءسىرا قىلمىسكەرلەرگە قاتىستى شارا بولسا كەرەك. اڭگىمە يدەياعا, مۇددەگە ادالدىق تۋرالى بولسا, جالعاندىق دەتەكتورىنان ۋاقىتشا ۇكىمەت مۇشەلەرىنىڭ كوپشىلىگى وتە المايتىن شىعار. بۇل ەلدە بۇگىنگى وداقتاستار ەرتەڭ ءبىر-بىرىنە جاۋ بولۋى ادەتتەگى نارسە ىسپەتتەس.
قورعانىسقا قارجى ايامايدى
ساۋد ارابياسىنىڭ ۇكىمەتى اسكەريلەر مەن قاۋىپسىزدىك قىزمەتى ادامدارىنىڭ جالاقىسىن كوبەيتۋ تۋرالى شەشىم قابىلدادى. ەلدىڭ ءبىر جىلدا قورعانىسقا جۇمسايتىن قارجىسى 41 ميلليارد دوللاردى قۇرايدى. بۇل دەگەنىڭىز مەملەكەتتىك شىعىننىڭ ۇشتەن ءبىرى. وسىلايشا بۇل ەل قورعانىسقا ەڭ كوپ قارجى جۇمسايتىن ەلدەردىڭ بىرىنە اينالىپ وتىر. مۇندا قارۋلى كۇشتەر قۇرىلىمدارىندا 175 مىڭ ادام بار. حالقىنىڭ سانىنا شاققاندا بۇل دا اسا جوعارى كورسەتكىش.
كاددافي اقى سۇرايدى
قازىر ەۋروپاعا افريكادان كەلىپ جاتقان يمميگرانتتار شىن مانىندە ۇلكەن پروبلەماعا اينالىپ وتىر. ءبىراز ەلدە ول الەۋمەتتىك, ءتىپتى ساياسي قيىندىقتار تۋدىردى. ليۆيا كوسەمى مۋاممار كاددافي ەۋرووداق باسشىلارىنان بۇل ماسەلەنى شەشۋ ءۇشىن, ياعني افريكالىقتاردىڭ اعىنىن توقتاتۋ ءۇشىن 5 ميلليارد ەۋرو بەرۋدى تالاپ ەتتى. ايتپەسە ەۋروپا قارا قۇرلىققا اينالادى دەپ قورقىتتى. ال افريكالىقتاردى قالاي توقتاتاتىنىن ناقتى ايتقان جوق.
جەرلەۋ ورنى دايىن
رەسەيدىڭ لدپ كوسەمى, اركەز وعاش ويلارى, ادەپسىز ارەكەتتەرىمەن كوزگە ءتۇسىپ جۇرەتىن ۆلاديمير جيرينوۆسكي جۇرتتى تاعى ءبىر تاڭداندىردى: ول ءبىراز اتاقتى ادامدار جەرلەنگەن تروەكۋروۆ زيراتىنان ءوزىن جەرلەيتىن ورىن ساتىپ العان كورىنەدى. بۇل ءۇشىن جيرينوۆسكي 2 ميلليون رۋبل تولەپتى. ولسە كومۋسىز قالامىن دەمەگەن شىعار-اۋ, ولگەندە دە بەدەلدى جەردە جاتقاندى ويلاعان بولار.
تاجىكتەرگە ءتيىستى
ءبىر جانكەشتىنىڭ تاجىكستاننىڭ قودجاند قالاسىندا ءوزىن-ءوزى جارۋىنان 25 ادام جاراقاتتانعان, ال جەرگىلىكتى باق حابارلارىنا قاراعاندا, 10-15 ادام قازا تاپقان كورىنەدى. بۇنىڭ قايسىسى شىندىق ەكەنىن ۋاقىت كورسەتەر, ال ءبىر شىندىق – ونى جۇزەگە اسىرعان وزبەكستان يسلام قوزعالىسى ەكەنى. سوگدي وبلىسىنداعى يسفارا قالاسى ەكسترەميستەردىڭ ورتالىعى سانالادى جانە ولار وسىندا بەلسەندى ارەكەت جاسايدى. كەزەكتى بۇل ارەكەتتەرىن ولار وسى قالادا قىلمىستارى ءۇشىن تۇرمەگە جابىلعان سەرىكتەرىن بوساتۋعا ارناعان ەكەن. بىراق بۇل ولار ءۇشىن ءساتسىز اياقتالىپ, تەك جانكەشتىنىڭ ءوزىن قۇربان ەتۋ ارەكەتىمەن شەكتەلىپتى.
قايتا كەلگەن ءورت جامان
رەسەيدە اپتاپ ىستىق باسىلعاننان كەيىن الاپات ءورت تە سايابىرلاعانداي ەدى. بىراق بەيسەنبى كۇنى ۆولگوگراد جانە ساراتوۆ وبلىستارىندا ءتىلسىز جاۋ قايتا شاپقانداي بولدى. ودان 502 قۇرىلىس, ونىڭ 380-ءى تۇرعىن ءۇي كۇلگە اينالدى. ەڭ جامانى – ودان 20 ادام زارداپ شەگىپ, ونىڭ التاۋى قازاعا ۇشىراعان. قاتتى جەل ءورتتى ورشىتە تۇسكەن.
ازىرلەگەن ماماديار جاقىپ.