كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ قىتاي كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى, ورتالىق كوميتەتتىڭ حاتشىسى ءارى ناسيحات ءبولىمىنىڭ جەتەكشىسى ليۋ يۋنشان باستاعان قىتاي حالىق رەسپۋبليكاسىنىڭ دەلەگاتسياسىن قابىلدادى.
كەزدەسۋ بارىسىندا تاراپتار استانا مەن بەيجىڭ اراسىنداعى ەكىجاقتى ىقپالداستىقتىڭ بارىسىن تالقىلادى. اتاپ ايتقاندا, ساۋدا-ەكونوميكالىق جانە شەكارالىق ايماقتاعى ىنتىماقتاستىقتار مەن حالىقارالىق ۇيىمدار شەڭبەرىندەگى ءوزارا ءىس-قيمىلدار جونىندە پىكىر الماسىلدى. سونىڭ ىشىندە قىرعىز رەسپۋبليكاسىنداعى جاعداي تۋرالى اڭگىمەلەسكەن تاراپتار ونىڭ ءالى دە الاڭداتۋشىلىق جاعدايدا ەكەندىگىن اتاپ ءوتتى. وسى ورايدا قانات ساۋداباەۆ قىرعىزستانداعى تۇراقتىلىقتى, ەكونوميكالىق دامۋ مەن قاۋىپسىزدىكتى قامتاماسىز ەتۋ جولىنداعى كومەكتەردى جان-جاقتى بىرلەستىرۋ قاجەتتىگىن اتاپ ءوتتى. مۇنىڭ ءوزى جالپى ايماقتاعى تىنىشتىقتىڭ ساقتالۋىندا ماڭىزدى ءرول اتقارادى.
استانا مەن بەيجىڭ اراسىنداعى ىنتىماقتاستىقتى دامىتۋدىڭ الۋان قىرلارى تۋرالى ايتقاندا, تاراپتار پارتياارالىق جانە پارلامەنتارالىق ارىپتەستىكتەردىڭ ماڭىزدىلىعىن اتاپ ءوتتى.
ءوزىنىڭ سوزىندە ق.ساۋداباەۆ قازاقستان-قىتاي ستراتەگيالىق ىنتىماقتاستىعىنىڭ جوعارى دەڭگەيدە ەكەنىن اتاپ ءوتىپ, ونىڭ استانادا ماۋسىم ايىندا پرەزيدەنت نۇرسۇلتان نازارباەۆ پەن قحر توراعاسى حۋ تسزينتاو اراسىندا بولعان كەلىسسوزدەر بارىسىندا كەزەكتى رەت نىعايا تۇسكەنىن اۋىزعا الدى. تاراپتار ساۋدا-ەكونوميكالىق ىنتىماقتاستىقتىڭ ءىس جۇزىندە دامۋى – اسا ءىرى بىرلەسكەن ينفراقۇرىلىمدىق جوبالاردى ىسكە اسىرۋ بارىسىنان ايقىن كورىنەتىنىن اتادى. وسىعان وراي ق.ساۋداباەۆ وسى سالاداعى ىنتىماقتاستىقتى جاڭا ساپالى دەڭگەيگە, ياعني يننوۆاتسيالىق ءوزارا ءىس-قيمىل باعىتىندا ءوربىتۋدىڭ ماڭىزدىلىعىن ەسكە سالدى. سونىمەن بىرگە, ول قوناقتى ەلىمىزدىڭ 2010-2014 جىلدارعا ارنالعان ۇدەمەلى يندۋستريالىق-يننوۆاتسيالىق دامۋ باعدارلاماسىمەن تانىستىردى.
كەلىسسوز بارىسىندا تاراپتار قازاقستان مەن قحر اراسىنداعى شيكىزاتتىق ەمەس سەكتورلاردا ىنتىماقتاسۋ باعدارلاماسىنا ارنالعان ءىس-شارالار جوسپارىن ۋاقتىلى جۇزەگە اسىرۋدىڭ قاجەتتىلىگىنە دە نازار اۋداردى.
جاقسىباي سامرات.