“نۇر وتان” حدپ ورتالىق اپپاراتىندا “قازاقستان رەسپۋبليكاسىنىڭ كونستيتۋتسياسى – مەملەكەت پەن قوعامنىڭ تۇراقتى دامۋىنىڭ نەگىزى” دەگەن اتپەن عىلىمي-تاجىريبەلىك كونفەرەنتسيا ءوتتى. اتالعان شارانىڭ ۇيىمداستىرۋشىسى – “نۇر وتان” حدپ پارلامەنتاريزم ينستيتۋتى. كونفەرەنتسيا جۇمىسىنا پارلامەنت دەپۋتاتتارى, ەلىمىزدىڭ كونستيتۋتسيالىق كەڭەسىنىڭ, جوعارعى سوتىنىڭ, ورتالىق سايلاۋ كوميسسياسىنىڭ مۇشەلەرى, پرەزيدەنت اكىمشىلىگىنىڭ, ۇكىمەتتىڭ, باس پروكۋراتۋرانىڭ, قازاقستان حالقى اسسامبلەياسىنىڭ, سونداي-اق, ءتۇرلى حالىقارالىق جانە ۇكىمەتتىك ەمەس ۇيىمداردىڭ وكىلدەرى, عالىمدار مەن ساراپشىلار قاتىستى.
كونفەرەنتسيا كەزىندە وعان قاتىسۋشىلار اتا زاڭنىڭ 15 جىلدىق كەزەڭدەگى دامۋىن, ونىڭ دەموكراتيالىق ينستيتۋتتار مەن ەكونوميكالىق جانە الەۋمەتتىك رەفورمالاردىڭ نەگىزىن قالاۋداعى ورنىن جان-جاقتى سارالاپ, ءوز وي-پايىمدارىن ورتاعا سالدى. ماسەلەن, پارتيا حاتشىسى ەرلان قارين ءوزىنىڭ سوزىندە ەگەمەن ەل كونستيتۋتسياسىنىڭ تاريحى 15 جىلدىق كەزەڭدى كورسەتكەنىمەن, ونىڭ تامىرى تىم ارىدە جاتقانىن, سونىڭ ىشىندە الاش پارتياسى جارعىلارى مەن قازىرگى كونستيتۋتسيانىڭ ۇقساس تۇستارى بار ەكەندىگىن اتاپ ءوتتى. ونىڭ ايتۋىنشا, 15 جىلدىق بەلەستى باعىندىرعان ەل كونستيتۋتسياسىنىڭ بىرنەشە سيپاتىن اتاپ وتۋگە بولادى. “ول الەۋمەتتىك سيپات. ياعني, الەۋمەتتىك سيپات ءبىزدىڭ اتا زاڭىمىزدىڭ باستى ەرەكشەلىگىن كورسەتەدى. ماسەلەن, قازاقستان كونستيتۋتسياسىنىڭ الەۋمەتتىك قۇقىقتارعا قاتىستى كوپتەگەن قاعيدالارى ەۋروپا ەلدەرىنىڭ كونستيتۋتسيالارىمەن سالىستىرعاندا ناقتىراق كورسەتىلگەن دەۋگە بولادى”, – دەدى “نۇر وتان” حدپ حاتشىسى. ال پارلامەنت سەناتىنىڭ دەپۋتاتى اناتولي باشماكوۆ ءوز كەزەگىندە كونستيتۋتسيا, پرەزيدەنتتىك ينستيتۋت جانە پارلامەنتاريزمنىڭ قازاقستان قوعامىنىڭ ساياسي ۇدەرىسىنىڭ نەگىزگى قوزعاۋشىسى ەكەنىن اتاپ ءوتتى.
كونفەرەنتسيادا, سونداي-اق, نەگىزگى زاڭنىڭ قابىلدانعان كۇنىنەن باستاپ دامۋى, ەلىمىزدەگى كونستيتۋتسيالىق زاڭنامالاردىڭ بۇگىنى مەن كەلەشەگى, قازاقستاندىق قوعامنىڭ مودەرنيزاتسيالاۋىنا ءسايكەس, ونداعى زاڭنامالاردى زامان تالابىنا ساي جەتىلدىرۋ, دەموكراتيالىق ۇدەرىستەردى دامىتۋ, قازاقستاندىق پارلامەنتاريزم مەن ازاماتتىق قوعام ينستيتۋتتارىن قۇرۋ, ەلدەگى پارتيالىق-ساياسي جۇيەلەردى جەتىلدىرۋ سەكىلدى بىرقاتار ماسەلەلەر دە اڭگىمە وزەگىنە اينالدى.
كونفەرەنتسيا سوڭىندا وعان قاتىسۋشىلار قازاقستان قوعامىنىڭ ودان ءارى دەموكراتيالانۋى مەن ۇدەمەلى دامۋىن كوزدەيتىن بىرقاتار ۇسىنىمدار قابىلدادى.
ءلايلا ەدىلقىزى.