ارماننان التىنعا دەيىن: ميحايل شايدوروۆتىڭ چەمپيوندىق جولى

بالالىق شاقتان باستالعان ارمان

ميحايل شايدوروۆ 2004 جىلعى 25 ماۋسىمدا الماتى قالاسىندا دۇنيەگە كەلگەن. بولاشاق چەمپيون مۇز ايدىنىنا بەس جاسىندا اياق باستى. ونىڭ العاشقى باپكەرى ءارى سپورتتاعى باعىت-باعدارىن ايقىنداعان ادام – اكەسى ستانيسلاۆ شايدوروۆ, قازاقستاننىڭ بىرنەشە دۇركىن چەمپيونى.

اكەسى ونى العاش رەت «رامستور» مۇز ايدىنىنا ەرتىپ بارعان. كىشكەنتاي ميحايل مانەرلەپ سىرعاناۋدى بىردەن ۇناتقان جوق. ءبىراز ۋاقىت سپورتتىق گيمناستيكامەن اينالىستى. الايدا اراعا ءبىر جارىم جىل سالىپ, مۇزعا دەگەن ساعىنىشى ويانىپ, كونكي تەبۋگە دەگەن قۇلشىنىسى كۇشەيەدى. ءسويتىپ, جەتى جاسىنان باستاپ تۇراقتى جاتتىعۋعا كىرىسەدى.

14 جاسقا تولعاندا شايدوروۆتىڭ وتباسى كاسىبي وسۋگە قولايلى جاعداي ىزدەپ, رەسەيگە قونىس اۋدارادى. اۋەلى ماسكەۋدە, كەيىن سوچيدە جاتتىعادى. 2018 جىلى ول رەسەيدىڭ تۇڭعىش وليمپيادا چەمپيونى, تاجىريبەلى مامان الەكسەي ۋرمانوۆپەن بىرلەسىپ جۇمىس ىستەي باستايدى.

بۇل شەشىم كەزدەيسوق ەمەس ەدى. قازاقستاندا سول كەزەڭدە الەمدىك دەڭگەيدەگى جۇلدىز تاربيەلەۋگە قاجەتتى ينفراقۇرىلىم جەتكىلىكسىز بولاتىن. ال سوچي قالاسىندا 2014 جىلعى وليمپيادادان كەيىن مانەرلەپ سىرعاناۋعا ارنالعان زاماناۋي بازا قالىپتاسقان ەدى.

مەملەكەت باسشىسى ميحايل شايدوروۆتى وليميپيادا چەمپيونى اتانۋىمەن قۇتتىقتادى

العاشقى جارقىن جەتىستىكتەر

شايدوروۆتىڭ حالىقارالىق ارەناداعى العاشقى ەلەۋلى تابىسى 2022 جىلى تىركەلدى. ءالى جاسوسپىرىمدەر ساناتىندا ونەر كورسەتىپ ءجۇرىپ, ول الەم چەمپيوناتىندا كۇمىس مەدال جەڭىپ الدى. قىسقا باعدارلامادان كەيىن سەگىزىنشى ورىندا تۇرعان ميحايل ەركىن باعدارلامادا سەنىمدى ونەر كورسەتىپ, جالپى ەسەپتە ەكىنشى ورىنعا كوتەرىلدى. سول جارىستا ول تەك تەحنيكالىق شەبەرلىگىمەن تانىلعان يليا مالينينگە عانا جول بەرگەن ەدى.

ەرەسەكتەر اراسىنداعى سەرپىلىس

ەرەسەكتەر دەڭگەيىندەگى العاشقى مەدالدار 2023-2024 ماۋسىمىندا كەلە باستادى. دەگەنمەن شىنايى سەرپىلىس كەلەسى جىلى بايقالدى. ميحايل قىتايداعى گران-پري كەزەڭىندە كۇمىس جۇلدە الىپ, فينالدا بەسىنشى ورىنمەن شەكتەلدى. بىراق ول ءتورت قۇرلىق چەمپيوناتىندا توپ جارىپ, ازيا ويىندارىندا قولا جۇلدەگە قول جەتكىزدى. سونىمەن قاتار الەم چەمپيوناتىندا كۇمىس مەدال ەنشىلەدى.

بوستوندا وتكەن الەم بىرىنشىلىگىندە ەركىن باعدارلامادا ميحايل كۇردەلى ەلەمەنتتەردى ءمىنسىز ورىندادى. جالپى 287,47 ۇپاي جيناپ, الەمدىك دەڭگەيدەگى شەبەر ەكەنىن دالەلدەدى.

باپكەرى الەكسەي ۋرمانوۆ شاكىرتىنىڭ قايسار مىنەزىن ەرەكشە اتاپ ءوتتى. ونىڭ ايتۋىنشا, ميحايل ءار جارىستا ءوزىنىڭ مىقتىلىعىن سوزبەن ەمەس, مۇز ۇستىندەگى ونەرىمەن دالەلدەيدى.

سونىمەن قاتار «سپورت ەكسپرەسس» باسىلىمىنا بەرگەن سۇحباتىندا الەكسەي ۋرمانوۆ سپورتشىنىڭ وليمپياداداعى جەتىستىگىنە قاتىستى سەزىمى 1994 جىلى ءوزى التىن جەڭىپ العان كەزدەگى اسەردەن وزگەشە ەكەنىن اتاپ ءوتتى.

«قازىر مەندە بۇل جىگىتكە دەگەن زور ماقتانىش سەزىمى بار. جىگىتكە ەمەس, ناعىز ەر-ازاماتقا دەگەن. وسىنداي سپورتشىم بار ەكەنىنە, وعان سەنىم ارتا الاتىنىما قاتتى قۋانامىن. ءتىپتى تاۋەكەلگە دە سەنىپ تاپسىرا الامىن. بۇگىنگى ەركىن باعدارلاماداعى تورتتىك فليپ ءالى تولىق ءپىسىپ-جەتىلمەگەن ەلەمەنت ەدى, ونى از جاتتىقتىردىق. سوعان قاتتى الاڭدادىم», دەپ مويىندادى ۋرمانوۆ.

سونداي-اق باپكەر ەگەر شايدوروۆتىڭ ورنىندا باسقا سپورتشى بولعاندا, ونى بۇل ەلەمەنتتى ورىنداۋعا ەشقاشان جىبەرمەيتىنى اتاپ ءوتتى.

ميلانداعى تاريحي ءسات

2026 جىلعى وليمپيادا قارساڭىندا شايدوروۆ التىنعا باستى ۇمىتكەر سانالمادى. ساراپشىلار ونى كۇمىس پەن قولا ءۇشىن تالاساتىن سپورتشىلار قاتارىنا قوسقان ەدى. ال باستى فاۆوريت رەتىندە «كۆادتاردىڭ قۇدايى» اتانعان يليا مالينين كورسەتىلدى.

دەگەنمەن سپورت – توسىنسىيعا تولى. قىسقا باعدارلامادا ميحايل تورتتىك ءلۋتتستى ۇشتىك تۋلۋپپەن كاسكادتا ورىنداپ, ۇشتىك اكسەل مەن تورتتىك تۋلۋپتى ءساتتى قوندىردى. ناتيجەسىندە 92,94 ۇپاي جينادى.

ەركىن باعدارلامادا ول باستاپقى جوسپارىن وزگەرتىپ, بەس تورتتىك سەكىرۋدى قامتىعان كۇردەلى كونتەنت ۇسىندى. ۇشتىك اكسەل مەن تورتتىك سالحوۆ كومبيناتسياسى, تورتتىك فليپ پەن تۋلۋپ, وزگە دە جوعارى تەحنيكالىق ەلەمەنتتەر كورەرمەندى ءتانتى ەتتى. قازىلار القاسى وعان 198,64 ۇپاي بەردى. قورىتىندى ناتيجە – 291,58 ۇپاي.

بۇل كورسەتكىش وعان وليمپيادا التىنىن سىيلادى. وسىلايشا ميحايل شايدوروۆ قازاقستان تاريحىنداعى مانەرلەپ سىرعاناۋدان تۇڭعىش وليمپيادا چەمپيونى اتاندى.

جەڭىستەن كەيىن وتانداسىمىز بۇل جۇلدەگە قول جەتكىزۋ قيىن بولعانىن ايتتى.

«شىنىمدى ايتسام, ءالى دە سەنە الار ەمەسپىن. ماۋسىم بويى ءوز-وزىممەن كۇرەستىم. بۇل ماۋسىم مەن ءۇشىن اسا اۋىر بولدى. جارىستاردا بەس بىردەي تورتتىك سەكىرۋدى شامامەن ءۇش رەت ورىنداپ كورۋگە تىرىستىم, بىراق بىردە-ءبىر رەت ءساتتى شىقپادى. ال بۇگىن ءبارى ءساتتى ورىندالدى. ءساتى ءتۇسىپ, قولىمنان كەلدى.

مەن بۇل وليمپياداعا ۇزاق دايىندالدىم. ماۋسىم بويى بار ويىم - ءوز ءىسىمدى ادال اتقارۋ بولدى. ەندى ەڭبەگىمنىڭ جەمىسىن كورىپ وتىرمىن. بۇل مەدالدى قازاقستان حالقىنا ارنايمىن», دەدى وليميپيادا چەمپيونى.

ميحايل شايدوروۆ – وليمپيادا چەمپيونى!

رەكوردتار مەن تاريحي ماڭىز

شايدوروۆ – الەمدە العاش رەت ۇشتىك اكسەل مەن تورتتىك تۋلۋپتى, سونداي-اق ۇشتىك اكسەل مەن تورتتىك سالحوۆتى ويلەر ارقىلى كاسكادتا ورىنداعان سپورتشى. بۇل تەحنيكالىق باتىلدىق وعان مويىندالعان شەبەرلەردى باسىپ وزۋعا مۇمكىندىك بەردى.

بۇعان دەيىن الەم چەمپيوناتىندا كۇمىس جۇلدە العان قازاقستاندىقتار قاتارىندا 2013 جىلى دەنيس تەن, 2019 جىلى ەليزابەت تۋرسىنباەۆا بولعان ەدى. سونىمەن قاتار 2014 جىلى سوچي وليمپياداسىندا دەنيس تەن قولا جۇلدەنى ولجالاعان ەدى. ال ميحايل ەل قورجىنىنا ءۇشىنشى الەمدىك كۇمىستى جانە تۇڭعىش وليمپيادالىق التىندى سالدى.

ايتا كەتەيىك, مانەرلەپ سىرعاناۋشى ميحايل شايدوروۆ قىسقا باعدارلاماسىن قازاقستاننىڭ حالىق ءارتىسى ديماش قۇدايبەرگەننىڭ ورىنداۋىنداعى «Confessa» كومپوزيتسياسىنىڭ سۇيەمەلدەۋىمەن ۇسىندى.