قىس مەزگىلىندە اقتوبە وبلىسى اۋماعىندا جول قوزعالىسى قاۋىپسىزدىگىن قامتاماسىز ەتۋ ماقساتىندا پوليتسيا دەپارتامەنتىنىڭ اكىمشىلىك پوليتسيا باسقارماسى قىزمەتكەرلەرى رەسپۋبليكالىق, وبلىستىق جانە جەرگىلىكتى ماڭىزى بار اۆتوكولىك جولدارىنا 684 تەكسەرۋ جۇرگىزدى. رەيد بارىسىندا جولداردىڭ قاردان ۋاقتىلى تازارتىلماۋى, كوكتايعاققا قارسى ينەرتتىك ماتەريالداردىڭ سەبىلمەۋى, جول بەلگىلەرىنىڭ كورىنبەۋى, جول ورتاسىنداعى ويىقتار مەن تەرەڭ شۇڭقىرلار, اسفالت جامىلعىسىنىڭ بۇزىلۋى سياقتى كەمشىلىكتەر انىقتالدى, دەپ حابارلايدى Egemen.kz.
انىقتالعان زاڭبۇزۋشىلىقتار بويىنشا كەمشىلىكتەردى تەز ارادا جويۋ جونىندە جاۋاپتى مەكەمەلەرگە 410 نۇسقاما بەرىلدى.
سونىمەن قاتار اۆتوموبيل جولدارىن تالاپقا ساي كۇتىپ-ۇستاماعان 66 زاڭدى جانە لاۋازىمدى تۇلعا اكىمشىلىك جاۋاپكەرشىلىككە تارتىلدى.
«قىس مەزگىلىندە جولداردى تازالاۋعا, كوكتايعاقتىڭ الدىن الۋ شارالارىن ىسكە اسىرۋ مەن جول تازالايتىن تەحنيكانىڭ ساقاداي ساي بولۋىنا ەرەكشە نازار اۋدارىلادى. قابىلدانىپ جاتقان شارالار جول-كولىك وقيعالارىنىڭ الدىن الۋ, كولىك جۇرگىزۋشىلەرى مەن جولاۋشىلاردىڭ قاۋىپسىزدىگىن ساقتاۋعا باعىتتالعان. الداعى ۋاقىتتا جول ۋچاسكەلەرىن تەكسەرۋ جۇمىستارى جالعاسا بەرەدى», دەيدى اكىمشىلىك پوليتسيا باسقارماسىنىڭ باستىعى ەركىن وتەگەن.